رحلة مربية الحلقة الرابعة والعشرون “لا لتنمر الأهل” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

للأسف الفترة الأخيرة في بعض الأهالي صاروا يستخدموا التقنية بطريقة سيئة واعتدوا على براءة أطفالهم

أغلى الناس عندهم بس لحتى يضحكوا ويضحكوا متابعينهم، لا لتنمر الأهل.

بحلقة اليوم

بسم الله نبدأ.

تنمر الأهل!

من الأمور اللي ممكن تعكر مزاجي تماما هو رؤية طفل يمارس عليه العنف أو التنمر هاد المنظر المزعج ممكن يحرمني النوم ليلة كاملة

مو بس لأنه كل شي فيه مزعج وغلط بل لأني عارفة أثره السلبي والعميق والهادم على الطفل المسكين.

التنمر إله أوجه كتيرة بس أساسه شخص بيستخدم قوته ليستهزأ على اللي أضعف منه، بعض مقاطع التنمر ممكن يتصور وينتشر

وفي منها بيكون بالبيت بين أفراد الأسرة والأصدقاء ورسالتي اليوم للجميع:

المقلب اللي ضحكتوا عليه بسبب انزعاج طفلكم، تنمر

المقلب اللي رعب طفلكم تنمر، المقلب اللي خلى عدد المشاهدات بالألفات وابنكم كان عم يبكي بسببه، تنمر.

لما تجاكر طفلك وتقله أنك اكلت حلوياته أو تقله أنت مو ابني لقيتك عند الجامع هاد تنمر، ولما تتمسخر على طفلك ومستقبله،

متل أنت رح تكون فاشل او رح تضل سمين او آخرتك زبال، هاد تنمر، ولما تحط أبنك تحت ضغط نفسي هائل مشان يتخلص من خوفه تنمر، مثال اللي بيدف طفله عالمسبح، أو اللي بيقرب حيوان أليف

على طفله مع أنه هو رافض وعم يصرخ لما تخوف طفلك بالدكتور وانه حايعطيه ابره إذا ما أكل أو مانام او تتصل ببرنامج

شرطة الأطفال اللي أنا شخصيا بكره هاد تنمر وكذب وعدم احترام لطفلك.

ولكن!

لكل أهل بيتوقعوا أنه عمل مقلب بطفلهم، هو شي بسيط ومضحك وحلو، بقلكم وقفوا هلأ مين سمحلكم تعطوا نفسكم الأحقية

أنه تتنمروا على اطفالكم، اطفالكم مو ملك الكم ورب العالمين حيحاسبكم على سوء تعاملكم مع الأمانة اللي عطاكم ياها، بعض الأهالي

بيتوقعوا لأنه الطفل ابنهم فهنن من حقهم يعملوا فيه اللي بدهم ياه، والبعض بيقول ايه كلها مزحة يعني شو رح يصير،

والبعض مو منتبه أنه طفلهم ممكن يصير عنده مشاكل نفسية عميقة بسبب الاستهزاء والتنمر اللي عم يتمارس عليه.

والبعض بيقول مستحيل هاد تنمر أنا بحب أبني هاد كله مزح.

احترام الطفل!

احترامكم لطفلكم بيعكس كم انتو ناس محترمين، لما مننظر للطفل على أنه مابيفهم وما بيحس ومابيعرف، بحب قلكم أنه للأسف

أنتو اللي مو عارفين شي سبحان الله الكيل بمكيالين بيخلي الأمور مو عادلة فمثلا الأب إذا مديره قله كلمة وحدة بيزعل وبيتعكر مزاجه

وبيعصب والأم إذا مالقت كلمة حلوة من زوجها ممكن تزعل وتتنكد، طيب هاد الطفل ماعنده مشاعر؟! بالتأكيد عنده وهو اللي لازم نراعي

مشاعره لأنه هو عم يحاول يفهم الدنيا ويكون المشاعر الصحيحة للمواقف المختلفة، فوجود أهل مابيهتموا لمشاعر

طفلهم أكيد رح تكون النتيجة أنه يضطرب سلوكه وما يكون طفل سليم وصحي.

المشاكل التي تواجه الطفل بسبب التنمر:

خليني بس سلط الضوء على بعض المشاكل النفسية والاجتماعية والجسدية حالياً ومستقبلا اللي ممكن يواجهها الطفل الي بيتعرض للتنمر.

الطفل من شهوره الأولى بيتعرف على العالم من خلال والدته، فكيف رح تقدميه لطفلك هو رح يستقبله، لما بتوفري الأمان وبتروجي

طفلك أنه لما يبكي رح تكوني موجودة إله وتلبيله احتياجاته، هيك انبنى عنده الأساس الأولي للشخصية السليمة، لكن إذا انفقد الأمان

يعني انفقد اكتشاف العالم الخارجي بطريقة صحية ورح يلازم الطفل الخوف والقلق منه., حكى عن هي النقطة العالم ايرك اركسيون

بنظريته المشهورة عن النمو النفسي الاجتماعي،، بتمنى من كل أم وأب بيهمهم طفلهم يقروا عن هي النظرية

بس اكتبوه نظرية ايرك اريكسون بجوجل ورح يطلعلكم بالعربي أو بالانجليزي مقالات كتير.

الأثر النفسي والجسدي والاجتماعي:

بتختلف ردة فعل الأطفال على حسب شخصيته  وعمره و نوع التنمر اللي واجهه، لكن خلينا

نحط بالحسبان أنه أي عرض من هي الأعراض هو أمر سلبي والأهل الطبيعين بيحرصوا على تربية طفل صحي وسعيد

وبالمستقبل يكون شاب ناجح ومنجز فالبتأكيد ضروري ينتبهوا على نفسية طفلهم وأنه ما يواجه هي المشاكل والأعراض

بعض الأطفال ممكن يعانوا من تبول لا إرادي، ممكن يفقد الشهية للأكل، بعضهم ممكن يصير عنده أرق، أو يعاني من التأتأة، ممكن يصير عنده قلق و توتر،

وتدني الثقة بالنفس ونظرة سلبية للأهل والمجتمع، عدم قدرة على إقامة العلاقات صحية مع الأصدقاء، وبيصير عنده شك دائماً بالناس اللي حولهم،

بيفضل العزلة والجلوس لوحده، رح يواجه تدني بالمستوى الدراسي، بعض الأطفال ممكن تتطور معه الأمور

ويفكر بالانتحار ومنهم قد انتحر وشفتها بنفسي ببرامج أجنبية متل أوبرا.

وفي النهاية!

أرجوكم لا تستسخفوا الموضوع ولا تقولوا مزحة وعدت.. ولا شو المشكلة كذبة وقلناها، لكل أهل بيستخدموا التخويف مع أطفالهم

انتبهوا ألف مرة، لانها مو مزحة وخلصت بل هي أثرت وتركت انطباع بنفس طفلكم وبنا عليها مشاعر

وأحاسيس خلته يصنف طريقة تعامله معكم ومع العالم الخارجي.

بالختام بقول الله الله بأطفالكم وتخيلوا لو أنه حاكم الدولة تبعكم أرسل حارس شخصي  Body Gard يرافق طفلكم لحتى

يحميه طول الوقت لكنتوا عملتوا ألف حساب لتصرفاتكم معه، ولله المثل الأعلى رب العالمين أنعم عليكم بهاد الطفل

والملائكة عم تسجل تصرفاتكم معه، والحساب يوم الحساب مع الله سبحانه وتعالى فانتبهوا كتير

هي نهاية حقلتنا لليوم

بعرف أنها كانت تقيلة بس كانت ضرورية لبعض الأهالي اللي مستهترين بهاد الموضوع بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة