رحلة مربية الحلقة السابعة والثلاثون “تدخل الأقرباء في تربية طفلي صح أم خطأ” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية.

تدخل المجتمع في تربية أطفالي، موضوع بيلامس أغلب الأمهات!

هل صحي أنه يتدخل الجد والجدة بتربية اطفالي؟ وهل أمنع تدخل أي أحد من توجيه أطفالي؟ إذا واجهت عائلتي رح اخسرهم؟

بسم الله نبدأ

في البداية:

اليوم وبكرة وكل يوم ممكن نواجه أثر المجتمع على طفلي، لكن لما يوصل الموضوع للتدخل من قبل العائلة الممتدة، هل أسمح فيه ولا وقفه؟

سؤال الإجابة عنه ليست واحدة لأنه بيختلف من عائلة لأخرى، والأم والأب عندهم عدة خيارات يا أما يواجهوا اللي حولهم ويقفوهم عن التدخل

أو يستسلموا لتدخل الأقرباء الدائم أو فعلا يحتاجوا مرات مساعدة الأقرباء بتعديل سلوك ما لطفلهم،

وبالتأكيد كلا الخيارات بتحتاج حساب خاص لان كل واحد اله عواقبه إما السلبية أو الإيجابية

إذاً ما الحل؟

أولاً:

لازم انت وزوجك تحملوا راية التربية لحالكم وتكونوا المسؤولين الأوائل لإدارة هي المؤسسة الجميلة.

ثانياً:

ضروري تلجئوا للقراءة والبحث، وحضور الدورات والمحاضرات، لأن رح تخليكم على علم أكتر بنفسية أطفالكم وكيفية التعامل معه بالمواقف المختلفة.

ثالثاً:

مسؤوليات كل واحد فيكم تجاه الأطفال، ثبتوا القوانين ولا تغيروها حسب مزاجكم، ازرعوها بأطفالكم ودائما ذكروهم

هي “قوانين البيت”، يعني مثال: “ممنوع حدا ينام برة البيت، النوم الساعة 8، التلفاز أو الاي باد له فترة واضحة”

على راسي من فوق كل جدة ربت وتعبت وكبرت لكن بالنسبة للآباء الجدد ابتعدوا عن ماما هيك ربتني وماما هيك بتقول،

زمانكم غير زمان أطفالكم، الآن العلم صار موجود حولكم وبين ايديكم ولا يوجد حجة لعدم المعرفة والاعتماد على التربية الماضية.

رابعاً:

آراء الناس كتيرة ولا يمكن نرضي الجميع، مشان هيك اشتغلوا على أنفسكم بالتعلم الدائم لحتى فعلا يكون أساس تربيتكم ماشي

بالطريقة المطلوبة وتكونوا على ثقة انه نوعية تربيتكم صحيحة ومو محتاجة تلبي رغبات الناس اللي حولنا لتكون صحيحة.

خامساً:

في الحركة بركة، إذا كنت عند الأهل وحصل لطفلك موقف بيحتاج أنه يتعدل أو انك تساعديه تحركي مباشرة قومي من مكانك وامشي نحوه،

وعلى حسب الموقف لبي الاحتياج، جلوسك بمكانك وكلمة: “تعال لعندي” ليست كافية، وهيك انت فتحت بوابة التدخل من كل اللي جالسين بالغرفة فاتحملي العواقب.

سادساً:

اختلي بطفلك، بأي مكان كنت دائما خذي طفلك لمكان بعيد عن الجميع، انزلي لمستواه وكلميه وحاوريه لحالكم،

وقوليله عن عدم تقبلك لسلوكه، وشو البديل اللي بتتوقعيه منه وتذكري لو انت بتستخدمي أسلوب ضرب أو صراخ بالبيت

اكيد ابنك مارح يفهم عليكي بالحوار برة البيت، ورح ينصدم من الأسلوب الراقي الفجائي.. مشان هيك خلي اسلوبك واحد اللي بتفخري فيه دائما وين ماكنت.

سابعاً:

لما تخلي أطفالك تحت مسؤولية أمك أو أي حدا من الأقارب لأنك مشغولة ومضطرة تروحي لشغل أو دراسة، بدك تتقبلي تدخلهم وتعديل سلوكهم لطفلك،

وهاد حقهم بما أنهم الآن هم الراعين اله ضروري يوجهوه بعدم وجودك مع ضرورة اخبارك بالأحداث لحتى تكوني بالصورة وتتابعي مع طفلك تعديل السلوك ان احتاج فيما بعد.

ثامناً:

لا تحمي طفلك زيادة وتوقعي التدخل من الأهل بشكل مستمر، بالطبع الميزان شغال عندك اذا كنت موجودة وأخوكي تدخل بابنك،

كوني طرف حيادي وقيسي الموضوع واسألي نفسك: هل مع اخي حق؟ هل كان أسلوبه مناسب؟ كل موقف واله اجابته ولكن ضروري انك تخلي ميزانك شغال،

لأن وجود طرف جديد يمنع سلوك سيء مرات كتير بيكون أثره أفضل من أثرك، مثال: لو كانت بنتك بجمعة كبيرة واختك موجودة وراحت بنتك ماسلمت على خالتها وطنشتها،

لا تستني اختك تخبرك لتحلي الموضوع خليها هي تحكي معاها مباشرة وتقلها ضروري تسلمي علي

لما تشوفيني وانا بحب لما سلم عليكي وبالتأكيد طبعا رح تخبرك اختك بجميع الاحداث فيما بعد لحتى تكوني بالصورة.

تاسعاً:

لما تتعقد الأمور لا تستهيني باستشارة مختص يساعدك، وقد شهدت بنفس مشاكل كبيرة بين زوجة وأهلها بسبب التدخل أو زوجة وزوجها

بسبب تدخل اهل الزوج بالطبع الأمر مو سهل بالأخص اذا كانوا الام والأب مو عارفين يحملوا راية التربية بثقة ومسؤولية.

بالأخير مافي حل واحد للتربية والي بيمشي على أولاد أختك يمكن مايمشي معك،

واللي تربيتي عليه ببيت أهلك مو شرط يكون مناسب لعيلتك واطفالك، وتذكري أنه التربية مو رياضيات 1+1 يساوي 2  بل

التربية فن والفن محتاج صبر ومحاولة وتعب وسهر مخلوط بكتير مشاعرمن حب وخوف وقلق وراحة وزعل وحماس وغيرها،

لحتى بالأخير تقدري تطلعي بلوحة خاصة فيكي وبعيلتك رسمتوها خلال كل هي السنوات بطريقتكم.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912