الموسم الثاني

رحلة مربية الحلقة الرابعة عشر “10أحاديث يجب أن نعتمدها مع أطفالنا” (فيديو).

رحلة مربية الحلقة الرابعة عشر “10أحاديث يجب أن نعتمدها مع أطفالنا” (فيديو).

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

حلقة الأسبوع الماضي كان الها أثر ضخم وانتشرت انتشار سريع وكبير، فالشكر لله أولا ثم الكم ولدعمكم ألي،

بعد الحلقة كتير ناس سألوني طيب اذا مابدنا نحكي هيك مع أطفالنا شو البديل؟

رحلة مربية/ أحاديث يجب أن نتحدثها مع أطفالنا

اذا حكينا وخلصنا هل في طريقة نقدر نرجع نغير الأثر اللي تركناه، بحلقة اليوم رح جوابكم عن هي الأسئلة.

بسم الله نبدأ

في البداية:

لكل أم وأب استخدموا جمل الحلقة الماضية، وسألوني هل في أمل، طبعا دائما في أمل الإنسان قادر على التغيير والتطور، لهيك ابدأوا بقرار حقيقي

وبعدها اعتذروا لطفلكم عن اللي بدر منكم ووضحوله عن خطتكم في التغيير، وبعدها رح نبدل كل جملنا السلبية لجمل بناءة وداعمة.

نوعية الكلام اللي منوجهه لأطفالنا أثره عميق في نفوسهم، لهيك إذا كنا واعيين اله وللرسائل المخفية اللي عم نزرعها بأطفالنا ممكن

نكسب سلوكيات أطفالنا وطريقة تفكيرهم ونوعية اختياراتهم للأمور، وكله من ورا الكلمات اللي عم نحكيها

 طيب شو ال١٠ أحاديث اللي لازم نحرص عليها مع أطفالنا؟

أولاً:

الدعاء له خلي طفلك يتعلم أنك مع رب العالمين بكل تفاصيل حياتك، حتى لما تنبسطي منه .. مثل: الله يرضى عليك، الله يخليلي ياك،

ربي لايحرمني منك، ربي يسعدك، يارب تحميلي ياه، الله ييسرلك أمرك.. ولو تعبك ادعيله ربي يهديك ويحفظك) كل هدول الدعوات وغيرها رح تخليكي انت وطفلك تشعروا بالأمان فكتري منها.

ثانياً:

تعزيز الثقة بالنفس، في جمل كتير بيحتاج طفلك يسمعها بمواقف مختلفة متل: أنت بتقدر، حاول، معليش لو مازبطت هالمرة رح تزبط بعدين،

انا معك لا تشيل هم، جرب مرة، شفت كيف قدرت، عادي حبيبي كلنا منغلط المهم نتعلم كيف نصلح غلطنا،

بحب اصرارك، بتعجبني لما بتعمل هي الحركة بالكرة فنان، أنا متأكدة أنت لما حتفكر رح تعرف كثري من جمل الدعم

لأنها رح تنعكس بشخصية طفلك وثقته بنفسه واعتماده على ذاته.

ثالثاً:

توطيد العلاقة، لحتى نحصل على علاقة حلوة مع أطفالنا لازم من سنينهم الأولى نشبعهم من الجمل اللي بتطور هي العلاقة،

متل: أنت صديقتي اللي بتفهم علي، بتعرفي هي الشغلة ماقلتها لحدا غيرك، كلي ثقة فيك، أنا بعتمد عليك تماما بهاد الموضوع،

أنت نور عيوني وحبيبي، وجودك معي سعادة، نيالي انك انت ابني، يالله جاهز نطلع سوا او نلعب سوا هاد وقتنا الخاص

لاتستنوا اطفالكم يصيروا 15 سنة لتصيروا اصدقائهم، تقربوا منهم واكتسبوها عادة من بكير.

رابعاً: 

توقعات مميزة للمستقبل، نظرتنا لأطفالنا لها طعم خاص في نفوسهم، فلما نقله: أنا متأكدة أنك رح تصير شغلة مميزة بس تكبر،

اذا انت بتستمر بهاد الاهتمام بالحيوانات ممكن تصير دكتور بيطري مميز، شفتك كيف مهتم بالطيار والطيارة لما سافرنا ، ان شاء الله بتصير كابتن فنان،

بتحب تلعب بأدوات الطبيب يادكتوري المفضل مو مهم يطلع طفلك متل ماعم تتوقع المهم نظرتك اله ودعمك لاهتمامه، رح يكون أحد عوامل التفوق بتخصصه فيما بعد.

خامساً:

طباعة البصمة، حكيت عنها بالشكل السلبي الأسبوع الماضي، لكن نحن بالتأكيد عنا فرصة لطباعة بصمة إيجابية بأطفالنا

متل: أنت مابتستسلم بسهولة، بيعجبني اصرارك، انت لما تلعب كتير لطيف، بحب صوتك الرايق،

انت رهيبة بتكوين الصداقات، انت كتير لطيف مع اخوك الصغير،

بحب لما تسألني كيفك يالله انت شو حنون، بحب تركيزك لما تدرس كل ماعدنا هدول الجمل كل مازرعنا

هي الصفة الحلوة عند أطفالنا، وخلينا منتبهين نمدح الجهد مو الذكاء.

سادساً:

احترام مشاعره، لما منقدر مشاعر طفلنا منكون قطعنا مرحلة متقدمة بالعلاقة معه،

فلما نقله: معك حق كتير بيزعل لما تخسر اللعبة،

أوه هيك صار معك والله غريب، ييي سلامتك والله معك حق بتوجع، بصدقك كتير ملل أنه ماعم نطلع من البيت عنجد حتى أنا نفسي أخدك ونطير لمكان حلو،

مبروك فوزك باللعبة أو السباق، بتعرف لما كنت بعمرك صار معي نفس الشي وزعلت متلك،

عنجد حماس ينزل الابديت الجديد تبع اللعبة ضروري نحترم مشاعرهم ليحترموا مشارعنا.

 

سابعاً:

رفع معنويات، أي حدا ممكن يمر بلحظات صعبة او فشل أو عقبات مو سهل تخطيها، وجود أهل يرفعوا المعنويات

ويدعموا طفلهم بهي المرحلة الصعبة هو كالبلسم عالجرح،

فلما طفلي بيتأخر عن رفقاته بأمر ما، هو مو محتاج لوم بالعكس محتاج أهل يدعموا ويخططوا معه كيف ممكن يتخطى هي العقبة،

مثال: بنتي ليان كان عندها مشكلة حقيقية بمادة العلوم أول السنة وجابت علامة سيئة بأول امتحان، لما وصلتنا العلامة أنا وابوها فورا

قعدنا معها وقلنالها بتصير مو مهم انه نزعل مهم نخطط كيف فينا نرفع هي الدرجات، صار زوجي

يقعد معها كل يوم نصف ساعة وأنا سمعلها،

واشتغلنا مع بعض وفعلا ليان قدرت تجيب علامة شبه كاملة بباقي الامتحانات كل السنة، اللوم بيهد والتخطيط والدعم بيعدل وبيبني.

ثامناً:

التعزيز ورؤية الإيجابيات، الناس عادة بتشوف الشي الإيجابي متل الريشة صعب نحس بوزنها والشي السلبي متل الصخرة الي مخنوقين منها،

لو قلبنا المعادلة رح نعيش بسلام مع أطفالنا، فلما طفلي بيجيب ب٣ مواد علامات منيحة و٣ مواد

علاماتها موجدية خلينا نشكرهم على انجازهم وممكن نخطط للتقصير

وخلينا نحط هي النظارة اللي بتورجينا الأشياء الحلوة طول الوقت، متل: أنا فخور فيك وبإنجازاتك لليوم، شوف شلون قدرت تعمل الأحجية

لازم تكون كتير فخور باللي عملته، عجبتني لما رحت حفظت قرآن لحالك، انا كتير بنبسط لما بتحترم وقت الايباد ولما قلك خلص قيمة بتقيمة،

اليوم كتير ساعدتني الله يرضى عليك..ابحثوا عن الأمور الحلوة بتصرفات أطفالكم وقدروها لحتى تتكرر.

 

تاسعاً:

قدوة حسنة، نحن المنبع الرئيسي اللي بيتعلم منه أطفالنا كتير تفاصيل، لهيك لما منركز على تصرفاتنا وأقوالنا رح نزرع بدون عناء،

فلما يومي بينصرف بطريقة إيجابية وفيها إنتاجية، عم ازرع قيمة العمل والانجاز عند أطفالي،

لما بلعب رياضة وباكل صحي بالتالي أطفالي عم يشوفوا ويقلدوا،

لما بيشوفوني وقت أزعل ما بلجئ للسب او الشتم بس بقول لاحول ولاقوة الا بالله أو حسبي الله ونعم الوكيل،

رح يتعلموا التوكل على الله وتسليمه الأمور،

لما ما جيب سيرة الناس وبالعكس امدح حسنات من حولي رح خليهم يوسعوا دائرة النظر للأمور من حولهم، لما بعد عن العنصرية

بكلماتي وتصرفاتي وماقول هدا مابحبه لانه جنسيته هيك او دينه مو من ديني، رح ارحم طفلي من مرض العنصرية،

لازم ندرك انه تصرفاتنا عم يمتصوها وبعدها رح يطبقوها ورح يورثوها، فاانتبهوا لان تصرفاتكم عم تتكاثر.

 

عاشراً:

هو الحب والسعادة، ضروري نعبر لأطفالنا بشكل يومي عن حبنا اله وعن مدى سعادتنا لوجوده بيحاتنا، مثال: أنت حبيبي ، انت روحي،

انت نور عيوني، مين حبيبي أو مين روحي، تعال عطيني بوسة والله اشتقتلك كل اليوم مابستني،

وين عناقتي، يعني معقول صرلك ساعة ما عطيتني بوسة،

يخليلي هالوش اللي كل مابشوفه بصير سعيدة، ربي يخليلي حبيبي وروحي، لك انا بحبك قد الكرة الأرضية،

لا اكبر قد الكواكب كلها والمجموعة الشمسية كلنا منحب أطفالنا بس مو كلنا منعبر لهم عن هاد الحب.

 

النقطة 11:

حبوا اطفالكم بكلماتكم وبتصرفاتكم لا تبخلوا عليهم، مافي داعي تدفعوا مصاري ولا تشتروا شي بس طلعوا الحب اللي جواتكم وانطقوا فيه

ومالقيت أفضل من الختام بحديث عن رسول الله وآية من القرآن الكريم قال الرسول صلى الله عليه وسلم: الكلمة الطيبة صدقة.

وقال الله عز وجل بسورة آل عمران ايه 159( فبما رحمة من الله لنت لهم ولو كنت فظا غليظ القلب لانفضوا من حولك)

مين الواعي اللي رح يفهم الرسالة.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة

مقالات ذات صلة

زر الذهاب إلى الأعلى