الموسم الثاني

رحلة مربية  الحلقة الخامسة والثلاثون “اشحني طاقتك معي” (فيديو)

رحلة مربية  الحلقة الخامسة والثلاثون “اشحني طاقتك معي” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية،

هل بتشعري أنه طاقتك قليلة، ماعندك همة تعملي إنجاز جديد بحياتك، شايفة الدنيا مقفلة ومو عارفة من وين تبدي؟

رح احكيلك عن عشرة أمور رح تغير بحياتك ونظرتك لنفسك ولطاقتك.

رحلة مربية / اشحني طاقتك

بسم الله نبدأ

في البداية:

الأسبوع الماضي فتحت خانة الأسئلة بحسابي بالانستجرام، وبدئت الأمهات تتواصل معي وترسلي رسائلها، من الأمور اللي تكررت بكثرة،

هي نظرة كتير من الأمهات لنفسهم السلبية وشكواهم من عدم وجود طاقة بيومهم، لهيك قررت اليوم أحكي عن

عشرة نقاط لما رح تعمليهم رح تلاقي في فرق حقيقي وملموس بطاقتك بيومك ومع عائلتك.

أولا:

استيقظي مبكراً، في الصبح بركة، الاستيقاظ المبكر بيرفع الإنتاجية بالعمل يعني الشغل اللي بياخد معك ساعتين باليوم ممكن

ياخد معك نصف ساعة الصبح بكير، ووالله هي الحلقة كتبتها بساعة وحدة على عكس الأيام اللي بكتبها الظهر اللي ممكن تاخد

ساعتين أو حتى ثلاث ساعات، الاستيقاظ المبكر بيجلب السعادة وبينظم نومك، وبيشحن طاقتك بالشكل المطلوب.

مو لازم كل يوم سهرة ومو لازم كل يوم عشا ومو لازم كل يوم فلم، طاقتك أهم.

رتبي أمورك تنامي بكير لحتى تفيقي بطاقة حلوة لنفسك وبعدها لزوجك وأطفالك.

ثانيا:

أنت لست رجل آلي، الوعي بفكرة عدم الكمال بالعمل أو الإنجازات رح يخفف الضغط النفسي اللي بتعيشيه لترضي كل اللي حولك،

أنت انسان عادي تقصري وعادي تخطأي وعادي تتأخري، الحرص والمحاولة على الإنجاز بالشكل المناسب أمر ضروري لكن الهوس فيه

رح يتعبك ويتعب كل اللي حولك، مثال: لما وقعت من شهرين من على البسكليت، ماكان عندي قوة أني أعمل حلقة رحلة مربية هداك

الأسبوع وكان أمر جداً مزعجني، لكن بالأخير أنا انسان وطبيعي قصر وما كون متواجدة بأكمل صورة طوال الوقت لهيك خفي على نفسك شوي،

ولا تقولي مالحقت أطوي الملابس ولا ما لحقت أحكي مع رفيقتي على التلفون، أو انسيت جيب أغراض البيت عادي الأمور بتمشي أهم شي تخططيلها.

ثالثا:

خططي ليومك، لاتفيقي الصبح وتقولي عندي ألف شغلة اعملها، جيبي جوالك أو ورقة وقلم واكتبي، اليوم عندي طبخة رز ودجاج

ولازم احكي تلفون مع رفيقتي، اسمع المحاضرة تبعي، اطلع جيب كنزة لأبني، ألعب مع بنتي وابني، وأقرأ لهم قصة بالليل.

هيك لازم تكتبي اكتر شوي اقل شوي حسب يومك وطلباته، وإلا رح يضيع يومك وطاقتك وأنت عم تركضي تحاولي تلحقي هي

ولا هي والتهيتي بتلفونات مو مخطط الها وبعدها بفلم عالتلفزيون، وبالاخير ما انجزتي شي، وبتتراكم الطلبات لليوم التاني وهكذا

لا اعرفي شو بدك من يومك واكتبيهم، واحرصي تنجزي هي الأمور بسلاسة.

رابعا:

لا للمحبطين، لا تلغي الناس السلبية تماما بس قد مابتقدري خففي من التواصل معهم بلطف، ودخلي ناس إيجابية لحياتك، الصديقة

اللي كل مابتفتح تلفون الك بس عم تتشكى على زوجها وأهله والأولاد وقلة الدخل، ضروري تخففي من التواصل معها لأن اللي فيكي كافيكي،

والصديقة اللي بتفتح تلفون بس لتولعك على زوجك وأولادك وتقلك زوجي عزمني واشترالي وانت تبدي تقارني

نفسك فيها كمان ضروري تخففي من التواصل معها

أنا ما قصدي نشطب على كل الناس لكن احسبيها صح هل هي الصديقة فعلا صديقة وعم تمر بأزمة ومحتاجة دعمي، فأنا لها،

لكن النق والزن والشكوى أمر مزعج مالك مضطرة تسمعيه كل مرة وبكل تلفون.

