رحلة مربية الحلقة الثانية والعشرون "طفلي والمشاركة" (فيديو)

رحلة مربية الحلقة الثانية والعشرون “طفلي والمشاركة” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

الأسبوع الماضي استشارتني أم بموضوع مشاركة ابنها لألعابه وكم هي عم تعاني معه بهاد الموضوع،

اليوم بحلقة رحلة مربية، رح نتعرف على نوعية المشاركة المطلوبة من طلفك ومع مين وبأي عمر.

رحلة مربية / طفلي والمشاركة

بسم الله نبدأ

مشاركة ابني للألعاب مهارة بتطلب تطور بشخصية طفلي وطريقة تفكيره وتقبله للأمور كل هي الأمور بتحتاج وقت وجهد لتظهر هي النتيجة المتقدمة من السلوك،

بالتأكيد الأطفال بيختلفوا وممكن نلاقي بنت عمرها سنتين عم تقدم كل ألعابها للي حولها وماعندها مشكلة أنها تشاركهم المتعة،

هذا الأمر جميل بس كمان ممكن يكون أله عواقب متل أنه طفل يكسرلها لعبتها أو ياخدها وتختفي،

مشان هيك لو كان عندك طفل بيشارك العابه ضروري انك تضبطي الأمور وتعدي كم لعبة مع بنتك وتحرصي على ترجيعهم.

المشاركة أساس بحياتنا من سنين عمرنا الأولى لكن دور الأهل كبير بتقدير الأمور وعمل حساب لخصوصية أطفالهم ونوعية الألعاب اللي ممكن يشاركوها،

مشان هيك فيكي تعلمي طفلك المشاركة من خلال لعبة تلعبيها معه من صغره واللي هي، تقوليله هي التفاحة رح نتشاركها انا وانت،

أو الفشار هاد رح نتشاركه كلنا مع بعض، ممكن كمان تلعبي معاه بالالعاب وتوصليله مفهوم “دور دور”

دورك الك ودور الي، كل هي المفاهيم عم تترسخ بعقل طفلك لحتى يتقبلها بعدين بمواجهة موقف بيتطلب منه أن يشاركه ألعابه.

نحن جميعا منتمنى أنه أطفالنا يشاركوا الألعاب مع الأطفال اللي بيلعبوا معهم وبالطبع الأطفال الآخرين يشاركوا أطفالنا، لكن هل الضغط صحيح

أبداً لايمكن استخدام هاد الأسلوب لان فيه كمية من الاستهتار بمشاعر طفلك، وبكل بساطة انت بتحاولي معاه

واذا رفض بتقولي للطفل الاخر “أنا آسفة مارضي يشاركها يمكن يوافق بعد شوي”.

لكن في حال الام كانت مجهزة صندوق كبير اسمه ضروري تحاولي مع ابنك انه يشارك محتويات هاد الصندوق مع غيره،

خصوصي انك رتبتي كل الأمور مسبقاً وخبرتي اطفالك انه يحطو الألعاب اللي بيسمحوا بشاركتها مع غيرهم

وبالتأكيد هاد الصندوق متوفر دائما بغرفتهم وبيلعبوا بألعابه بشكل مستمر لأن اخفائه رح يخليهم يشتاقوا للألعاب ويرفضوا يشاركوها

لما يكون عند طفلي لعبة جديدة وغالية وهو متعلق فيها ممنوع أنه نضغط عليه وتخيلي انه زوجك عم يطالبك

تشاركي طقمك الألماس لزوجة صديقه، من حقك الكامل انك ترفضي اذا هاد كمان حق طفلك

من الأمور اللي بعملها لاختصر على حالي مشاكل المشاركة ببيتي هو اني بحط كل الصناديق اللي فيها العاب اطفالي اللي غالية عليهم بالمخزن وبقفل عليها،

صحيح الامر مو سهل لكن بالتأكيد سهل علي وعلى اطفالي كتير من المشاحنات،

أيضا بحدد الألعاب اللي فيهم يتشاركوها متل المكعبات التلوين والأوراق، الكرات البلاستيكية، الألعاب الجماعية اللي فيها كروت متل الأونو أو منوبولي،

بخفي تماما الألعاب اللي فيها حركة زايدة او خطر، لو في سيارة بشيلها لان كل ولد صغير بيجي رح ينبهر فيها ويطالب بركوبها وتبدأ المشاكل،

اذا فيه مرجيحة داخل الغرفة لازم كمان تنشال لان ممكن طفل يضرب الأطفال الاخرين لضيق المكان

يعني الألعاب اللي بس مخصصة لأطفالك وما بتقدري تضمني نتائج مشاركتها مع الأطفال الاخرين

شيليلها ولا تدخلي نفسك وطفلك بمعركة كان ممكن تتجنبوها.

ضروري جدا انك لما تروحي على بيت احدى الصديقات يكون طفلك معاه شنطة صغيرة فيها العاب ممكن يشاركها مع الطفل الي رح يقابله،

لان بدك تحطي ببالك انه الطفل صاحب المنزل رح يرفض يشارك طفلك، وانت لو حاولتي معاه ورفض لازم يكون عندك خطة بديلة واللي هي الألعاب اللي مع ابنك.

اكيد بكل بيت في العاب موجودة لحتى يتشاركها كل اولادك ومارح تجيبي لكل واحد وحدة منها، معناها هون لازم يكون في قانون احترام “دور، دور”

واللي مابيحترم هاد القانون بيواجه عاقبة سلوكه، الاخوات بينهم كتير العاب مشتركة فتقسيم الوقت رح يساعدك ويساعد اطفالك بمعرفة متى يأتي وقت مشاركتها.

اما الألعاب الخاصة اللي باسم الطفل منحاول جاهدين نقنعه انه يشارك اخوه ولكن بدون ضغط.. ومع الوقت واللطف بيوافق

أما بالنسبة لأولاد العم والعمة والخالة والخال واولاد صديقاتك جميل انه نحاول مع أطفالنا انه يشاركوا العابهم بس مانغصبهن لأن هاد حقهم.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912