رحلة مربية الحلقة الثانية والأربعون ” 16 خطوة لتجهيز طفلك الكبير لاستقبال المولود الجديد” (فيديو)
وفاء غيبة ـ فريق الموقع
أهلا وسهلا فيكم بحلقة جديدة من رحلة مربية
ضيف جديد عالعيلة، معناها تحديات جديدة، من أكتر الأسئلة اللي بتجيني هي شو أعمل مع ابني الكبير عم يغار من أخوه المولود الجديد،
ابني ضرب أخوه الصغير كيف خلي ابني يفهم اني بحبه هو وأخوه متل بعض، كيف وقف الغيرة عند طفلي الأكبر.
رحلة مربية / تجهيز الطفل لاستقبال المولود
بسم الله نبدأ
مبارك!
مبروك ولدتي وصرت أم لطفلين، طفلك الجديد البريء الضعيف اللي محتاجك بكل فترة لحتى يقدر يعيش أخد وقتك وطاقتك لدرجة انك انغمستي بالمسؤوليات والحياة الجديدة،
وبدا يظهر تقصيرك مع ابنك الأكبر اللي فجأة صرتي تنظريله نظرة “انت كبير” وحاجتك الي قليلة، مع أنه بهي الفترة هو بأمس الحاجة لألك.
شفت أمهات بتخف مسؤوليتهم تجاه أطفالهم اللي بعمر 3 او 4 او 5 بمجرد ماصار عندهم اخ او اخت اصغر لكن الواقع طفلك رح يضل طفل لحتى يوصل لمرحلة ال12 سنة،
ومافيكي تنسحبي من مسؤوليتك اتجاهه ودعمه ولا يوم صحيح قدراته أعلى من المولود لكن هو مو مضطر انه يتحمل مسؤوليات عنك انت او عن ابوه،
هو ممكن يساعد، يجيبلك أغراض ولكن ابتعدي عن نظرة أنه هو كبير ومستقل وابتعدي عن تحميله مسؤولية اخوه الأصغر
حبيت ابدأ بهي النقطة الأساسية لأن بمجرد تصديقك الها ، رح تقدري تجهزي طفلك الأكبر لاستقبال اخوه او اخته
بطريقة صحية وتكوني مسيطرة على الوضع وتكسبي نفسية طفلك بأقل الأضرار.
طيب كيف جهز طفلي لاستقباله اخوه او اخته؟
التجهيز بيبدأ خلال شهور حملك وليس بعد الولادة.
أولاً:
توقعي مع تجهيزك لطفلك أنك تشوفي تصرفات غيرة، لكن تجهيزك الصحيح رح يخليها أخف ولوقت قصير
ثانياً:
طريقة اخبار طفلك بانكم بانتظار فرد جديد بالعائلة خليها لحظة حلوة ويكون هو رايق مو نعسان ولا جوعان،
ممكن تستخدمي الرسم ليساعدك بالشرح، ممكنت ترسمي افراد العائلة وبعدين طفل صغير عند بطنك.
ثالثاً:
كوني واقعية وصريحة، لا تقوليله رح يجي اخ او اخت تلعب معه، لان بالواقع اللي رح يجي طفل بس بيبكي وبيرضع
ومو قادر حتى يقعد فكيف رح يلعب معي.. كل ماكنتي واقعية ومعلوماتك حقيقة ابنك تقبل الموضوع.
رابعاً:
لا تجيبي ابدا هدية وتقوليله هي من اخوك او اختك، لانها مو حقيقة، وطفلك رح يدرك الموضوع لو فيما بعد فلا تهزي ثقته فيك البديل انك تجيبي له هدية انت وابوه لأنه صار اخ اكبر.
خامساً:
جهزي مجموعة فيديوهات وصور لطفلك الأكبر من ولادته لحتى صار بالعمر الحالي، ورجيه كيف كان شكله لما ولد وربطي مباشرة
انه الطفل الصغير رح يجي هيك صغير ورح يكبر شوي شوي، حطي ببالك بعض الأطفال بتكون ردة فعلهم البكاء وبيرفضوا شكلهم لما كانوا صغار،
وهاد امر طبيعي لا تضغطي عليه ورجيه العمر الأكبر، اهم شي توصليله فكرة انه حتى هو كان صغير وكبر.
سادساً:
من الفيديوهات الجميلة اللي لازم تبحثي عنها لوحدك بعدين تشاركيها مع طفلك، موجودة باليوتيوب لأطفال عم يشوفوه اخوهم او اختهم لأول مرة بالمستشفى،
وكيف ردة فعلهم بتكون حلوة، للأسف المحتوى العربي ضعيف جدا فاحتضطري تبحثي بالانجليزي.. وبالطبع اربطي مع طفلك انه هيك انت رح تجي وتشوفه بالمستشفى.
سابعاً:
جهزي لطفلك كنزة مطبوع عليها اسمه وجملة “الأخ الأكبر” وللطفل الصغير ممكن تطبعيها على الردادة أو الافرول، حسب اللي بتقدري تعمليه.
انا عملتها مع ليان وقت ولادة عمر وهالمرة طبعتها على وسام بينحط على صدرهم بيلبسوها يوم الولادة، هنن والمولود الجديد.
ثامناً:
ارسمي لطفلك مربعات وحطي المدة المتبقية للولادة، وخليه يشطب على كل يوم بيمرق،
وفيكي تتابعي أسبوع بأسبوع مع اطفالك على تطبيق babycenter اللي بيشرحلك حجم الجنين أسبوع بأسبوع.
تاسعاً:
القصص، من أهم النقاط اللي لازم توفريها لتجهيز طفلك، هي القصص، موجود بالمكتبات قصص جميلة عن الأخ الأكبر او مولود جديد بعائلتنا،
واذا مالقيتي اخترعي قصة من الألعاب الوبرية اللي عندك، وفي قصة بحبها بالانجليزي، موجودة على اليوتيوب اسمها
zaza’s baby brother حاولي تحضريها مع طفلك.
عاشراً:
اشرحي لطفلك الاحداث اللي حاتصير لما تكوني جاهزة للولادة، وين رح ينام ومع مين، ضروري تكوني رتبتي هي الأمور مسبقاً
النقطة 11:
بعد الولادة لازم تعرفي انه قرار نومك عند اهلك اله ميزات وسيئات، صحيح رح ترتاحي وامك تساعدك لكن بالمقابل طفلك الأكبر بعد عن مكان رحاته،
واذا قررتي تنامي ببيتك واللي بالنسبة الي على الصعيد الشخصي بيناسبني لان طفلي الأكبر موجود بمكان راحته بسريره والعابه،
كل هالامور رح تسهل عليه هي الفترة، بالتأكيد ممكن يزيد التعب علكي ولكن المكسب كمان كبير لطفلك الأكبر.
النقطة 12:
فرحة اللي حولك بالمولود وحماسهم للملاك الصغير طبيعية، راقبي نظرات طفلك الأكبر وعرفي انه عم يشوف ويسمع كل شي،
مشان هيك بدك تعوضي أنت وأبوه لازم توزعوا الوقت بينكم اله يوميا لو ربع ساعة خاصة فيه.. والا الانتكاسة رح ترجع عليكم.
النقطة 13:
تصرفات الغيرة من طفلك مقبولة الفترة الأولى الأهم انك تعرفي كيف تتعاملي معها، اشرحيله كتير واحكي معاه وتقربي منه
وحطي ببالك النقد والخناق والكلمات السلبية رح تخلي الأمور أسوأ واسوأ، مشان هيك اعرفي انه سلوك طفلك السيء
هو رسالة الك انت وزوجك “أنا بحاجتكم” فارجعوا رتبوا اموركم ولاقو لطفكم وقت خاص فيه
النقطة 14:
اشرحي لطفلك كيف المولود ضعيف وهو بحاجتكم، وانه هو مسكين لو نحن ماجبناله الحليب لعنده مابيقدر ياكل اذا ماغيرناله الحفاض مابيقدر يروح على الحمام،
ممكن تجيبي عرق بقدونس وتطلبي من طفلك يكسره وبالتأكيد رح ينكسر مباشرة وبعدين خليه يجرب يكسر عود المقشة،
اكيد مارح يقدر، وضحيله انه المولود الجديد هيك ضعيف وعظمه طري، وانه هو اقوى منه بسبب الاكل والنوم والأيام اللي عاشها.
النقطة 15:
لما تنشغلي مع الرضيع وطلب منك طفلك الأكبر طلب ابتعدي عن جملة أنا مع اخوك، قوليله انا هلأ أيدي مشغولة أول ماخلص بقدر ساعدك.
لا تخلي اسم مولودك سبب انشاغالك الدائم هي مسؤليات جديدة عليكي وعم تحاولي تنجزيها.
النقطة 16:
لما طفلك يقرب من الرضيع اشرحيله كيف بينمسك لا تورجيه انك خايفة منه لأن خوفك رح يوصل لطفلك ويتحول لأسلوب عنيف بسبب عدم ثقتك فيه،
لما يمسكه بقوة اشرحيله بهدوء شلون لازم يمسكه، خليه يكون قريب منه ويحمله وكوني اكيد جنبه وحريصة على المولود
انه يكون بأمان بس لا تورجي طفلك الأكبر ابدا انه ممنوع يقرب عليه او يلمسه، فيكي بس تشرحيله انه شرط انك تكوني موجودة لحتى تقدري تساعديه.
الأب، دور زوجك بهي المرحلة ضروري جدا، انت جسمك تعبان بعد الولادة لخبطة النوم وبكاء طفلك الجديد وطلباته اللا منتهية،
طفلك الأكبر وتلبية حاجياته كل هي المسؤوليات ضروري يكون زوجك متواجد ليدعمك ويشيل عنك قد مابيقدر،
بعرف رجال بتاخد إجازة من عملها بهي الفترة لتقدر تدعم زوجاتها بالشكل المطلوب، كل الشكر والاحترام الهم
https://dailysyria.net/archives/2177