الموسم الأول

رحلة مربية الحلقة الثالثة والأربعون “هل جهزتِ طفلك لاستقبال رمضان” (فيديو)

رحلة مربية الحلقة الثالثة والأربعون “هل جهزتِ طفلك لاستقبال رمضان” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

رمضان عالأبواب الله يبلغنا أياه ويقدرنا على صيامه وقيامه جميعاً المشاعر الجميلة اللي بتوصلنا خلال هي الأيام الفضيلة،

ضروري نورثها لأطفالنا شو هي أهم الأمور اللي لازم تسلطي عليها الضوء وكيف تنقلي لطفلك حب رمضان وصيامه  بحلقة اليوم.

رحلة مربية / تجهيز الطفل لرمضان

بسم الله نبدأ

في البداية:

رمضان هاد الشهر المميز عنا كمسلمين لأسباب عدة ضروري طفلك يعرف الأسباب إما بذكرك إلها

أو تعطيه فرصة للبحث وبعدها يخبر العائلة كلها عن المعلومات اللي جمعها.

فمثلاً مهم جداً يعرف طفلك: أسباب الصيام، كيفية معرفة دخول رمضان، متى موعد الفطور، صلاة التروايح، نزول القرآن، فتح أبواب الجنة وإغلاق أبواب جهنم،

ليلة القدر وأجرها، العشر الأخير، مضاعفة الحسنات” بالتأكيد رح تراعي عمر طفلك وكمية استيعابه وتعطي المعلومة اللي بيحتاجها.

طيب في ثمان نقاط ضروري تعمليها ليكون أثر رمضان على نفوس أطفالك أجمل.

أولاً:

دورك كأم أو دورك كأب، أطفالكم عم يمتصوا ردود فعلكم ويراقبوا تصرفاتكم ويتبنوها بعرف أول أيام من رمضان ليست بالسهلة،

لكن تعبكم المستمر أو العصبية المتلازمة للصيام رح توصل لطفلك انكم عم تصوموا مكرهين، بتذكر وحدة من صديقاتي زمان

كانت تقلي مابصدق امتى يخلص رمضان لأن بابا بيتحول لوحش فيه، معصب دائما وعم يخانق طول الوقت بالتأكيد

الفكرة اللي انزعت عن صديقتي ابدا ليست إيجابية عن رمضان مشان هيك نحرص نكون قدوة لأطفالنا

ثانياً:

عمر طفلك وقدراته مرتبطة بالأمور المطلوبة منه كصيام او صلاة او قراءة قرآن، فإذا كان طفلك عمره خمس سنوات اشرحيله مدة صيامه

رح تكون بس لأذان الظهر، أما القرآن رح يردد معك سورة صغيرة كل يوم متل الإخلاص او الفلق او الناس، أما الصلاة رح تحاولي معاه

يصلي معك الفرض بدون تشديد اذا ماحب يصلي خليه على راحته.. احسبي اعمار اطفالك وشوفي الأنسب بدون ضغط.

ثالثاً:

ارسمي جدول لأيام شهر رمضان واكتبي بكل يوم ساعة الإفطار والامساك والفجر وخلي طفلك يتابع كم تاريخ اليوم ومتى الإفطار وكم باقي للعيد.

رابعاً:

اكتبي 30 سنة من سنن الرسول صلى الله عليه وسلم وعلمي اطفالك كل يوم سنة نبوية، خليها سهلة وخفيفة عليهم،

متل : “البدء بلبس الحذاء الأيمن، النوم على الجنب الأيمن، استخدام السواك، الاستغفار، النوم على وضوء”

السنن كتيرة رتبيها واكتبيها بالجدول الشهري لحتى هنن يذكروك فيها كمان.

خامساً:

التصدق، اعملي صندوق صغير خلي طفلك كل يوم يحط فيه مبلغ بسيط ممكن ريال واحد بس، وآخر رمضان خليه يعطيه لأحد المحتاجين.

سادساً:

أعمال الخير، جميل جداً أنه نزرع بأطفالنا حب التطوع وعمل الخير حرصا على الأجر، وبالأخص برمضان الأجر مضاعف،

فمثلا تحضير وجبات طعام بسيطة وتوزيعها على العمال قبل الإفطار، إماطة الأذى عن الطريق،

إحضار صندوق ماء ووضعه في أحد المساجد على حسب قدراتك احرصي تعلمي طفلك أهمية العمل الخيري بشكل دائم وبالأخص برمضان.

سابعاً:

تحضير الفطور، خلي طفلك يكون جزء من تحضير المائدة او طبق معين، خليه يشعر بأهمية التحضيرات النهائية

وكم انتم متشوقين لسماع صوت أذان المغرب.

ثامناً:

التزيين، في ناس بتحب جدا انها تزين لرمضان، هي ليست أساس لكن شي بسيط يبهج اطفالك تصنعيه معهم

كعمل فني أنا مابشوف فيه مشكلة لأنه عم نحتفل باستقبال رمضان،

لكن أهم شي لا تزرعي بطفلك انها أساس وانه رمضان بدونها ناقص، ولا تبذري بشراء الحاجيات الخاصة لرمضان مشان مايصير إثم عليكي.

حابة اختم بنصيحتين للأمهات برمضان، أولا صلاة التراويح في المسجد إذا كنت أم لطفل أصغر من عشر سنوات

أرجوكي لا تروحي على المسجد وتصلي فيه هذا أذى للمصلين،

صلاتك في بيتك تؤجرين عليها الأجر الكثير، ثانياً المسلسلات الرمضانية، رمضان ليس لمتابعة المسلسلات ذات الأحداث الغير أخلاقية،

أنا ماعم افتي ولا عم قول حلال او حرام أهم شي نكون واعيين للشي اللي عم يدخل على بيوتنا وينزرع بعقول أطفالنا.

رمضان شهر جميل بالعبادات والتقرب لله عز وجل، وبحرصنا على تطبيق سنن الرسول صلى الله عليه وسلم،

وحسن الخلق، مجرد حرصنا عليهم رح نزرع بنفوس أطفالنا مدى جمال رمضان وأثره الطيب.

هي ختام حلقتنا لليوم بتمنى تكون عجبتكم.

ما هي أفضل وجبة إفطار صحية للأطفال؟

مقالات ذات صلة

زر الذهاب إلى الأعلى