الموسم الثاني

رحلة مربية الحلقة السابعة “الخطة ب” (فيديو)

رحلة مربية الحلقة السابعة “الخطة ب” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

مين فينا مابيوقع مين فينا مابيمرض مين فينا ما بتخلص طاقته تماما فا بينسحب من كل المهام اللي عليه.

حلقة اليوم كيف لازم تتجهزي للحظة اللي ممكن توقعي فيها.

رحلة مربية / الخطة ب

بسم الله نبدأ.

في البداية:

اليوم حابة شارككم وحدة من نقاط ضعفي واللي هي الشقيقة، الحمدلله رب العالمين انعم علي بصحة جيدة ولكن من أيام الثانوي بعاني من الشقيقة،

الشقيقة هي صداع نصفي شديد جداً بيخلني استسلم تماما وماعاد اقدر اعمل أي شي، مهما كان عندي مهام ضروري اني انجزها بكون عاجزة تماما

فتلقائيا بنسحب من حياتي كلها وبستسلم للظلام والاسترخاء لحتى يقدر يخف علي ونام لليوم التاني بفيق بجسم مكسر وكأني كنت بمعركة مع صداعي.

بالتأكيد لما بكون هيك تعبانة بشكل تلقائي ليان وعمر صاروا مسؤولين عن انفسهم وعن اخوهم سامي

طيب كيف عم تمشي الأمور وهل في ضرر كبير لما اتركهم لحالهم؟

هل أكلوا؟ وهل شربوا؟ هل لبسوا بيجاماتهم قبل النوم؟

هل وهل عشرات الأسئلة ممكن تخطر ببال أي أم بتتوقع أنه الانسحاب عن مسؤولية الأمومة رح ينتج مصيبة.

جوابي الكم انه يوم ليان وعمر لما بكون تعبانة وبغرفتي هو يوم سلس متل الأيام العادية اكيد بينقص وجودي معهم وتفاصيل كتيرة تانية.

لكن هنن قادرين ياكلوا ويشربوا ويغيروا ملابسهم ويدخلوا على الحمام، ويهمتوا بأخوهم سامي، بدون تدخل مني او من ابوهم.

والسبب أني جهزهتم مسبقا، كيف؟

 أولاً:

الروتين، وجود روتين يومي مع اطفالي خلاهم يحفظوا المهام اليومية اللي عليهم، فيومهم معي او بدوني ماشي.

ثانيا:

توضيح المسموح والممنوع، فليان وعمر بيعرفوا أنهم مايقربوا على الفرن أو يشعلوه أبدا.. ممنوع يطلعوا من غرفة وما يسكروا الضو اوالمكيف،

مسموح ياكلوا شي خفيف متل صاندويشة او بسكوت او شيبس او كورن فليكس ,, اهم شي ما يستخدموا مي سخنة أو سكين،

ثالثاً:

من أول سنين عمرهم بخلي أطفالي يعتمدوا على أنفسهم بقضاء أمورهم الشخصية، متل اللبس، ترتيب الألعاب، الدخول على الحمام، الاستحمام.

وحكيت بحلقة كاملة عن متى يستطيع الطفل تحمل المسؤولية بحلقة ٣٢ برحلة مربية الموسم الأول وفي معها جدول بيوضح عمر كل طفل

والمهام اللي لازم يتقنها رح ارفعها على صفحتي بالانستجرام فيكم تلاقوا اللينك تحت او ادخلوا على انستجرامي باسم wafagheibeh.

رابعاً:

الأكل ، من أهم الأمور اللي لازم تعلميها لطفلك هو كيف يتصرف بالمطبخ لحاله، يعني جهزيله درج خاص بكاساته وصحونه ومعالقه

انتبهي مايكون مرتفع ضروري يكون سهل يوصله علميه كيف يعمل ساندوتش لحاله، وانه هي عدة خطوات، يجهز الخبز واللبنة والمعلقة والصحن،

يدهن اللبنة وبعدين يرجعها ويسكر الخبز، ضروي يعرف كيف يصب مي لحاله او يعمل حليب مع كورنفليكس.. ادخلي بتفاصيل المهمة لحتى يقدر يتقنها،

فمثلا مرات الحليب بيكون مختوم علميه كيف يفتحه، واذا كان مليان خليه يقوي عضلات ايده لحتى يقدر يصبه بتوازن بدون مايكب، كل هي المهارات بتحتاج وقت ليتقنها فلا تتأخري بتدريبه.

خامساً:

اللعب لوحده، كل الأطفال بيحبوا يلعبوا مع أمهامتهم أو آبائهم وهي الخطوة هي المفتاح اللي رح يجهز الهم طريق الابداع والتخيل،

مشان هيك يوميا حددي ربع ساعة او نصف ساعة تلعبي معهم انت او ابوهم، وخلال هالجلسة علموهم كيف منلعب وكيف منتخيل أشياء مو موجوة

وكيف ممكن نعمل قصص وحكايا من شخصيات بسيطة ومضحكة، بعد ما يخلص الوقت المخصص بينكم قولوله انا عندي مهام تانية لازم اعملها، انت كمل لعب مع العابك.

وخليه يتخيل ويصرف وقت طويل باللعب، كل مرة بتعملوا هيك عم تخلقوا الابداع بتفكير اطفالكم ورح يكون جاهز يلعب لحاله وقت تنسحبوا.

سادسا:

التعامل مع أخوهم سامي، في مهارات ضروي يتعلمها الأطفال الكبار لما يجيهم مولود جديد طبعا على عمر الطفل بتكون المهارة المطلوبة،

بالنسبة الي ليان وعمر دربتهم كيف يحملوا سامي بشكل آمن، كيف يعملوله قنينة حليب، وكيف يلعبه معاه، شو الخطر عليه وكيف لازم نكون معاه بكل تحركاته،

بالنسبة لليان بتعرف اكتر بسبب عمرها ففيها تشربه حليب وتغيرله ملابسه، وحتى ممكن تنيمه، كل هي المهارت

بعلمهم ياها لاطفالي بشكل مبسط بالوقت الي بحسه مناسب وبدون ضغط لحتى يقدروا يتعاملوا معه لما كون منسحبة.

سابعا:

مهارة حل المشكلات، هي من المهارات الضرورية اللي لازم يتدرب عليها بشكل مبكر، لأن لما بتنسحبي لأي سبب هو

محتاج هي المهارة ليقدر يمشي يومه بشكل سليم وبعيد عن الكوراث  بالتأكيد في تفاصيل كتيرة كيف تخلي طفلك يكتسب هي المهارة،

فان شاء الله رح احكي عن هاد الموضوع بالتفصيل بالحلقة الجاية انتظروني

بالتأكيد لما كون منسحبة مارح أتوقع اطفالي يعملوا كل الأمور بأفضل طريقة، ضروري أتساهل بالقوانين وما أرفع سقف توقعاتي.. رح اتقبل النتايج أهم شي تكون بأقل الأضرار.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم

+966 55 257 9023

لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة

خمس فوائد وإيجابيات تقدمها بعض الألعاب لطفلكِ .. تعرٌَفي عليها !

مقالات ذات صلة

زر الذهاب إلى الأعلى