رحلة مربية الحلقة الخامسة ” اللماذات الخمس” (فيديو)
وفاء غيبة ـ فريق الموقع
السلام عليكم وأهلا وسهلا فيكم بحلقة جديدة من رحلة مربية
اليوم موضوعنا ممكن يدخل لكل بيت ويفيد كل أم وأب عندهم تحدي صعب مع طلفهم ومو عارفين شو يعملوا او من وين يبدوا كل مرة بيحاولوا يلاقوا حلول جديدة لكنها غير مجدية.
اليوم رح نحط ايدنا على السبب الرئيسي لمشكلة طفلك ووقتها رح نلاقي الحل المناسب والصحيح.
رحلة مربية/ اللماذات الخمس
بسم الله نبدأ
في عام ١٩٣٠ في عالم اسمه (ساكيشي تايودا) ابتكر تقنية جميلة في حل المشكلات.
سماها 5whys أو الخمس لماذات.
ماهي الخمس لماذات؟
هي التقنية بتساعد الناس تقدر تكتشف علاقة السبب والنتيجة الكامنة وراء مشكلة معينة، والهدف الاساسي هو تحديد الخلل الرئيسي أو الجذري من خلال تكرار سؤال لماذا؟
وكل جواب رح يحدد اللماذا اللي بعدها لحتى يصيروا خمس لماذات وبعد اخر جواب رح يلاقي السبب الجوهري لمشكلته ومن هون بداية الطريق للحل.
طيب كيف بنقدر نحن نطبقها بتربيتنا لأطفالنا؟
اول خطوة استحضري مشكلة متعبتك
بعدها جيبي ورقة وقلم وكتبي المشكلة
وبعدها بتبدئي تقنية الخمس لماذات
اسألي نفسك سؤال عن سبب المشكلة
وبعدها رح تجاوبيه اول جواب بسيط
بعدها رح تسأل لماذا تانية مرتبطة بالجواب الأول
وهيك ليصيروا خمس لماذات وخمس اجوبة.
مثال عملي مع مها:
مها جابت ورقة وقلم وكتبت مشكلتها مع ابنها:
(أنا صبري قليل وبعصب بسرعة عليه)
بعدها رح تكتب اول لماذا وتجاوب عليها وتكمل بعدها اللماذات الخمسة.
لماذا صبرك قليل وبتعصبي عليه؟
لأن هو بيضل يعمل سلوكيات تعصبني.
ولماذا هو بيعمل سلوكيات تعصبك؟
لأن فاضي و ماعنده شي يملي وقته.
ولماذا ماعنده شي يملي وقته؟
لأنه لازم انا اعمله روتين وعبيله وقته وماعملتله.
ولماذا ماعملتيله روتين؟
لأن بده وقت ورواق ومتابعة.
ولماذا ماعندك وقت ورواق؟
لأن عندي مهام كتيرة بالبيت ومارتبت وقتي انا لحتى رتب وقته هو ما بشعر بأهمية هالامور.
بووم فجأة قدرت مها تعرف اصل مشكلة سلوك طفلها اليومي وعصبيتها بس لما سألت نفسها الخمس لماذات.
واللي هو انو هي نفسها تايهة ومو عاملة روتين لنفسها فصار يمرق يومها بدون ترتيب فبالتلي صار إنجاز أقل وعصبية أكتر.
دور مها هلأ انها ترتب وقتها وجدولها وتعمل روتين واضح لأبنها بتغطي فيها ساعات يومه وكيف راح يقضيه
بشكل إيجابية و منتج ساعتها رح تقدر تشتغل وتستمتع بيومها بس لأنها رتبت الأمور.
بالنسبة للروتين انا حكيت فيه بموسمي السابق بالحلقة التانية.. ياريت تشوفوها حطي صورة للحلقة
مثال تاني مع سارة:
ابني عمره ٥ سنين وما بينام بسريره
لماذ ا ابنك مابينام بسريره؟
لأن ما بيحب ينام لحاله.
ولماذا ما بيحب ينام لحاله؟
لأن كان ينام عندي بغرفتي.
لماذا كان ينام عندك؟
لأن من وقت كان صغير كنت رضعه فكان ينام عندي فاتعود.
ولماذا ما عودتيه ينام بسريره من صغره؟
لأن كنت ما حب خليه يبكي او يخاف.
بووم فجأة سارة بتكتشف انها من لما كان ابنها بشهوره الاولى عودت ابنها انه يكون جنبها وما ينام لحاله.
وواضح انه ساره مابدها ابنها يبكي لحاله او يزعل لانه ببالها انه اذا تركته رح تأذيه غافلة عن أهمية تقنية النوم
اللي محتاجة انها تقوي قلبها وتسمعه عم يبكي لأنه عم يتعلم مهارة تهدئة نفسه بنفسه ثم النوم بسلام.
بالنسبة لحل مشكلة سارة انا شرحت الحل بالحلقة ٢٠ من الموسم الأول حكيت بالتفصيل عن تقنيات أساسية بتساعدك تعلمي طفلك كيف ينام بتمنى تشوفوها
تقنية الخمس لماذات جميلة وفعالة لانها بتخلينا نوصل للشرش الرئيسي تبع المشكلة, ولكن بشرط
انه نكون صادقين مع انفسنا وما نجاوب أجوبة بعيدة عن الحقيقة والواقع.
لحتى فعلا نقدر نلاقي الحل ونشتغل عليه.
كتير مرات منشتكي من سلوك أطفالنا لكن في الواقع اذا بحثنا عن السبب يمكن يطلع التقصير من عنا،
مشان هيك بنصحكم تطبقوا تقنية الخمس لماذات وتحاولوا تلاقوا من وين بدت المشكلة وتحلوها بكشل جذري وليس مؤقت.
هي نهاية حقلتنا لليوم بتمنى تكون عجبتكم.
ولاستشارة خاصة بطفلك فيكي تستشيرني بشكل خاص ابعتيلي على الواتس على هاد الرقم
+966 55 257 9023
لأبعتلك كل التفاصيل.
بلاقيكم بحلقة جديدة الأسبوع الجاية
بحبكم
وفاء غيبة