رحلة مربية الحلقة التاسعة والعشرون “كيف أحبب طفلي بالرسول محمد” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية.

مع الأحداث الأخيرة بفرنسا اللي الأغلب سمع عنها، حبيت أطرح موضوع رح يساعدنا مع أطفالنا وكيف فينا نزرع حبه بقلوبهم.

عن حبيبي ورسولي أتحدث فصلو عليه، بسم الله نبدأ:

حبنا لرسولنا:

لما نقول بأبي وأمي أنت يارسول الله يعني وصلنا لأقصى درجات الحب والفداء بكل مانحب ونملك، هي الجملة اللي بتعكس حبنا

وإخلاصنا لحبيب الأمة محمد صلى الله عليه وسلم ما أجت بيوم وليلة بل من بذرة طيبة انزرعت بقلوبنا من خلال أهلينا ومدرستنا ومجتمعنا،

بفضل من الله عز وجل ربيت بجو مسلم ومسالم، تعلمت أصول الدين من سنوات عمري الأولى،

لهيك تأصل حب الدين في قلبي وهذا من فضل ربي علي وربي يثبتني، وأعمل جاهدة لتوريث هذا الحب لأولادي.

طيب شو هي الخطوات اللي لازم نعملها لحتى نزرع بذره حب الرسول محمد صلى الله عليه وسلم بقلوب أطفالنا.

حب الرسول عند الطفل بيغطيه ثلاث أمور أساسية واللي هي:

أولاً :

المعرفة، ضروري الطفل يعرف سيرة الرسول محمد صلى الله عليه وسلم وكل الأحداث الصعبة اللي واجهها من أجل الدعوة.

ثانياً:

رؤية التطبيق العملي من الأهل والمجتمع للدين والسنن النبوية.

ثالثاً:

تطبيق أصول الدين والسنن النبوية من الطفل.

ورح احكي بالتفصيل عن كل أمر لحاله:

بالنسبة لمعرفة سيرة الرسول محمد صلى الله عليه وسلم، بتجي من عدة أطراف، المهم تراعي عمر طفلك

وقدرته على استيعاب المعلومة بالوقت الصحيح.

 مصادرة المعرفة كتيرة مثل:

(كتب السيرة، المدرسة، المسجد، حلقات تحفيظ القرآن، البرامج التلفزيونية، القصص المصورة،

جمعة الأهل الكبيرة أو الصغيرة، المقالات، والبحث بالإنترنت)

كل هدول المصادر مهمة وممكن الطفل يحققهم كلهم خلال سنوات عمره المختلفة

واجبنا كأهل نتأكد من تحقيق كم وحدة منهم مثل:

أولاً:

إلحاق الطفل بحلقات تحفيظ القرآن أسبوعياً.

ثانياً:

إحضار قصص تروي السيرة بطريقة سهلة وسلسلة

ثالثاً:

جمعة الأهل الصغيرة، ضروري الأب والأم يحرصوا على جلسة أسبوعية بعد صلاة الجمعة لو ربع ساعة،

يتحدثوا فيها عن السيرة النبوية وغرس حب الرسول بقلوب أطفالهم.

رابعاً:

عرض برامج تحكي عن السيرة النبوية طبعا نتأكد أنها بتناسب عمره مثل: مسلسل صدق رسول الله، أو مسلسل حبيب الله أو كرتون السيرة النبوية،

برنامج لو كان بيننا، برنامج على خطى الحبيب وطبعا بس تبحثوا بالانترنت رح يطلعلكم كتير برامج، شوفوها واختاروا الأنسب لعمر طفلكم.

بالنسبة للأمر الثاني واللي هو رؤية التطبيق العملي من الأهل والمجتمع للدين والسنن النبوية

بيعتمد على الأهل وتصرفاتهم اليومية، مثل تطبيق السنن اللي كان يقوم بها الرسول محمد صلى الله عليه وسلم، كالصلاة في المسجد،

وصلاة النوافل، التسبيح، الدعاء والذكر، وتطبيق الخلق النبوي في المواقف المختلفة، مثل عدم الغضب، تقبل الإساءة بالحسنة، والتصدق،

والحرص على النظافة والتطهر كل هي السنن والكثير غيرها ضروري لما الأهل يطبقوها يربطوها للطفل أنها سنن الرسول محمد صلى الله عليه وسلم،

أرجو الأهل أنهم مايبخلوا على أطفالهم بالمعلومات الخفيفة السريعة بأسلوب جميل لأن أثرها عميق وطويل الأمد.

مثال الأب بعد الصلاة بالمسجد يسبح بصوت منخفض، ابنه بجانبه يرى ويفهم ويحفظ، بعد مايخلص الأب ممكن يسأله، بتعرف حبيبي أنا

شو كنت عم أعمل بعد ما خلصت صلاة وسلمت؟ ممكن الطفل يقول لا، فا بيشرح الأب، هاد ياحبيبي من السنة

أنه بعد الصلاة لازم نستغفر وندعي ونقرأ آية الكرسي هاد الموقف كافي لزرع بذرة سليمة في نفس الطفل.

أما بالنسبة لنوعية الأصدقاء اللي الأهل بيجتمعوا معها، ونوعية المدرسة اللي مسجلين أطفالهم فيها، كل هدول الأمور الهم دور كبير

بحب الطفل للدين وللرسول، ولا تقلي أنا ببلد غريب مابقدر حقق هي الأمور، أنا بعرف مجموعة كبيرة من الأصدقاء عايشين بكندا وبريطانيا وأمريكا،

وكلهم حريصين على المدراس العربية والإسلامية وعلى الأصدقاء المتدينين والملتزمين، كل هذا ليحققوا بيئة مسلمة لأطفالهم،

فاللي بده رح يلاقي..لأنه عدم توفر بيئة مسلمة للطفل بالتأكيد رح ينجرف بسهولة ويبتعد عن الدين،

واجبنا كأهل الحرص على الأمانة اللي عطانا ياها رب العالمين ونخاف الله في أطفالنا.

تطبيق أصول الدين والسنة النبوية:

أما بالنسبة للأمر الأخير واللي هو تطبيق أصول الدين والسنن النبوية من الطفل بيكون بشكل مبسط بسنين عمره الأولى وبيتأصل كل ما كبر،

المهم هو الشخص البالغ اللي عم يساعده على تطبيق أصول الدين فلما يكون الطفل بالمدرسة والمعلم عم يعلم الأطفال كيفية الوضوء

ويصلي معهم صلاة الجماعة وبعدها يصلي السنة  هيك هو زرع صح، و لما الأب بياخد ابنه معه على المسجد بأغلب الصلوات

هيك هو زرع صح، لما بتروح الأم بتتصدق وبتكون معها بنتها أو ابنها وبتعطيهم المال ليتصدقوا بتكون زرعت صح تطبيق

هي الأمور من سنين الطفل الأولى رح تترك أثر جميل وعميق فخلينا نحرص عليها ونحققها بطريقة جميلة ولطيفة بدون ضغط أو إكراه.

كمان في عدة تطبيقات بتحكي عن السيرة النبوية بيقدر الطفل يحملها ويتفاعل معها متل the sira الموجود

باللغتين العربية والانجليزية أو تطبيق السيرة النبوية للأطفال.

تواجد هي التطبيقات لحتى يتفاعل معها الطفل بين وقت للتاني أمر إيجابي وأثره جميل.

الرسول محمد صلى الله عليه وسلم خط أحمر لكل المسلمين، أقل شي ممكن نعمله كمسلمين أنه نقوم بتطبيق السنن الي علمنا ياها

ونحكي لأطفالنا عنه وعن مسيرته العطرة، وعلى المشاهير تقديم محتوى يحي سيرته وننشرها لكل الأمم ليعرفوا من هو نبي الرحمة وخير البشر.

اللهم صل وسلم وبارك على سيدنا محمد وعلى آله وصحبه وسلم.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة