رحلة مربية الحلقة الثامنة والثلاثون “جهزي طفلك قبل الذهاب إلى الطبيب” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

الأسبوع الماضي عم أقرا بالتويتر نقاش عن أهمية تجهيز أطفالنا قبل الذهاب لطبيب، وفكرت هل الأهالي مدركين لأهمية هاد الموضوع وأثره؟

هل منجهز أطفالنا بالطريقة المناسبة، هل الصراحة مهمة، شو أنسب شي قوله لطفلي؟

بسم الله نبدأ

في البداية:

بيختلف كيفية شرحك لطفلك عن زيارته للطبيب على حسب عمره ونوعية الطبيب وشو الغرض من مراجعته.

ففي حال طفلك عمره تحت السنتين مو سهل تشرحيله موضوع زيارته للطبيب لأخد التطعيم أو ابرة ما،

بهي الحالة ضروري انك تركزي على اختيارك للطبيب واسلوبه مع الأطفال، وبعدها بالتأكيد رح تكوني مصدر دعم وحضن لطفلك لحتى تخففي عنه آلامه.

في حال احتاج طفلك زياة الطبيب بشكل متكرر فدورك بيكون أكيد بداية قبل الزيارة الأولى لحتى يكون بالصورة، وبعدها لا تعتمدي أنه عرف طفلك

بيحتاج إلى توضيح دائم لنوعية الإجراءات اللي رح يعملها الطبيب في كل مرة، والوقت اللي رح يصرفه معه،

وطبعا لا تنسي تكوني مضخة دعم وتفاؤل من الموعد للموعد، لحتى مايترك ندبة ألم بقلب طفلك.

الأطفال فوق السنتين!

بالنسبة للأطفال اللي فوق السنتين واحتاجوا لزيارة طبيب مفاجأة ضروري تتبعي الخطوات التالية لحتى تخلي زيارة الطبيب سلسة وأقل معاناة:

أولاً:

اختاري الوقت المناسب لتخبري طفلك عن ضرورة زيارته للطبيب..انتبهي مو قبل وقت طويل للزيارة يعني

نفس اليوم الصبح او قبل بيوم كحد اقصى لا توتريه فترة طويلة، ووقت تخبريه ابتعدي عن وقت طعامه او نومه

ثانياً:

خبري طفلك عن المكان والزمان اللي حايزور فيه الطبيب، واياكي تصدميه بالذهاب لمكان ما وفجأة يلاقي نفسه بالعيادة

اشرحيله مين رح يكون معاه طول الوقت، انت أو ابوه للدعم والطبيب والممرضة للفحص

ثالثاً:

خليه يشاهد فيديوهات على اليوتيوب إيجابية لزيارة أطفالك لعيادة الطبيب وكانوا هاديين ومبتسمين،، بالطبع بعد تصنيفك الها لوحدك وتحديد الأنسب.

رابعاً:

وقت انتظاركم للدخول على الطبيب وقت مهم جدا لطفلك، الانتظار وحده بيزيد التوتر مشان هيك، تجهزي لهي الفترة واحضري معك وسائل

تخلي طفلك ينسى الوقت والانتظار، متل تلوين، صلصال، العاب صغيرة بيحبها طفلك وممكن تختاروها سوا.

خامساً:

قلق طفلك رح يكون اما من “الألم، أو الطبيب، أو المجهول” مشان هيك كل ماقربت لطفلك الصورة الواقعية بعيدا عن أي زيادة أو بهرجة رح يرتاح ويشعر بالأمان.

سادساً:

خوف طفلك طبيعي مشان هيك، استوعبيه وناقشيه واشرحيله، ابتعدي عن كلمات: “بلا دلع، انت كبرت، صرت رجال..” واستبدليها:

“حبيبي أنا رح كون جنبك، أنا بعرف أنه ممكن يكون مؤلم بس ان شاء الله بتكون سريعة وبتروح، انا متأكدة أنك شجاع،

ترا عادي تتوجع حبيبي حتى انا بتوجع لما اخد ابرة أو اخلع سن..، بتعرف شو ممكن يخلي الوجع اخف،

لما فكر بشي كتييير بحبه” جربها.. ولاتنسي تعلميه ياخد نفس لحتى يسترخي ويخف الألم عليه.

سابعاً:

تقبلي بكاء طفلك، ولا تعاتبيه، استمري بالدعم والتشجيع وممكن تغيري انتباهه لموضوع بيحبه مشان يبعد تركيزه عن الألم.

ثامناً:

اختاري وقت مناسب ووثقي الحدث فيكي تاخدي الك ولطفلك صورة بتعابير وجه إيجابية، وخليها مرجع لحتى

تذكريه كيف كانت زيارته للطبيب سريعة وهو كان شجاع وخلص مراجعته عند الطبيب وهو سعيد.

تاسعاً:

حاولي مباشرة بعد زيارة الطبيب تزرعي ذكرى حلوة لطفلك، اما بالذهاب لأكل المثلجات او شراء من السوبرماركت شوكولاتة بمبلغ بسيط،

خليها مكافأة صغيرة لكن مليئة بمشاعر إيجابية، ابتعدي عن شراء الألعاب الغالية او المبالغ فيها، توقعات ابنك بسيطة وبريئة لا تشوهيها باختيارات مقعدة.

هي عدة أفكار سريعة بتساعدك لحتى تخلي زيارة طفلك للطبيب أوضح واسهل، وبحب اختم بإضاءتين مهمين:

الأولى:

ثقة طفلك بكلامك وتجهيزك اله لزيارة الطبيب بيعتمد على نوعية العلاقة اللي بينكم وكمية المصداقية اللي ربيتيه عليها، اذا كنتي بتوعدي كتير وبتخلفي،

أو بتقللي من طريقة تفكيره وفهمه أو اهتمامك سلبي نحو مشاعره بالتأكيد مارح يصدقك ولا رح يكون شاعر بالأمان،

والذهاب للطبيب مارح يكفيه النقاط العشرة اللي حكيتهم علاقتك الايجابية بطفلك هي أهم هدف لتحقيق تربية سوية فاشتغلي عليها بإخلاص

الثانية:

صورة الطبيب عند طفلك، شو هي، هل اعتمدت سابقاً بتخوفيك لطفلك من الطبيب وتهديدك اله انه اذا ما اكلت او نمت او سمعت الكلام

رح اخدك على الطبيب يعطيك ابره؟ اذا عملت هيك صدقيني عزيزتي انت شوهت صورة الطبيب المناضل اللي درس

سنين طويلة لحتى يخفف عنا آلامنا وأوجاعنا، بنصحك توقفي فورا وترجعي تبني صورة إيجابية لطبيب ومهنته العظيمة.

بتمنى السلامة لجميع الأطفال حول العالم وربي يشفي جميع المرضى ويخفف عنهم آلامهم، ولا يورجيكم مكروه بحبيب.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912