خامسا:

شو عم تشوفي وشو عم تسمعي، في نساء بتهوى النكد وبتشتريه، حقيقة، يعني بشوف البعض على مواقع التواصل الاجتماعي،

بيحطوا أغاني حزينة، وبينشطوا كل المشاعر السلبية تبعهم وتبع غيرهم وبيقلبوا المواجع بالشوق للأحبة، والعتب على الزوج،

والقهر من الأصدقاء، ليييش!! الحياة أقصر من أني قضيها عم أسمع شيب يجيب الهم والنكد، هداك اليوم حكولي على مسلسل تابعه،

يادوب شفت شوي وسكرت، قلت اللي فيني كافيني بدي شيل همها إذا مصايبها انحلت!! أنا إذا الفيديو أو الفلم مو ليروقوني بلاهم

كتير بختار بعناية شو عم شوف وشو عم اسمع لأن صدقا بينقلب مزاجي ١٨٠ درجة خلال ثواني ، فكوني واعية للأمر.

سادسا:

النظافة والريحة الحلوة، على أنه هاد الأمر ممكن يكون بسيط على أنه أثره رهيب، حاولي تخلي بيتك ريحته حلوة وحاولي تحافظي

على رتابة المكان اللي بتقعدي فيه، ولو عندك ولاد علميهم الترتيب وبالأخص لما يكون بغرفة الجلوس لأنها غرفة الجميع، وأنت من

الصبح غيري ملابسك واحرصي يكون شكلك مرتب وريحتك حلوة، حطي شوية مكياج واهتمي بنفسك،

كل هي الأمور رح تعطيكي طاقة حلوة وتخلي يومك سعيد.

سابعا:

كافئي نفسك، كل ماتعملي شغلة حلوة تعلمي تكافئيها، مو لازم شي صعب، فمثلا بعد يوم طويل من الإنجاز جيبيلك شكلاتة

وحطيلك فيديو حلو تشوفيه وقولي لنفسك (أنا بستحقها) لما بتكملي قراءة كتاب كامل روحي اشتريلك قهوة وانبسطي فيها وقولي

أنا بستحقها بعد ماخلصت الكتاب، لما بتنجزي أي انجاز صعب احرصي انك تكافئي نفسك، ونصحية سريعة

اتعلمي تصمدي مصاري لحتى تحسي أنه فيكي تكافئي نفسك وقت مابدك.

ثامنا:

استمتعي بالأمور البسيطة، لا تستني الهدية الغالية أو سفرة الأحلام ولا طلعة المطعم لتشعري بالبسط، انبسطي بتفاصيل يومك

البسيطة لأنها حقيقة وموجودة معك دائما، انبسطي لما تفيقي الصبح بكامل صحتك، ولما تشربي قهوتك، ولما تسمعي صوت اللي بتحبيه،

لما تلبسي ملابسك النظيفة، لما تطبخي لعيلتك وتقعدي ابنك بحضنك، لما يبوسك ابنك ويقلك بحبك، لما تلعبي مع ولادك، ولما تشوفيهم بصحة وبخير،

لما تلبسي بييجامتك وتحسي بالدفا لما تحطي راسك على المخدة وانت بأمان ودفيانة وعيلتك بخير وصحة،

كل هي التفاصيل رح تعطيكي شحنات صغيرة وسريعة لتنعكس على طاقتك.

تاسعا:

اهتمي بنفسك، أنت أهم شخص بالنسبة الك ولست على قائمة الانتظار، لهيك انا قلتلك أول شي فيقي بكير، لما بتنامي بكير وبتفيقي

بكير رح تعطي نفسك فرصة تنامي بشكل كافي، تفيقي الصبح قبل ولادك وتنجزي شي بتحبيه، متل قرائة، رياضة، دراسة، عمل ما،

كل الأمور بتلحق بعض لهيك رتبي يومك لتهتمي بنفسك، صحتك مو لعبة تستهيني فيها لهيك لازم تلعبي شوية رياضة لتنشطي الدورة الدموية،

انتبهي لأكلك ولوزنك، لأن بالأخير هاد جسمك وعلى قد مابتعتني فيه رح يعطيكي سنين لقدام.. تابعي الناس اللي بتساعدك

تعرفي كيف تهتمي بنفسك، وتعلمي شو الأكل المناسب لصحتك، كل ماعطتي نفسك اهتمام كل ما شعرتي بسعادة واكتفاء وطاقة.

عاشرا:

تقربي من الله سبحانه وتعالى، عيشي يومك بين الحمد والدعاء، رب العالمين موجود معنا في كل تفاصيل حياتنا لهيك عيشي

وهو بقلبك، احتسبي الأجر وقت المصاعب، واحمدي طول الوقت على النعم، اعملي الفرائض وصلي واقرأي وردك اليومي وسبحي

وادعي من قلبك أنه الله يبارك بيومك ويقويكي ويقدرك أنك تعملي كل اللي عليكي وكل المهام المطلوبة منك وبعدها وكلي أمرك لله واستسلمي.

التواصل مع رب العالمين والشعور أنه هو معي ورح ييسرلي أمري، فيه قوة وطاقة لا محدودة لهيك دائما وأبداً خلي رب العالمين بقلبك.

في مثل أجنبي بيقلك اللي بتفكري فيه رح تصيري عليه، لهيك فكري بإيجابية وفكري بطاقة، وبعدي عنك كل الأفكار السلبية، أنا مابقدر

أنا مقصرة أنا أم مو كويسة، وقفي هلأ وابدي قولي أنا أم رائعة أنا شخص مهتم وحريص أنا دائما بطور نفسي وببحث عن العلم والمعرفة،

انظري لنفسك هيك ولا تكوني ضعيفة أنت كلك قوة وكلك طاقة يكفي أنك أم وأنجبتي وعدي بعدها آلاف الإنجازات العظيمة.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة

مقالات ذات صلة

زر الذهاب إلى الأعلى