رحلة مربية الحلقة العشرون “التعليم عن بعد” (فيديو)

وفاء غيبة

السلام عليكم وأهلا وسهلا فيكم بحلقة جديدة من رحلة مربية

التعليم عن بعد المسمى اللي خلى كتير أمهات زعلانين وتايهين، بالتأكيد كلنا حابين يرجعوا ولادنا للمدارس ويتعلموا بشكل مباشر

مع المعلم ويتفاعلوا مع أصدقاءهم لكن بما أنه الموضوع مو بأيدنا خلينا نكون إيجابيين ونطلع الأفضل من الوضع الحالي.

بسم الله نبدأ

مارح اخفيكم أنا من الأمهات الي مالي مبسوطة أنه ولادي رح يدرسوا عن بعد لكن من أول يوم طلع فيه القرار بدأت

ابحث واقرأ وفكر بكيفية التعايش مع الوضع الجديد بأفضل صورة، وطلع معي عدة نقاط واللي هي:

أولاً:

تقبل الوضع ومساعدة أطفالنا يتقبلوه، لما بنتي قالتي مابدي تعليم عن بعد، شرحتلها أهمية هاد القرار وأنه هاد للحفاظ على حياتنا

وحياة الناس الي منحبها واللي حولنا، قلتلها تخيلي لا سمح الله حدا منكم اجاه وراح نقل العدوى لتيتة أو جدو وتعبوا كتير وراحوا على المستشفى،

أكيد فينا نصبر على التعليم عن بعد بس مو سهل نشوف تيتة أو جدو تعبانين صح، بعدين قلتلها: بتتذكري لما كنت صف ٤ ابتدائي بتتذكري الترم الأول كله؟

بتتذكري شو عملتي بالفصل وشو حكيتي مع رفقاتك وشو اكلتي وشو لعبتي كل يوم؟ قالتلي لا،

قلتلها نفس الشي هالفترة بإذن الله بس تعدي رح تصير ذكرى ما رح نقدر نتذكر كل تفاصيلها.. فدوام الحال من المحال.

ثانيا:

لحتى نقدر ناخد الأفضل من التعليم عن بعد لازم نحن نكون جاهزين، في أمهات قالولي أنا مابفهم بالتكنولوجيا ولا سهل علي

افهم سيستم المدرسة على الكومبيوتر وتابعه مع طفلي، لكل أم عندها شعور انها مابتعرف بالتكنولوجيا رح قلك هاد مجرد خوف

بسبب عدم المعرفة بس لما تعطي نفسك فرصة وتدخلي بهاد السيستم رح تقدري تفهمي كل شي شوي شوي، كل شي أوله صعب

بس مع التعلم والصبر رح تتغير الأمور،  ولا تترددي بسؤال الأمهات اللي بجروب ابنك أو تسألي المعلمة أو زوجك المهم لا تستلمي ما خاب من استشار.

ثالثا:

رتبي أولوياتك، الطبخ ، المواعين، تنظيف وترتيب البيت، غسيل الملابس، وكل المهام اللي بتقومي فيها بشكل يومي

بدك تعرفي أنه بالتعليم عن بعد رح يحتاج طفلك مساعدتك لذا ترتيبك لأولوياتك رح يخليكي توازني بينهم،

فمثلا لما تطبخي عن يومين رح تكسبي يوم ما تطبخي فيه وتأدي مهمة تانية للبيت، ترتيبك لهي التفاصيل رح يخليكي رايقة لتساعدي طفلك،

اما لما تكوني حاسة انه عليكي الف شغلة ومو عارفة وين تبدي، رح تعصبي على طفلك ومارح تقدري تساعديه.

رابعا:

تنازلي عن الكمال بأتمام المهام، هاد الوقت عندك مهام كتير صح رتبتي أولوياتك لكن لازم تنتبهي لرؤيتك للأمور، بعرف كم أم ما بيتنازلوا

عن الكمال بطوي الملابس ولا مابتقدر تنام الا وكل كاسة وكل صحن رجع على مكانه، النظافة والترتيب كتير حلوين بس لما بياخدوا من طاقتك وصبرك ووقتك،

بالتأكيد مالهم حلوين، لهيك تنازلي شوي ومعليش اذا ماكان كل شي متل مابدك، هاد الوقت محتاجين نعطي تركيزنا ووقتنا لشي أهم واللي هنن أطفالنا وتعليمهم.

خامسا:

عدد أطفالك وأعمارهم رح يحكم مدى حاجتهم لمساعدتك أو مساعدة أبوهم، يعني الأطفال اللي بمرحلة المتوسط والثانوي، مارح

يحتاجوا مساعدة متل أطفال الابتدائي ورياض الأطفال.. اذا كان عندك اكتر من طفل بمرحلة الابتدائي وبتتوقعي انه محتاجك بنفس الوقت

عندك خيار تسجيل الدرس والرجوع اله ، او بالاتفاق مع زوجك هو يكون مسؤول عن متابعة أحد الأطفال

وانت الطفل الثاني كلشي بالترتيب رح يكون أسهل وبفائدة أكبر

سادسا:

قوانين الدراسة لازم تتابعيها بشكل يومي مع كل أطفالك، بعد ما ترتبي المكان، وتوزعي أطفالك بمكان فيه اضاءة كويسة ومؤشر

انترنت كويس وبنفس الوقت مايكون فيه ازعاج بأصوات دروس أخواته، لازم يعرفوا انه وقت الدراسة ممنوع الأكل و التسطيح وممنوع

يفتح جواله والمدرس عم يلقي الدرس على اللاب توب، الأفضل انه يكون أكل وخلص ولبس وجهز بكتابه

وقلمه وكمبيوتره ويقعد على مكتب خاص للدراسة.

سابعا:

دراسة عن بعد ولا دراسة بالمدرسة بتحتاج نفس الخطة لهيك لازم هي الفكرة تكون واضحة عند أطفالك، تحضير الدرس قبل ما ناخده من المعلم،

مراجعة الدرس بعد المعلم، التلخيص وحل الواجب والمراجعة اخر الأسبوع، هي الأمور لازم نتأكد انه أطفالنا

عم يمشوا عليها والا رح يتراكم عليهم دروس ورح تنزل علماتهم.

ثامنا:

هل انا معلمة؟ فكرة انك انت معلمة غير صحيحة، لا تتبني هاد الدور انت كل اللي عليكي الدعم والتذكير وتجهيز المكان

والجو المناسب للدراسة ومراجعة الدروس مع الأطفال الأصغر وتسميع الدرس للطفل المحتاج، لكنك لست معلمة ومالك بحاجة

انك تدرسي كل حرف مع طفلك، المدرسة عم تشتغل مع المعلمات لتوفير الطرق الأفضل للشرح وإيصال المعلومة.

تاسعا:

معلمة خصوصي، هالفترة كتير عم اسمع عن طلب الأمهات لمدرسات الخصوصي، بالتأكيد كل حدا ووضعه وظروفه، لكن بحب قول

اذا المعلمة رح تتابع عن بعد رح تكون متل المدرسة تبع المدرسة، ولو كانت رح تجي كمان خطورة نقل العدوى بتصير أعلى، وبالتأكيد

رح يكون مصروف جديد وكبير على الأهل، فضروري نفكر بوعي بحقيقة حاجتنا للمعلمة الخصوصي، وبحب كمان نوه أنه لما نكون

معودين طفلنا على المعلم الخصوصي بشكل مستمر ودائم هيك هو فقد مهارة كيف يدرس لحاله

ورح يضل معتمد على المعلم ليلقنه المادة لهيك خلينا ناخد القرار بوعي

عاشرا:

معرفة الصعوبات والإيجابيات، حاولي الفترة الأولى تفهمي من أطفالك شو الصعوبات اللي واجهتهم وناقشوا الحلول لحتى تتخلصوا من الصعوبات،

وشو الايجابيات اللي انبسطوا بتواجدها، بدنا نكون ايد وحدة لحتى نقدر نطلع بأفضل سيناريو من التعليم عن بعد.

النقطة 11:

التواصل مع الأمهات والأصدقاء، طبعاً على حسب عمر طفلك، فإذا كان طفلك بمرحلة المتوسط وأكبر احرصي انه يكون عنده جروب

على الواتس مع أصدقاءه يتابعوه فيه مع بعض أهم المستجدات والواجبات، وممكن يساعدوا بعض بفهم أمر ما، وبالنسبة للطفل الأصغر،

ادخلي مع أمهات الفصل بجروب وفيه رح تقدري تعرفي كتير تفاصيل وتتابعي الواجبات وتسألي عن أي شي صعب بالنسبة الك.

النقطة 12:

الراحة والتسلية، متل أيام الأسبوع العادية ضغط الدراسة عن بعد لايقل أهمية لهيك لازم نوفر لأطفالنا نهاية أسبوع حلوة وممتعة

ونعطيهم فرصة يلعبوا على الأجهزة الاكترونية لمدة ساعتين  لحتى يشعروا بحماس العودة للدراسة بالأسبوع الجديد.

تجربة الدراسة عن بعد بتعلمنا الصبر والتعايش مع الظروف والابداع من خلالها، هي الفترة علينا علينا، لهيك خلينا قد مامنقدر نعيش

تجربة ممتعة وبأقل الأضرار لأن كلشي رح يمضى ورح يبقى الأثر النفسي والذكرى الحلوة أو المرة الاختيار عنا.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة