رحلة مربية الحلقة الثامنة والثلاثون “إدارة الأزمات اليومية” (فيديو)

وفاء غيبة ، فريق الموقع

السلام عليكم وأهلا وسهلا فيكم بحلقة جديدة من رحلة مربية

بعد عام ٢٠٢٠ اللي عشنا فيه كتير أزمات قررت أعمل حلقة اليوم لحتى سلط الضوء على أهم المهارات اللي منحتاجها لكيفية التعامل مع الأزمات الحياتية.

بسم الله نبدأ

رحلة مربية / إدارة الأزمات اليومية

في البداية:

مين منا مابيجيه ضغط بأيامه مين منا ما مر بأزمة كبيرة لخبطت قراراته، الحياة فيها مطبات كتيرة، ليس كل مايشتهيه المرء يدركه،

وهاد الشي عشناه بالعام الماضي مع أزمة كـ.ـورونا خلالها تعلمنا الصبر والانتظار والرضى والتعايش مع الظروف الصعبة لنقدر نكمل أيامنا.

بالتأكيد كان الوضع صعب على الجميع لكن في ناس تعبت أكتر من ناس بسبب طريقة نظرتها للأمور واختلاف مهارة التعامل مع الأزمات بين شخص وآخر.

طيب شو هنن النقاط اللي رح تساعدني أتعامل مع أي أزمة بمر فيها؟

أولا:

التركيز على الأهم، لما بتمري بأزمة ضروري تعرفي شو أهم شي لازم يصير لحتى يخلص هاد اليوم وأنت وعيلتك بخير،، اعملي

حساباتك صح ووجهي طاقتك لتعدي هي الفترة بأقل الأضرار، مثال: من فترة والدتي تعبت وأنا وقتها ماعد عرفت أعمل ولا شي حسيت

أيدي مربطة ومو قادرة أنجز أي أمر لكن أنا أم ومسؤولة من ٣ أطفال لهيك لازم ما أغرق بأزمتي، فطلبت أكل من برة وحاولت رتب أمور البيت

أنه يقعد فيه ليان وعمر مع أبوهم وأنا روح عند ماما ومعي سامي، شوية حسابات و ترتيبات خلت هديك الفترة

تعدي بأقل الأضرار والحمدلله بعد فترة ماما تحسنت والنتيجة قدرت وازن بين تعبها وبيتي بأقل الأضرار.

ثانيا:

اطلبي المساعدة، عادي نطلب المساعدة من الناس اللي حولنا، أهل، صديقة، أقارب، جيران، لاتستهيني بالدعم الكبير اللي ممكن

يقدمولك ياه لو طلبتي، لا تتوقعي أنك عم تثقلي عليهم، أنت بأزمة والناس للناس، ومابتعرفي الدنيا بتدور ويمكن هنن يحتاجوكي

ورح تكوني موجودة للدعم، الحمدلله أهلي وزوجي موجودين دائما للدعم، ولو بحتاج صديقاتي موجودين، هاد الشعور بيعطي الأمان الك

لا تتخيلي أنك الأمرأة الخارقة اللي لازم تعمل كل شي لحالها، لهيك لما تمري بأزمة اطلبي الدعم من الناس اللي بتحبك.

ثالثا:

لا تستسلمي للتوتر، الجسم بوقت الأزمات بيتعب وصعب يهدأ ممكن يصير في ارتفاع بالضغط وزيادة بنبضات القلب، وشعور بالتعب الجسدي،

لهيك لا تستسلمي لهي المشاعر، كوني عملية وفكري بالحلول والأمور اللي بتقدري تعمليها، وإذا عملتي اللي عليكي

خلي الباقي على رب العالمين، جسدك هو اللي رح يحملك لتعدي الأزمة فانتبهي عليه..

رابعا:

شيلي الحمل من قلبك، لحتى تقدري ترجعي تعيشي يومك، لازم تشيلي حمل الأزمة من قلبك، والطرق كتيرة إما تحاكي صديقة

وتفضفضيلها أو تكتبي أفكارك ومشاعرك بمذكرة، أو تعملي نشاط بتحبيه يغيرلك مزاجك، متل تلعبي مع أولادك أو تعملي

رياضة أو تطبخي أكلة بتحبيها، الخيار إلك المهم حاولي تشيلي هاد الحمل من قلبك بأي طريقة..

خامسا:

لاتزيدي الأمور سوء، خلال الأزمات أنت محتاجة تكوني قوية تفكري بصمت مو بصراخ وغضب، لاتحرمي حالك من الآكل والشرب

لأنك حتزيدي الأمور سوء إذا دختي أو وقعتي من الإرهاق، صح وقت الأزمات النوم صعب لكن بدك تحاولي تسترخي

بأي فرصة بتجيكي لتكوني مصدر دعم مو هم للي حولك.

سادسا:

كم من عشرة، بكل الأزمات اللي مرت علي كنت قول كم شدتها من 10 مثال: كان مفروض سافر على بداية السنة لكن المطارات

عنا سكرت بسبب تحور فايـ.ـروس كـ.ـورونا، لما بطلع على المبالغ اللي حطيناها للسفر والهدايا واللبس اللي اشترينا بقول شدة الأزمة 10 من 10

لكن برجع بفكر وبقول لو سافرنا وبعدها سكرت المطارات وماعاد قدرنا نرجع لبيتنا وزوجي عمله صار مهدد وبدئت مدارس الأولاد وكتبهم مو معي،

رح لاقي أنه شدة الأزمة نزلت ل ١٠ ل ٤ لهيك دائما احسبي شدة الأزمة من 10 وقارنيها لو صارت الأمور

أسوء رح تتغير حساباتك وتتغير نفسيتك ونظرتك للأزمة.

سابعا:

ضعي خطة للتعامل مع الأزمة، جيبي ورقة وقلم واكتبي هي الأمور تقييمك للأزمة، أسباب الأزمة وهل ممكن نتفاداها فيما بعد، الخيارات

المتاحة لحل الأزمة، مين ممكن يدعمني بالأزمة، مشاعرك الحالية، أمور بتساعدني أطلع من المشاعر السلبية،

مهارات أمتلكها رح تساعدني في حل الأزمة، مصادر مهمة في هي الأزمة

كتابة هي الأمور رح تساعدك بفهمها أكتر وتخليكي تحطي خطة واقعية وحقيقة لتخلصك أو تخفف من الأزمة اللي عم تمري فيها.

ثامنا:

الاستسلام والتوكل على الله، مرات كتير الأزمات مالها سبب، بتكون اختبار من رب العالمين على صبرنا وإيمانا،

لهيك لازم نستسلم لمشيئة الله

في كل الأحوال، بما أنه عملنا اللي علينا فمهمتنا خلصت دورنا هلأ نكسب الأجر بهي الأزمة بالقبول والصبر

والدعاء والصلاة والتوكل على الله.

الأزمات جزء أساسي في حياتنا، ودوام الحال من المحال، لذا لازم ننتبه شو الذكرى اللي تركتها هي الأزمة،

هاد الأمر بأيدنا لأن نحن منختار نتقبل

ونرضى ولا نعاند ونتعب ونأذي اللي حولينا..أطفالنا عم يستقبلوا مشاعرنا ويبنوا عليها أفكار وقيم، لهيك خلينا نحل أزماتنا بوعي وإيمان بالله.

هي نهاية حقلتنا لليوم بتمنى تكون عجبتكم.

ولتفاصيل حجز استشارة معي بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة