رحلة مربية الحلقة الثامنة عشر “كيف أتعامل مع التوتر؟” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

أنت أم وعندك طفل طفلين أو أكتر معناها ممكن يكون التوتر جزء من حياتك، كيف عم تتعاملي معاه وشو عم تكون ردود فعلك لما تكوني متوترة

ببيتك ومع زوجك وأطفالك كيف فيكي تسيطري على توترك وكيف بتقدري تعيشي يومك بعيدا عنه وعن آثاره السلبية؟

بسم الله نبدأ

في البداية:

من أكتر الاستشارات اللي بتوصلني هو كيف أتحمل التوتر اللي عايشة فيه؟

بسبب توتري أنا بصرخ وبضرب أطفالي، كل ما بتوتر بفقد كل أعصابي وبتصرف بدون وعي.

اليوم رح احكيلكم عن مرحلتين فيهم عدة نقاط لتساعدكم تتحكموا بالتوتر تبعكم وتعرفوا كيف تتعاملوا معه.

المرحلة الأولى: التعرف على التوتر.

أولا:

فهم التوتر، قبل ما نلاقي حل للتوتر خلينا نفهمه بالتفصيل واسألي نفسك، كيف بتوتر؟ شو مظاهر التوتر عندي؟ غضب، صراخ،

ضرب، هروب من الواقع. كل شخص بيختلف بإظهار توتره لما بتفهمي شكل التوتر عندك رح تكوني جاهزة اكتر لتوقعه والتعامل معه .

ثانيا:

فهم مصادر التوتر، هل بتتوتري بالشغل بالبيت وقت التغيير وقت يقل نومك وقت تكوني منهكة ، وقت تحكي مع أحد من المعارف؟

ابحثي عن المحفز للتوتر لحتى تقدري تتخلصي منه أو تتعاملي معه بذكاء وما يدخلك بتوتر ورح نحكي بالنقاط الجاية كيف،

المهم تبحثي عن التفاصيل اللي عم تخليكي متوترة.

ثالثا:

تعرفي على إشارات التوتر عندك، ماهي الأعراض الداخلية اللي بترافقك وقت بيبدا التوتر؟ صبرك بيقل؟ بيبدا معك صداع أو مغص؟

شعور بالإجهاد؟ انتبهي لهي المؤشرات لأنها مهمة ولأن جسمك عم يحاول يوصلك رسالة فلا تهملي الرسالة وانتبهي.

رابعا:

ماهي التقنية الي بتتبعيها وقت تتوتري؟ لأن ممكن تكوني اكتسبتي طرق التعامل مع توترك من خبراتك السابقة بحياتك وممكنما تكون أفضل طريقة،

مثال: في ناس لتحل مشكلة التوتر ممكن تلجأ للأكل الزيادة وبتتفشش فيه وهاد ممكن يحسن المزاج ساعة وبعدها رح تواجه الانتكاسة فانتبهوا

أو في ناس بتلجأ للدخان أو الإرجيلة، وبالتأكيد هاد مو حل صحي ولا تربوي، يمكن في ناس تعارض كلامي

لكن رسالة سريعة لكل أهل بيتوقعوا أنه التدخين والأرجلة ملجأ تهربوا أله من التوتر ومن ضغوط الحياة أنتو فتحتوا باب كبير من السلبيات عليكم،

اول شي الضرر الكبير لصحتكم وثانيا كونكم قدوة لأطفالكم رح يكون التدخين أول حل لألهم وقت بيتوتروا أو

بيزعلوا فانتبهوا كتيييير لشو عم تعملوا وشو عم تزرعوا.

طيب بعد ما عرفتي ليش وامتى وكيف بتتوتري هلأ صار وقت المرحلة التانية واللي هي كيفية التعامل مع التوتر:

أولا:

ترتيب الوقت، لحتى تعيشي حياة بعيدة عن التوتر رتبي وقتك، جيبي ورقة وقلم واكتبي أهم الأعمال اللي لازم تنجزيها اليوم،

وزعيها على ساعات اليوم، لا تنسي تحطي وقت ممتع مع أطفالك ووقت لنفسك، وباقي المهام أنت شوفي كيف وامتى فيكي تعمليها،

كوني واقعية ولا تحطي مهام كتيرة لأنها حاتكون هم ومارح تنجزيها ولا رح تستمتعي باللي انجزتيه فكوني ذكية بترتيب وقتك.

ثانيا:

ارتاحي من العالم الخارجي وتنبيهاته، واللي بقصده الأجهزة الاكترونية، صارت حياتنا سريعة واشعاراتها طول الوقت،

مو لازم نقرأ كل رسالة مباشرة، مو لازم نشوف كل صورة ترفعت على السوشال ميديا كل شوي، اتركي جوالك واجهزتك واتنفسي

تخيلي انك لما عم تمسكي جوالك كأنك وقفتي بشارع عام مليان سيارات وشاحنات وصوت الزمامير المزعج واصوات ناس عم تصرخ

خففي الضوضاء و ابتعدي عن أخبار العالم اللي خصوصي بهي الفترة أغلبها سيء وبيوتر.. عيشي يومك ولا تعيشي أيام الناس التانية.

ثالثا:

كوني واضحة حازمة وفعالة، لما تكوني واضحة بطلباتك وحازمة بإنجازها رح تكوني فعالة ومرتاحة، مثال: انت محتاجة من طفلك

أنه يكون عنده إنجازات يومية واقعية متل حفظ قرآن لعب بألعابه، يدرس لغة ورياضيات، هاد الطلب هيك واضح الك ولطفلك، بعدها

بتجي مرحلة الحزم بأهمية الإنجاز والمتابعة، وببساطة بتخلي طفلك ينجز الأمور المطلوبة منه بجملة: ماما أنا اسفة اذا ماخلصت

اللي عليك مارح تقدر تلعب بألعابك او مارح تقدر تتفرج على الكرتون لحتى تخلص بحزم وهدوء بدون صراخ

كل ما كنت واضحة باحتياجك كل ماقدرتي تخففي توتر عدم الإنجاز

رابعا:

تخلصي من الأفكار السلبية، خلال عملي بالاستشارات مع الأمهات، لاحظت انه التوتر بيبدأ بفكرة بعدها بيتحول لمشاعر

وسلوك وبتخرب الدنيا، مثال بتقول ابني مادرس شي اليوم رح يطلع فاشل ، ابني بيتخانق مع اخواته انا ام سيئة

رفيقتي أولادها هاديين ومربايين وانا مابعرف اخدهم مكان الا وبيفشلوني.

انا ما عندي بزنس خاص فيني ورفقاتي اللي عندها مشورع طبخ والتانية عبايات وانا فاشلة مابعرف اعمل شي.

زوجي مابيهتم فيني كل رفقاتي بييطلعوا مع ازواجهم مطاعم وبيتصوروا وانا لأ.

وغيرها وغيراتها أفكار وأفكار عم تحرق وتوتر من جوا وبعدها بيطلع البركان على عيلتك اللي هي اغلى الناس عندك،

خديها قاعدة عيشي حياتك بسلبياتها وايجابيتها بسعادة وخلي حياة غيرك بإجابياتها وسلبياتها يعيشوها هنن،

خلي سقف توقعاتك من نفسك ومن زوجك ومن أطفالك واقعي مشان لا تتعبي ولا تتعبيهم.

خامسا:

كيف بتعتني بنفسك يومياً؟ بتعليمات الطائرة قبل الإقلاع بيعلمونا اذا انخفض الضغط لازم نحط قناع الأوكسجين قبل ما نساعد أطفالنا،

وهاد المثال ضروري نعتمده بحياتنا اذا انت مااهتميتي بنفسك وبطاقتك كيف رح تقدري تعطي اللي حولك..فضروري تنتبهي لكمية نومك

ونوعية أكلك ولممارسة رياضتك وتتأكدي أنك عم تشحني طاقتك بالطريقة اللي بتحبيها، ممارسة هواية،

خروج مع صديقة او محادثة أحد المحببين لقلبك شوفي الأنسب الك لكن المهم أنك تحرصي عليه خديها قاعدة بهتم بنفسي من أجلهم.

سادسا:

اتبعي حمية صحية والعبي رياضة ، كل ماكنت صحية كل ماكنت سعيدة وبعيدة عن التوتر، ماتقوليلي مابحب الرياضة، في اكتر من ٤٠ خيار عندك،

شوفي الأنسب لصحتك وظروفك وعمليه، وانتبهي على نوعية اكلك، لان الاكل الغير صحي ممتع لوقت بسيط وبعدها اثره توتر واكتئاب.

سابعا:

طوري مرونتك وتقبلك للأمور، لا تخلي معاركك كتيرة بالحياة، ولاترفعي مستوى التوتر بأيدك في كتير شغلات مافينا نغيرها لهيك خلينا نتقبلها

ونتعايش معها بتذكر مرة استشارتني أم طفلها كان عنده توحد وكلنا منعرف التوحد مرض لايمكن شفاؤه لكن هي كانت عم تبحث بكل مكان

وبكل الطرق لحتى يطيب ابنها، بالتأكيد ممكن يتطور طفل التوحد على حسب حالته والعلاج اللي عم يتبعه،

لكن لايمكن يطيب فليش مانتقبل ونطلب الأجر من رب العالمين اللي اختارنا لهاد الامتحان.

ثامنا:

لما تتوتري لا تخليها بقلبك، نصيحتي الأولى الك اكتبي خلي عندك دفتر يوميات واكتبي فيه، كل ماكتبتي كل

ماخف توترك وهاد مثبت علميا، ممكن كمان تحكي مع حدا من المقربين اللي بتوثقي برأيه وتفضفضيله ليطلع التوتر من داخلك وترتاحي.

الموضوع يطول وفيه تفاصيل كتير بس دائما بيحكمني الوقت، هدول اهم النقاط حاولي تتبنيهم ورح تلاقي الفرق بإذن الله.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة