رحلة مربية الحلقة السادسة والعشرون ” تدريب الطفل على دخول الحمام” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

من المواضيع اللي كتير بتجيني عليها استشارات هو تدريب الطفل على دخول الحمام،  كتير أمهات بيخافوا وبيشيلوا هم هاد الموضوع

واذا مانجح مباشرة بيقولوا انهم فشلوا، بالعكس تدريب الطفل على الحمام ممكن نخليه مرحلة حلوة وبعيدة عن التوتر والعصبية اذا اتبعنا الخطوات التالية.

بسم الله نبدأ

لحتى نوصل لهدفنا ضروري نمشي بالطريق الصحيح ونصبر على النتائج لحتى ترضينا، للأسف تدريب الطفل على الحمام ممكن يكون مرحلة مؤذية للطفل

وبيتضمنها صريخ وضرب وحرمان، وممكن يمرق بسهولة ويكون مرحلة إيجابية وفخر لطفلك بإنجازة، دائما الخيار بين أيدينا بس نحن نختار صح.

ولتكون المرحلة إيجابية

أولاً:

لازم تختاري وقت تكوني انت جاهزة ورايقة لأنك محتاجة تتفضي لهي المهمة، وما تكوني مرتبطة بعمل لساعات طويلة أو سفر قريب.

ثانياً:

اختاري وقت يكون البيت فيه دافي ومو بارد لحتى يلبس طفلك لبس خفيف أو يغير بسهولة اذا بلل نفسه..متل بداية الربيع او الصيف.

ثالثاً:

لا تبدي تدريب طفلك اذا ما صار عمره سنتين ونص او ثلاثة، لان التحكم الجسدي صار أقوى وتعبيره اللغوي صار أوضح .

وهي  نقطة جوهرية، لان كتير أمهات بيستعجلوا بتنظيف أطفالهم، وناسيين مدى صعوبة اتقان هي المهارة بالعمر الأصغر

من هيك لا تخلي المجتمع يضغط عليكي وقصة صديقتك او قريبتك اللي اتقن ابنها المهارة بعمر سنة.

رابعاً:

ابدئي التجهيز قبل مرحلة التدريب، يعني ممكن تبدي تشوفي مؤشرات من طفلك متل انه يخبرك انه عمل بالحفاظ او رح يعمل او يطالبك تغيرليه الحفاظ لانه قرفان،

ممكن يستيقظ الصباح والحفاظ فاضي هاد دليل على تطور قدرة الجهاز البولي عنده.

خامساً:

ابدي عوديه قبل بفترة على استخدام الحمام، مثل لما يوسخ الحفاض، جلسيه على كرسي الحمام واستخدمي الشطاف للتنظيف

لما يوسخ الحفاض برقم 2 ورجيه انه فينا نكب المحتوى بكرسي الحمام ونكبس الفلش لحتى تروح،

وقوليله هي مكانها هون وانت لما تجهز بتصير هو بتقعد وبتساوي حمام، وهيك انظف وبتروح الريحة تماما

سادساً:

جيبي لعبة ممكن تعبيها مي وتعمل حمام، واشرحيلي شوي شوي عملية دخول اللعبة على الحمام.

سابعاً:

استخدمي القصص الموجودة على اليوتوب بعد ماتكوني شفتيها وحددتي انها مناسبة، ممكن توفريله قصص ورقية من المكتبة او تستخدمو الرسم للتوضيح وسرد قصة.

ثامناً:

احكي لطفلك قبل البدء بالتدريب بشكل جميل كيف انه كبر وانه هو كمان رح يصير يدخل على الحمام متل ماما وبابا واخواته او الناس اللي بحبهم

تاسعاً:

اشتريله ملابس داخلية جذابة تحمسه للبسها، وممكن يختارها معاكي

عاشراً:

يوم البدء وبعد تفرغك التام لطفلك حضري مكان جلوس قريب من الحمام وفري فيه مكان للعب وطاولة عليها الفواكه والماء والعصير، ضروري انك تساعدي طفلك تمتلئ المثانة تبعه.

النقطة 11:

لبسيه ملابس خفيفة ممكن بلوزة بس والملابس الداخلية الجديدة

النقطة 12:

ابتعدي عن التهديد او الصراخ او اللوم، شجعي وحمسي ووقت الحوادث قوليله معليش شوي شوي رح تقدر انا متأكدة..صفقيله واعطيه اجمل تعابير الوجه لما يقدر يعمل لو كمية بسيطة، وحطي ببالك انه هو بهي اللحظات خايف ومتوتر فلا تزيده همه هم..

النقطة13:

استعيني بجدول للتعزيز وتسجيل كل مرة بيدخل فيها على الحمام، واياكي استخدماه للنقد، هاد فقط للتعزيز ومشاركته مع الاب عند عودته ليدعم ويشجع..

النقطة14:

حطي ببالك انه اول يوم ممكن طفلك ماينجز شيء، لابأس فانت جاهزة ومستعدة لمدة أسبوع، مشان هيك لا تستعجلي

النقطة15:

لما تبدي تشوفي انه طفلك بدا يستوعب وينجز لا تعتمدي عليه انه يتذكر لحاله لمدة من الزمن، مشان هيك ذكريه اكتر من مرة، ولو نسي ووسخ نفسه لا تلوميه وقوليله، شكلك نسيت انه لازم نروح على الحمام، المرة الجاية ان شاء الله بذكرك وبتروح

النقطة16:

وفري معك ملابس بشكل دائم، لا تخلي المشكلة تصير كبيرة لانه وسخ ومافي بديل، بشنطة ايدك بتوسع ملابسه

النقطة17:

فيكي تحمسي طفلك يدخل على الحمام اول فترة بانك تحطي بالمي اللي بكرسي الحمام الوان طعام وانه لما رح يعمل حمام رح يتغير لون المي مثل تحطي لون ازرق رح يصير اخضر.

النقطة18:

اياكي وارجاع طفلك للحفاض اذا الحوادث كانت متكررة، ابحثي عن السبب وادعميه لحتى يصير ماهر بضبط نفسه.

مرحلة انتقال الطفل من الحفاض للملابس الداخلية مهمة جدا بحياته، ارجوكي لا تخليها مرحلة صعبة وبذكرى سيئة.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912