رحلة مربية الحلقة الثالثة عشرة “تربية التوأم الجزء الأول” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية.

اليوم الحلقة موجهة لكل أم بحب أوصفها سوبر ماما واللي هي أم التوأم أو التوائم، بدي أول شي أشكر صديقاتي دانيا ام لتوأم ولد وبنت.

هند أم لأربعة توائم  اللي ساعدوني لحتى تكون الحلقة مليئة بالمعلومات الواقعية من خلال تجربتهم.

بسم الله نبدأ

التوأم الكلمة اللي بتلفت نظر الجميع، لا يمكن يمرق جنبك توأم الا وتأشري عليهم وتقولي ماشاء الله ربي يحميهم،

لأنهم فعلا مميزين، اليوم بدي أحكي عن أهم الأمور اللي ضروري كل أم توأم تعرفها وبحاجة الها.

أولاً:

الحمل، خلال فترة الحمل الأم ممكن تتوتر وتشيل هم جسمها اللي رح يتغير، بقلك لا تفكري بالموضوع او تعطيه أكبر من حجمه لأن بعد الولادة

فيكي وبشوية تركيز تستعيدي وزنك متل ماصار مع رفقاتي، وهاد غير انه توأمك رح يحرص انه يخليكي تشتغلي فيهم وتحرقي حريرات كتير.

بالنسبة لصحتك بالحمل ضروري انك تراجعي طبيبك على الوقت، ولا تتهاوني بموضوع فيتاميناتك وأكلك الصحي.

ثانياً:

الحالة المادية، كتير أهالي بيفكروا بموضوع تغير حالتهم المادية بعد ولادة التوأم، بالتأكيد ضروري الواحد يعمل حسابه

ولكن لا تنسوا أنه رب العالمين قال بكتابه الكريم (نّحْنُ نَرْزُقُهُمْ وَإيَّاكُمْ) مشان هيك لا تخلوه هم يخرب عليكم الاستمتاع معهم.

ثالثاً:

كوني جاهزة مسبقاً لاتخلي الوقت يسرقك، فترة الحمل الطويلة رح تعطيك وقت لتتجهزي نفسياً وثقافياً، وبالتأكيد جهزي أغراضهم كاملة،

“أسرة، لبس، عرباية، كراسي سيارة، رضاعات، لهايت، ملابس” بس انتبهي لاتجيبي زيادة عن اللزوم.

رابعاً:

المجتمع، النصيحة اللي سمعتها من رفقاتي أمهات التوائم، انك ماتسمعي لأي حدا، كتير ممكن تواجهي ناس سلبيين ويخوفوكي ويحسسوكي ان الوضع رح يكون سيء جداً،

انتبهي لان اذا فكرتي بهي الطريقة مارح تقدري تنجزي شي الا وانت تعبانة، “عيشي يوم بيوم” ولا تفكري كتير شو حيصير، وخلي بكرة لبكرة،

وحطي ببالك الأمور اول الأيام رح تحتاج منك لتركيز وجهد أكبر بس صدقيني أنه “الأمور مع الوقت رح تصير أفضل وأسهل”.

خامساً:

الولادة، حددي مع طبيبك شو الأنسب لحالتك الصـ.ـحية هل الولادة الطبيعة ولا القيصرية، وتوقعي انه الأمور ممكن تتغير بيوم الولادة

وبدل ولادة طبيعية تصير ولادة قيـ.ـصرية، فا في كتير أمهات بيختصروا على حالهم آلـ.ـام المـ.ـخاض والتفكير الكتير وبيقرروا ولادة قيـ.ـصرية لوضوح موعدها والأحداث اللي فيها.

سادساً:

طلب المساعدة، الحمد الله على السلامة رجعتي على البيت بعدد أفراد أكبر، الأفكار اللي رافقتك خلال حملك صارت واقع، بدأت المهمة الكبرى،

خلال هي الفترة ضروري جداً أنك تكوني جهزتي حدا يساعدك وأياكي تقولي مابدي تعـ.ـب حدا معي، أول انسان لازم يكون معك ويدعمك هو زوجك،

ضروري ياخد إجازة من شغله ويرافقك بهي الفترة، إن كانت ظـ.ـروفك المادية بتسمح تجيبي وحدة تساعدك أرجوكي لا تتأخري ولا تقولي مابدي خصوصيتي تروح، وبالتأكيد لا تستحي تطلبي من أهلك او رفقاتك.

لا تحملي نفسك اكتر من طاقتك، اول شهر هو الأصعب مشان هيك اطلبي المساعدة ولا تترددي، صحيح ممكن تلاقي بعد فترة الناس خف حماسها

للمساعدة بس لامـ.ـشكلة قد مابتقدري تمرقي وقت لحتى انت تتعودي وتفهمي شو بدهم، ويزبط نومهم شوي.

سابعاً:

النوم، اكيد ساعات نومك راح تقل وراح تكون متقطعة، اول شي حطي ببالك انها فترة والأمور رح تتحسن سريعاً،

ومتل مااتفقنا انه حدا يساعدك ويعطيكي وقت لحتى تقدري تنامي، بعد كم شهر رح ينتظم نوم اطفالك ورح يناموا من 4 ل 6 ساعات وبالتالي نومك راح يزيد.

ثامناً:

الرضاعة، هل بتقدري ترضعي اول لا، هاد قرار بيرجعلك ولظـ.ـروفك، اكيد الموضوع بيحتاج قوة وصبر، بنصحك تجربي حالك وتحاولي اكتر من مرة مشان ماتقولي ياريت بعد فترة،

فيكي تستخدمي آلة شفط الحليب الإلكترونية رح تساعدك كتير، لكن اذا لقيتي الموضوع في ضغـ.ـط نفسي وجسدي اكيد بنصحك تستبدلي بالرضاعة الصناعية،

ولا تنسي أهمية اللهاية لان في كتير مرات اطفالك مابدهم يرضعوا وعم يبـ.ـكوا، اللهاية رح تساعدك كتير، وانا بنصح كل ام فيها خلال الستة شهور الأولى للطفل.

وأخيراً بالنسبة للرضاعة اذا ماقدرتي ترضعيهم الا صناعي لا تشغلي نفسك كتير بالموضوع لان صدقيني الأيام جاية ورح تقدميلهم كتير،

واياكي تسمعي كلام الناس اللوام، جسمك ونفسيتك اهم شي بالدنيا.

الكلام ماخلص مشان هيك لاقوني الأسبوع الجاية ورح نكمل موضوعنا المميز بتفاصيل بتهم الأم لما يبدوا يكبروا شوي توأمها.

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912