الموسم الثاني

رحلة مربية الحلقة الرابعة “أهلا رمضان” (فيديو)

رحلة مربية الحلقة الرابعة “أهلا رمضان” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

قرب رمضان وقرب معه السلام والاستسلام لله عز وجل، شو القيم اللي ممكن نزرعها مع أطفالنا في هذا الشهر الفضيل بحلقة اليوم

هي السنة رمضان غير كل الرمضانات اللي عشناها، بسبب وضع الحجر الصحي كتير ناس رح تنحرم الفطور مع الأهل والأحباب ورح يقضوا رمضان مكتفين بعائلتهم الصغيرة،

رحلة مربية / أهلاً رمضان

في البداية:

لذا واجبنا كأمهات وآباء نتجهز نفسيا بعدين نجهز أطفالنا لرمضان لو ناقص من اجتماع العائلة الكبيرة لكن مليء بالحب والتعاون والهدوء النفسي والتقرب لله والكثير من القيم الإسلامية الراقية والرائعة.

باقي على رمضان أسبوع تقريبا حاولي خلال هالاسبوع توضحي انت وزوجك لأطفالكم فكرة رمضان وليش هو مهم عنا نحن المسلمين.

من واجبك انك تشرحي لطفلك عن أمور كثيرة بتصير برمضان لكن بالتأكيد رح تراعي عمره وكمية استيعابه وتعطي المعلومة اللي بتناسبه فمثلا ضروري يعرف:

أسباب الصيام

فوائد الصيام لأجسامنا

كيفية معرفة دخول رمضان

متى موعد الفطور

الفرق بين الشهر القمري والشمسي وليش رمضان موثابت بيوم واحد

أجر صلاة التروايح لو بالمنزل

نزول القرآن على محمد صلى الله عليه وسلم

فتح أبواب الجنة وإغلاق أبواب جهنم

ليلة القدر وأجرها

العشر الأخير

مضاعفة الحسنات

بعد الصيام والصبر رح يجي عيد الفطر اللي هو عيد المسلمين الحقيقي

كل هالامور وغيرها بيحتاج طفلك انه يفهمها لو قلتيله ياها قبل لا بأس من التكرار لحتى فعلا يكون على علم بأهمية رمضان النا نحن كمسلمين.

في عدة أفكار جمعتها ممكن تعملوها مع أطفالكم برمضان مابتحتاج منكم غير شوية ترتيب وقت وورق والوان:

أولاً:

مسجد صغير لصلاة الجماعة والتراويح، على حسب مساحة بيتك اعملي المسجد اذا كان فيكي تعملي ايطار ثابت كأنه مسجد كان بها لكن اذا صعب فا انك تحطي سجادة لكل افراد الاسرة رح يعطي شعور أجمل لصلاة الجماعة..

ثانياً:

لما يكون في قرار جميل حاولوا تخلوه اول يوم رمضان لحتى يرتبط رمضان بالامور الجميلة، فمثلا لو بنتك تحجبت عمليلها حفلة صغيرة اول يوم برمضان وخلي الفرحة فرحتين.. اذا ابنك رح تجيبيله لعبة بدو ياها اعطي ياها اول يوم برمضان.. خلينا نربط الأمور الجميلة برمضان قدر المستطاع..

ثالثاً:

ارسمي جدول لأطفالك بيوضح أيام رمضان كلها، وحددي وقت الإمساك ووقت الفطور. ولاتنسي عمر طفلك رح يحدد قدرته على الصيام وأداء العبادات

رابعاً:

وضع ورد يومي لقراءة القرآن الك ولاولادك رح يخليكي تابعي معهم بشكل واضح، لو كان طفلك صغير ، فيكي تحطيله على اليوتيوب يسمع كل يوم خمس دقائق أو أكتر على حسب عمره.

خامساً:

اكتبي 30 سنة من سنن الرسول صلى الله عليه وسلم وعلمي اطفالك كل يوم سنة نبوية، خليها سهلة وخفيفة عليهم، متل : “البدء بلبس الحذاء الأيمن، النوم على الجنب الأيمن، استخدام السواك، الاستغفار، النوم على وضوء” السنن كتيرة رتبيها واكتبيها بالجدول الشهري لحتى هنن يذكروك فيها كمان.

سادساً:

اكتبي ٣٠ اسم لشخصيات مهمة ضروري يكون طفلك بيعرفها متل المبشرين بالجنة او الامام البخاري او القائد صلاح الدين الايوبي.. مجرد ماتكتبوا بجوجل شخصيات إسلامية مؤثرة رح يطلعلكم قوائم كتير.. اختاروا المناسب وضيفوها للجدول.

سابعاً:

بعد صلاة المغرب او العشاء او التراويح، احرصوا على اجتماع العائلة كحلقة على الأرض واتنقاشوا مع أطفالكم عن مفهوم او خلق معين مثل الإحسان أو العطاء أو التسامح

ثامناً:

التصدق، اعملي صندوق صغير خلي طفلك كل يوم يحط فيه مبلغ بسيط ممكن ريال واحد بس، ولما ينتهي الحجر الصحي على خير خليه يتصدق فيه لاحد المحتاجين.

تاسعاً:

تحضير الفطور، خلي طفلك يكون جزء من تحضير المائدة او طبق معين، خليه يشعر بأهمية التحضيرات النهائية وكم انتم متشوقين لسماع صوت أذان المغرب.

عاشراً:

التزيين، في ناس بتحب جدا انها تزين لرمضان، هي ليست أساس لكن شي بسيط يبهج اطفالك تصنعيه معهم كعمل فني أنا مابشوف فيه مشكلة لأنه عم نحتفل باستقبال رمضان.

رمضان هو كنز المسلمين في كل عام، مشان هيك ضروري نستغله بأفضل طريقة ممكنة بكسب الأجر والثواب ولاتنسي كل اللي عم تعمليه هلأ عم ينزرع بقلوب اطفالك ليثمر فيما بعد حب رمضان بقلوبهم وتصرفاتهم..

هي نهاية حقلتنا لليوم بتمنى تكون عجبتكم

ولاستشارة خاصة بطفلك فيكي تستشيرني بشكل خاص ابعتيلي على الواتس على هاد الرقم

+966 55 257 9023

لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة

مقالات ذات صلة

زر الذهاب إلى الأعلى