رحلة مربية الحلقة الخامسة عشرة “لا للتنمر” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية.

موضوعي اليوم بيلامس عدد كبير من الناس لأن ممكن يكونوا تعرضـ.ـوله لما كانوا صغار أو حدا من معارفهم تعرضـ.ـله، واللي هو “التنـ.ـمر”.

هي الكلمة الي بتجسد شخص مستهتر خالي من المسؤولية ومستعد يهد كلشي حوله وهو عم يضحك وغير مدرك لعواقب تصرفاته، اليوم رح قول لكل ام واب كيف نحمي أطفالنا ونساعدهم يدافعوا عن انفسهم لمواجهة المتنمر.

بسم الله نبدأ.

التنمر:

التنمر بيكون إما لفظي أو جسدي، وفي بالتأكيد درجات بقسوة التنمر على حسب عمر المُتنَمِر ومدى سوء أخلاقه.

مسؤولية الأهل حماية أطفالهم دائماً ومتابعة سلوكياتهم وتغيرها، ممكن جدا أنه طفلكم مايخبركم أنه عم يتعرض للتنمر

لكن رح يبين هاد الألم بسلوكه وقلة شهيته على الاكل او تذبذب نومه او قلة تركيزه وتدني علماته، كل هي الأعلام الحمراء لازم تخليكم تتأكدوا أنه في شي كبير عم يأثر على طفلكم،

مشان هيك أنا دائما بغرد بأهمية تحسين العلاقة مع أطفالنا لحتى يثقوا فينا ونكون الظهر اللي بيسندهم وقت الحاجة بدون ما يكونوا خايفين من أوهام العواقب،

ومن هون بيبدا أول حل لمشكلة التنمر اللي عم يواجهها طفلكم، واللي هي تفهم اللي عم يصير معاه والتأكيد عليه أنه اللي عم يصير غير مقبول

واكيد معه كل الحق انه يكون متدايق ومهموم، ضروري تورجوه الدعم والمساندة واياكم واللوم وقول مثلا

“انت ليش مابتعرف تدافع عن حالك، يعني شو هي الكلمة الي خلص بتخليك تزعل، كلياتنا مرينا بهيك ظرف وماصرلنا شي”

تأكدوا تماما انه لومكم لطفلكم صنع فجوة كبيرة بينكم وزيادة على هم التنمر صار عنده هم الأهل اللوامين اللي موحاسين فيه،

لا تستقولوا بموضوع التنمر وعدم دعم طفلكم لأن شخصيا قرأت وشفت حالات انتهت بانتحار الطفل لشعوره بالانكسار والضعف والوحدة,, فنكون كتير منتبهين.

طيب شو هي الحلول لما نواجه هيك مشكله؟

أولاً:

التقرب من الطفل ودعمه وتوثيق علاقة الاب والام معاه

ثانياً:

تقبلوا طفلكم متل ماهو، هل بيعرج هل بيحتاج كرسي متحرك هل نظارته سمكية هل بيحتاج سماعة، هل وهل أيا كان عنده تقبلوه

لان كل مجرد شعور طفلكم بانكم محروجين منه بسبب مشكلته رح تنهز نفسيته وتقل ثقته بنفسه ويتعرض للتنمر لانكم حسستوه انه هو ناقص، مع انه هو جميل متل هو

ثالثاً:

اخد الموضوع بكل جدية والدفاع عن ابنكم والتكلم مع المسؤولين في المدرسة وأهل الطفل المتنمر. وإذا كان نوع التنمر ضرب ضروري انكم تخبروا الشرطة

رابعاً:

تعليم طفلك الخطوات الثلاثة لما يواجه الطفل المتنمر وهي “صد، ابتعاد، اخبار” يعني “صد المتنمر وقول: بس، انا مابسمحلك”

بعدها بدون مايستنى رد المتنمر يبتعد مباشرة، وأخيرا  “يخبر أول شخص بالغ باللي عم يصير معاه”

خامساً:

ضروري يصير عند طفلك الشعور بالثقة بالنفس من خلال القوة الجسدية، بنصح تشركوه بنادي كراتيه او تيكوانده لحتى تطور مهارات الدفاع عن النفس عنده،

انا ماعم قول انه يضرب حدا لكن مجرد شعوره انه قوي وبيقدر يدافع عن نفسه رح يتعامل مع التنمر بطريقة تانية تماما

هي بعض الحلول الأساسية اللي بتساعد طفلك ليتعامل مع مشكلة التنمر،

لكن اذا بتحسي انه طفلك محتاج لبرنامج يطور من مهاراته في التعامل مع التنمر بشكل أعمق

فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912