كيف بتلحقي؟ .. إليكم التفاصيل!
وفاء غيبة ـ فريق الموقع
من أكتر الأسئلة اللي ممكن توصلني، كيف بتلحقي؟ كيف بتلاقي وقت؟
رح أحكيلكم عن كم شغلة بيعطوني وقت للإنجاز.
الاستيقاظ المبكر بركة، لو حاطة ببالك تعملي شي وعازمة عليه مالك غير الفيقة بكير لتحقيق هاد الإنجاز.
أنا وطفلي
كيف مرتبة أموري؟
برتب الأمور اللي بحتاج أعملها ما بحط أكتر من طاقتي، وما بزعل إذا ما لحقت، بس حريصة على تحقيقها.
بستغل الوقت الضايع، مثال لما بينام ابني فوراً بمسك لابتوبي أو بطلع بسكليت، لما بحس الأولاد هاديين وعم يلعبوا بهدوء ببدا بكتب أو بقرأ.
ما بتابع مسلسلات لأن لا يمكن يكون عندي وقت يومي لهيك أمور أقصى حدي فلم ساعتين مرة أو مرتين بالأسبوع وخلص.
تلفوناتي سريعة للناس المهمة جداً علي أمي أختي رفقاتي المقربين، ما بقدر اصرف وقت طويل على التلفون بحس عم احترق.
الطبخ عندي أساسي وشبه يومي لكن طبخاتي سهلة وسريعة، ما بصرف وقت طويل عليه إلا بين فترة وتانية
صعب أصرف يومياً أكثر من ساعتين بالطبخ، وللمعلومية بعرف أطبخ أغلب الطبخات وأكلي لذيذ بشهادة أغلب من تذوقه.
نقاشات الواتس والحلطمة ومشاركة كل صغيرة وكبيرة لاغيتها تماماً من قاموسي، أشارك وأقرأ ما يدهشني أو يضحكني.
يومي كيوم النحلة النشيطة دائماً عندي شي أعمله، ولو ما كان عندي شي بسترخي لأشحن طاقتي وأرجع كمل إنجازاتي.
مواقع التواصل الاجتماعي جزء مهم من حياتي لكن ما بضغط نفسي بالمشاركة، حاطة جدول ثابت حلقة رحلة مربية أسبوعياً ومقالة أسبوع أيه أسبوع لا.
أشعر أنهم كافيين للوقت الحالي لأن أي زيادة رح تكلفني وقت وجهد جديد.
هل عندي وقت للأهل والأصدقاء، طبعاً طبعاً فهم سعادة أستمد منها طاقتي، أهلي أسبوعياً بروح لعندهم يوم كامل وأصدقائي بحرص التقي بهم بشكل شبه أسبوعي حسب الظروف.
هل بضيع شي من وقتي؟
أكيد طبعاً وطبيعي أنا مو رجل آلي لكن فعلا بحرص أني انجز بأول فرصة لأني بحب سكر كل ملف من ملفات أعمالي وانتقل للمهمة اللي بعدها.
وأنتِ شو بتعملي لتقدري تنجزي؟
شاركينا