الموسم الثاني

رحلة مربية الحلقة الثالة والأربعون “طفلي يضربني، ماذا أفعل؟” (فيديو)

رحلة مربية الحلقة الثالة والأربعون “طفلي يضربني، ماذا أفعل؟” (فيديو)

وفاء غيبة ـ فريق الموقع

السلام عليكم وأهلا وسهلا فيكم بالحلقة ٤٢ من رحلة مربية، من فترة كنت بالسوق وشفت طفل عم يصرخ ومعصب

كان عمره تقريبا اربع سنوات أو خمسة، فجأة بعد هالصراخ الشديد انقض على أمه بكل ما أوتي من قوة وضربها ورفسها.

شو كانت ردة فعل وهل كانت هي الأنسب؟

 

رحلة مربية / طفلي يضربني

بسم الله نبدأ

في البداية:

كتير منا حضر موقف بيشوف فيه الطفل عم يضرب أمه، أو يمكن هي مرقت بهي التجربة وطفلها ضربها، هل هاد الأمر طبيعي؟

هل عادي نقبل الطفل يضرب أمه؟ ولا لأ لازم نضربه إذا ضربنا؟ هل ناخد الأمر بتساهل وأنه هو لسة صغير؟ ولا عاقبه على مافعله؟

بالتأكيد ضرب الطفل لأمه أو ضرب الأم لطفلها خط أحمر لا يمكننا اعتماده كسلوك تربوي لأنه سيترك أثر سلبي وعلاقة مهتزة بين الأم وطفلها.

طيب خليني كمل قصة الطفل وأمه اللي شفتهم بالسوق، بعد ما الطفل ضرب أمه ورفسها، الأم ردتله الضربة بضربة أقوى وضربته كف،

بعدها الطفل رجع ضرب مرة تانية .. قام الأم مسكته بقوة وسحبته وطلعوا من السوق، وعالأغلب كملوا معركتهم بالسيارة.

هاد السيناريو المخيف عم ينزل من مستوى الأم والطفل، وعم يخلي علاقتهم فيها شرخ كبير لايمكن يندمل بسهولة،

لكن هل يعني أني خلي طفلي يضربني وما أضربه؟ بالطبع لأ  طفلك ممنوع يضربك لكن ردة فعلك مهمة جداً

لتزرعي احترامك وتوصلي فكرتك بدون ما تقللي من قيمتك أو تلخبطي الأمور.

طيب حاتقليلي بدي أعرف شو لازم أعمل لما طفلي يضربني!

لا ياعزيزتي نحن لازم نشتغل قبل مايضربك طفلك في عدة أمور لازم تكون ماشية عالطريق الصحيح لحتى نقدر نضمن

سلوك سوي من طفلك وبعدها رح احكيلك شو تعملي، إذا ضربك طفلك مع أنك اشتغلتي على الأمور الأولى

أولاً:

قوانين المنزل، وضوح قوانين المنزل وثباتها وتحقيقها في المنزل من قبل الأم والأب والأطفال، رح يخلي الأمور واضحة بتخلي الطفل

عارف اللي اله واللي عليه، مثال، قوانين المنزل ممنوع الصراخ أو السب أو الضرب في المنزل وهاد القانون يتطبق على الجميع،

أو قانون مكان الأكل أو مدة الأجهزة أو وقت النوم، كل هي القوانين لازم تكون واضحة للطفل لحتى يفهم أساسيات حياته ويكون مرتاح بيومه وببيته.

ثانيا:

تطوير مهارات طفلي التعبيرية، كتير أطفال بيلجأوا للضرب لأنهم مو قادرين يعبروا عن مشاعرهم وممكن نلاقي هاد التصرف بيكثر

عند الأطفال الي تحت عمر السنتين لعدم معرفتهم باللغة المناسبة للتعبير عن مشاعرهم، الطفل محتاج يعرف ويتعلم مسميات

المشاعر ويشارك والديه عنها ويعلموه طريقة التعامل مع هي المشاعر، مثال الطفل اللي مااشتريناله لعبة أو حلاوة بده ياها، مننزل لمستوى

نظره ومنقله انت زعلان أو محبط لأن كنت بدك ياها وماقدرنا نجيبها، عادي حبيبي لما نشعر بالزعل منبكي أو نقول لماما.

هاد الأسلوب مع أغلب المشاعر اللي بيمرق فيها الطفل من سنوات عمره الأولى رح تعلمه كيف يعبر عن غضبه أو استياءه أو فرحه بطريقة صحية.

ثالثا:

عواقب السلوك السيء، السلوك السيء لازم يكون اله ردة فعل، لا تتوقعي أنه صمتك كافي، الطفل بيحتاج أنه يتوقف عند حده

ونقله اللي عم تعمله غير مناسب وغير مقبول، لهيك لا تتركي طفلك يتصرف بالطريقة اللي بتريحه لازم يعرف أنه إذا ضرب حدا رح

يشوف عاقبة هاد السلوك، واللي حكيت عنها بحلقتين شرحت أساسيات العقاب الصحي، بالموسم الأول من رحلة مربية  ياريت تشوفوها

رابعا:

روتين يوم طفلك، كتير أمهات بتغيب عنها أهمية روتين الطفل اليومي، وجود روتين بيخلي طفلك ينتقل من نشاط لنشاط بسلاسة

وسهولة، الروتين بيخلي طفلك مرتاح ومتأقلم مع يومه، لا تتوقعي أنه القرارات اللحظية سهلة ومريحة، بالعكس طفلك بيتوتر

بالقرارات المفاجأة، لهيك وضع روتين يصرف فيه يومه بشكل صحي وموجه لتفعيل مهاراته، رح يخلي هادي وسعيد.

خامسا:

وقت خاص لكما، دائما بعيد وبزيد بأهمية وقت خاص بينك وبين طفلك او بين الأب وبينه، او معكم انتو كعائلة، الطفل محتاج وقت يشعر

فيه بتقربكم منه خلي يختار هو اللعبة اللي بدكم تلعبوها، اضحكوا واستمتعوا وتقربوا منه، خففوا قوانين بهاد الوقت الهدف منه هو تقرب

لتمونوا على طفلكم وتعبوا خزان المحبة عنده..وأهمية هاد الوقت رح تنعكس بسلوك طفلك وطريقة نظرته للأمور والتعبير عنها.

سادسا:

ما أطالب به أقوم به، لا تطالبي طفلك بأنه مايضربك إذا كنت عم تضربيه، الضرب متل ماحكينا ممنوع على الكل بقوانين

المنزل، مطالبة طفلي بأمور مالي قادرة أنا حققها مو عادي بيقول المثل:لا تنه عن خلق وتأت مثله عار عليك إذا فعلت عظيم.

طفلك عم يستمد الاحترام باحترامك اله، وعم يتعلم الرقي بتعاملك الراقي اليومي، وبالتأكيد رح يتعلم الضرب والسب

والشتم إذا تبنيتيهم بتصرفاتك، الخيار عندك والقرار إلك.

سابعا:

لا تستفزي طفلك، للأسف بعض الأمهات بتستفز أطفالها ليوصل لمرحلة مو قادر يسيطر على غضبه، فبسهولة بيصير يضرب ويصرخ لأنه خلص طلع عن طوره،

وكمان للأسف بتشوفه هيك معصب بتروح بتضحك وبتستخف الأمر، ليزيد غضبه غضب وتطلع تصرفاته بدون مايحسبها فانتبهي ماتستفزي طفلك

ثامناً:

افهمي طفلك، اعرفي إذا كان جوعان أو نعسان أو تعبان، أكيد بهي الحالات رح تكون تصرفاته مو طبيعية وممكن تزيد نوبات الغضب،

لهيك احترمي مشاعره وافهمي شو بده وخففي عليه لما تحسيه متدايق أو تعبان.. كوني انت مصدر الأمان اللي بيلجأله بكل حالاته

خلي بينك وبينه رابط وحوار يسهل التواصل بينكم،، لأن كل ماحسستي طفلك أنك فاهمتيه كل ما هدي وخفت نوبات غضبه.

طيب، لو أنا عاملة كل اللي علي ومع هيك طفلي ضربني شو أعمل؟

جميل هل ممكن الطفل يمر بحالة عصبية تخليه يضرب، ايه ممكن الشعور بالغضب أمر طبيعي لكن نحن منتحكم بردات فعلنا تجاه هي المشاعر.

أول شي لازم أنت تكوني فاهمة طفلك وعارفة أنه هو واصلة معه مرحلة ممكن يضرب، فبتحاولي تهدي الأمور وبتقوليله،

انت معصب أنت غضبان. بدك ساعدك بشي إذا ماكان فيكي تعملي شي انسحبي وقوليله بس تروق بقدر اسمعك.

إذا مد ايده عليكي حاولي فوراً تمسكيه وتمنعيه، امسكي ايده بقوة وقوليله انتبه، انتبه يامحمد ممنوع تضرب ماما أنا مابسحملك.

إذا ضربك ومالحقتيه، امسكي أيده فورا بحزم وقوليله أنا مابسمحلك أبدا تتضربني فاهم، رح اترك ايدك انتبه منيح وين

رح تحطها طبعا في نظرة حزم وصوت حازم ماتكوني نازلة وبخفة كوني قوية.

لما ترجعي على البيت أو اذا كنت بالبيت استني ليكون هدي شوي، عدي معه وقوليله أنا ماتوقعت ابدا انك تمد أيدك علي،

شوف محمد هلأ أنا عم قلك لكن إذا تكرر الأمر رح يصير في عقاب على هاد السلوك مفهوم!

طفلك محتاج يعرف أنه السلطة معك وأنك حازمة بهاد الأمر، هدوءك ثباتك قوتك بتظهر بدون صراخ أو ضرب.

الطفل بيتصرف وبيشوف ردة فعلك وعليها بيقيس هل استفزك هل صدميته بحزمك، هل رح تخليه يتمادى كل هي الأمور

متعلقة بردة فعلك للأمر والعلاقة القائمة في المنزل اليومية.. فانتبهي عليها لحتى ماتفوتي بدوامة العلاقة المتوترة مع طفلك.

هي نهاية حقلتنا لليوم بتمنى تكون عجبتكم.

ولتفاصيل حجز استشارة معي بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة

مقالات ذات صلة

زر الذهاب إلى الأعلى