رحلة مربية الحلقة الواحدة والعشرون “توقعات عالية من أطفالنا”(فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

مين استخدم هي الجمل من قبل؟ بدي ياك الأولى، بدي تجيب علامات كاملة، مابرضى إلا تفوز بالمبارة، نظف غرفتك كأني أنا نظفتها

أو أنت مستحيل تقدر تعمل هيك، أنت صعب تنجح بالجامعة!

هي التوقعات اللي منعيشها لأطفالنا إلها أثر سلبي إذا ما كانت موزونة بالطريقة الصحيحة.

لكن كمان الاستغناء عنها مو شي إيجابي طيب كيف نوازن بنوعية التوقعات اللي منعيشها لأطفالنا

بسم الله نبدأ

وجود توقعات موزونة من الأهل بيرسل للطفل شعور باحترام الذات وبتشجعه على النمو الصحي.. لكن لما تكون التوقعات مرتفعة

بشكل غير واقعي أو من ناحية أخرى منخفضة بشكل تنمر وسخرية بينعكس هالأمر على شخصية الطفل

وتدني إحساسه بالقيمة الذاتية نحن محتاجين وعي وفهم لنتيجة جملنا وتوقعاتنا وضروري نحقق التوازن لتعزيز النمو الصحي للأطفال.

طيب ماذا لو كانت التوقعات مرتفعة جداً؟

في كتير أهالي من لما بيولد طفلهم ممكن ياخدهم التفكير لعشرين سنة مستقبلية، ويبدوا يفكروا بكيفية الحياة اللي حايوفروهالطفلهم

وكيف رح يكون هو طفل ناجح وسعيد لأنهم رح يعملوا اللي عليهم.. وحتى لما يكبر طفلهم ويصير عمره سنة وأكتر ممكن يصيروا يحطوا توقعات عالية منه

مثال: لازم يلتزم بالقوانين! ماسمع كلامي مع أني شرحتله أكتر من مرة أنه مايعمل هيك! ليش مابيرتب الألعاب لحاله مفروض خلص كبر وفهم!

مابيعرف يلعب مع أخوه الصغير كم مرة لازم علمه! لازم أبداً مايوسخ ملابسه أنا علمته! كيف بينقص

بعلامة الرياضيات وأنا كل يوم كنت درسه! لازم يفوز بالسباق أنا حاطه بنادي!

هاد النوع من التوقعات العالية مابيتقبل أنه الطفل يخطأ أو يقصر أو يتأخر أو ينسى أثره سلبي

على الطفل ونفسيته وشخصيته وعلاقته مع من حوله.

في عدة دراسات انعملت على الأطفال اللي بيعيشوا توقعات عالية مع أهاليهم،، وكانت نتائجها سلبية لأن أحلام الأهل عن أطفالهم

تحولت إلى توقعات عالية جداً وغير قابلة للتحقيق وتؤدي إلى المبالغة في التركيز على الكمال بالتالي

رح يشعر الطفل بالعجز أو بالفشل إذا كان غير قادر على تلبية هي التوقعات أو ممكن يستسلم بسهولة ولا يصرف جهد بالتفوق.

لهيك ننتبه كتييير من هي التوقعات اللي مالها آخر، وحطوا نفسكم مكان أطفالكم أنا متأكدة أنه أنتو نفسكم

حطيتوا توقع ما عنكم وماقدرتوا تنجزوه، لهيك الرحمة على أطفالنا ولا نزرع المشاكل النفسية بإيدينا.

طيب ماذا لو كانت التوقعات منخفضة جداً؟

في المقابل في بعض الأهالي اللي توقعاتهم بتكون منخفضة جداً عن أطفالهم وقدراتهم وإنجازاتهم،

متل: ما بيفهم لسة صغير! شلون يعني يلبس لحاله مابيقدر! لازم أنا أكله دائماً بيوسخ! هاد أهبل شلون بده يجيب

علامة كاملة! طالع لأبوه كسلان! مابيعرف مابيعرف هاتي أنا بعملها!

ههـ يطلع رياضي هاد حطيه بس للأكل! مستحيل يصير دكتور خليه يعرف جدول الضرب أول! ابني فاشل أنا بعرفه يالله يقدر ينجح بالمدرسة.

مسكين الطفل اللي بعيش مع أهل هيك توقعاتهم هيك هاد الطفل اللي عايش مع أهل توقعاتهم منخفضة

أو شبه معدومة نتيجته انعدام الإحساس بالهدف والتوجيه في حياته صورة متدنية عن نفسه وعن إنجازاته.

بتأكد الأكاديمية الأمريكية لطب الأطفال أن الطفل بيحتاج إلى دعم وتشجيع ووضوح بالأهداف في حياته

ليقدر ينجز ويبدع ويتطور شعوره الصحي نحو نظرته لنفسه واحترامه لذاته.

لأن عواقب التوقعات المتدنية أو المنعدمة هي طفل غير متحمس لإنجاز أي شيء محطم، حزين، مهزوز الثقة بالنفس،

علاقة سيئة مع أهله وقد يبحث عن نظير أو شخص بالغ آخر لمنح حياته إحساساً بالهدف و الأهمية.

مشان هيك خلينا نفكر ألف مرة قبل ما نستهتر ونحطم أطفالنا لأن الأثر مكلف جداً.

طيب شو التوقعات الصحية؟

المطلوب من الأهل قبل إظهار التوقعات هو توفير البيئة المناسبة للتربية والتعليم، توضيح القوانين والروتين في المنزل، توفير الحب والحزم،

زرع القيم والأخلاق، تطوير المهارات الأكاديمية والرياضية والاجتماعية والخطابية البحث عن نقاط القوة لدى طفلهم

والحرص على تربية سليمة بعيدة عن ردود الفعل السريعة والغاضبة

هيك فينا نقول الطفل عم يعيش بيئة صحية موفر فيها الأساسيات التي بيحتاجها لينمو بشكل طبيعي وصحي.

بعدها منبدأ منشوف طفلنا وين محتاج دعم بشو محتاج تأسيس وكيف ممكن نطور النقص اللي عم يواجهه، فمثلا الطفل البطيء بالقراءة

توقعات الأهل أنه يقدر يقرأ على صف أول أو ثاني ابتدائي، طيب طفلي صار ثاني ولسة قراءته متأخرة عن اقرانه مع أنه سليم وماعنده مشاكل صحية،

الطفل محتاج دعم عملي!

إذاً هو هون محتاج دعم عملي في التأسيس مثل إيجاد معلم خصوصي أو تخصيص وقت من الأهل لتدريسه

أو إشراكه بدورة مكثفة للقراءة نبحث عن الأنسب وندرس فوائده ونوفره.

هيك نحن حققنا المعادلة الصحيحة تربية صحية توقع صحي دعم وتشجيع للإنجاز.

عادي بعض الأمثلة لتوقعات صحية: طفلي بعمر السنة بيفهم كتير أمور لهيك رح احكي معه

واشرحله بس مارح أتوقع انه يطبق المهم استمر لأنه فجأة رح يصير يطبق.

طفلي بعمر السنتين متوقع أنه يعرف يطلع على الدرج لحاله، بس هو مو قادر رح عمله مرة ومرتين

وعشرة وعشرين وشجع وادعم وما مل لأنه متوقع أنه هو صار يعرف.

طفلي بعمر الخمس سنوات متوقع منه يعرف بعض الحروف لكنه مابيقدر يميزها أبداً، بوفر الوسائل المناسبة وبتعلم كيفية تعليم

أصوات الحروف وأنه ماقدمله أكتر من 3 حروف حتى يتقنهم بقدم الباقي، هيك رح حقق توقعي بشكل عملي وبدعم وتشجيع.

طفلي عمره عشر سنوات بتوقع أنه يرد على المتنمرين، الأطفال بتختلف والرد على المتنمر أشبه بالمستحيل،

لهيك بتدخل أنا وبساعد طفلي وانا حكيت عن هاد الموضوع بتوسع بحلقتين بالمسوم الأول من رحلة مربية.

طفلي عمره 14 لازم يعرف يطلب من حدا مساعدة لما يحتاج، هاد التوقع مرتبط بكيفية التربية اللي اشتغلنا عليها السنوات الماضية

ومدى تعزيز الثقة بالنفس وتربية طفل متوازن وصحي، فلا نحكم على التقصير بل نبحث عن الخلل وندعم.

تحديد توقعات صحية للطفل لاهي منخفضة جداً ولا عالية جداً إلها أثر جميل على الطفل ورح تساعده على المنافسة الصحية بين أقرانه

والشعور الصحي بقيمة الذات، التوقعات الصحية  بتسمح للطفل بالقيام بعمل جيد وبجهد عالي دون الضغط عليه.

والتوقعات الصحية بتنمي الأمن والأمان والسلام والثقة في العلاقة مع والأهل.

التوقعات الصحية بتكسبه الشعور بالاستقلالية والمسؤولية!

الأهل محتاجين يكونوا على دراية بنوعية التوقعات اللي عم يطالبوا فيها أطفالهم، وحتى بتشمل قبول الأخطاء على طول الطريق في مسيرة التربية،

لأنه تقبل خطأ طفلك وتعليمه كيفية تصحيحه رح يساعده يفهم النكسات والعقبات اللي في الحياة وأنها

جزء طبيعي لازم نمر فيه بس أكيد مع الوقت عم تنمو مهارات كيفية التعامل معه.

في النهاية!

بالختام لتوقعات ناجحة ابحثوا عن مكامن القوة عند أطفالكم  ووفرولهم بيئة تشجع هي المواهب وتغذيها.. لما يكون في توقعات

في مجال قوة طفلك اللي هي بالمكان الصحيح رح  تأهل طفلك للنجاح والتفوق.. لكن كمان لا تعتمدوا مية بالمية عليها لأن ممكن

كل فترة يتغير الطفل واهتمامته ونقاط القوة عنده خلوا التوازن شغال بالبحث عن نقاط القوة بين المواهب والمهارات الحياتية

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة