رحلة مربية الحلقة العاشرة “الطفل الغاضب” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية.

اليوم راح احكيلكم عن واحد من المواضيع اللي بقدمه بدوراتي واللي هو الطفل الغاضب، راح اشرحلك كيف تطوري مهارة طفلك ليتحكم بغضبه وكيف تتعاملي معه وقت نوبة الغضب.

بسم الله نبدأ

شعور الغضب هو شعور طبيعي ممكن يجي للكبار وكمان للصغار، ضروري جداً أنه انت كأم تتقبلي مشاعر طفلك وتتفهمي سبب غضبه،

وخلال اليوم لما يكون هادي ورايق عندك مهمة تدريبه على التعامل مع غضبه من خلال النقاط التالية:

قبل كل النقاط اتذكري انه طفلك مرايتك فلحتى تعلميه كيف يضبط اعصابه وقت الغضب ضروري تكوني انت قادرة على ضبط اعصابك وقت غضبك،

حكيت بالحلقة الأولى من رحلة مربية عن 4 تقنيات بتساعدك لتسيطري على غضبك.. ضروري تحضريها

احكي لطفلك عن شعور الغضب انه هو واحد من المشاعر اللي بيحس فيها الانسان وانه هو شعور طبيعي ولابأس بما يشعر به، لكن لازم نعرف شلون نتعامل مع هي المشاعر

مهم جداً أنه طفلك يعرف مسميات المشاعر والفرق بينها متل: “أنا حزين، أنا فرحان، أنا غضبان، أنا متحمس”

فيكي تساعديه يتعرف اكتر على الفروقات بين المشاعر من خلال القصص اللي بتحكي عن المشاعر ومن خلال المواقف اليومية ومشاعره نحوها.

ابحثي عن نقاط القوة اللي عند طفلك، ادعميه وساعديه لحتى يتطور فيها مثلا لو كان طفلك عنده مهارة اللعب بكورة القدم

ساعديه على تطوير هي المهارة لانها راح تشتغل بشكل إيجابي على نفسيته وثقته بنفسه وهيك عم نشتغل بطريقة غير مباشرة على التحكم بالغضـ.ـب

بجلسة رواق احكي مع طفلك عن كيفية التعامل مع غضبه وكيف يواجهه،

مثل: “كيف يتنفس من أنفه بهدوء، يحاول يعد للعشرة، ممكن يغير مكانه، ممكن ينفس عن غضبه بالقفز، الركض، الرسم على ورقة”

متل ماحكيتيله عن المسموح عمله وقت الغضب ولازم تشرحيله الغير مسموح، مثل: مهما كنت معصب مو مسموحلك ابدا انك تضـ.ـرب حدا او تكب الأشياء من مكانها..

استمري بتذكيره ودعمه لحتى يتغلب على مشاعره ويقدر يضبطها..

وقت نوبة الغضب شو لازم تعملي؟

بنصحك بالآتي:

حطي ببالك انه وقت نوبة الغـ.ـضب طفلك راح يتصرف بطريقة غير المعتادة فلا تتوقعي يكون مستمع جيد او انه ينصاع لأوامرك

استخدمي تقنية “تراجع، مراقبة، قرار” اللي شرحتها بكتابي، واللي بتعطيكي فرصة انك ترجعي شوي وتوقفي لثواني تراقبي الموقف لحتى تفهمي شو صاير وبعدها قرري شو التصرف الأنسب.

حاولي انك تتفادي التدخل بشكل سريع وتعطي قرار وانت مو فاهمة اللي صاير

اذا كان في شيء ممكن يأذيـ.ـه بعديه فوراً عنه

كوني حذرة وقت الاقتراب منه لأن ممكن طفلك يرفـ.ـس او يضـ.ـرب أو يعض.

لا تحاولي تعلي صوتك لان ماراح يسمعك.

قوليله الكلمة السحرية “أنت زعلان لان بدك : مثلا تطلع مشوار هلأ؟

طفلك راح يهدى لما يعرف انك فاهمتيه وحاسة فيه مباشرة قوليله سبب عدم خروجك هلأ وعطيه موعد تاني او بديل لطلبه..

قولي له إذا ما تجاوب معك “انا بقدر اسمعك لما تحكي معي، بس تخلص بكا انا جاهزة اسمعك ليش زعلان”.

انسحبي بهدوء وأنت عم تقولي: “انا بسمعك اذا حاكتيني ووطيت صوتك انا اسفة لما تصـ.ـرخ صعب اسمعك“.

خلال نوبة الغضب لا تشحنيه بتعليقات سلبية أو تنهدات غاضبة. متل : انت بتعـ.ـذب، او صوتك مزعج

بعد هيك اذا ما استجاب استخدمي تقنية (التطنيش) الكاملة كأنه ماله موجود ولا سامعة صرخاته

وتفادي أي تواصل معه، لان أي كلمة او نظرة رح تشحنه وتخلي يصرخ لوقت اكتر

بعد فترة رح يهدا وبالتأكيد رح يجيكي قولي له مباشرة أنا كتير بحب لما تزعل تقول انك زعلان بدون ماتصرخ

انا بقدر اسمعك وساعدك، انت كبرت وبتقدر تحكي، عطيه بدائل للصـ.ـراخ كوني سريعة وواضحة،

وبعدين قولي له أنه رح يصير الشي اللي هو بده ياه تحت الشروط اللي انت بدك ياها أو أنه مارح يصير اللي بده ياه مع تفسير السبب.