رحلة مربية الحلقة الواحدة والأربعون ” مبارك أنتَ حامل .. ماذا بعد؟ (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

بحلقة اليوم حابة شارككم موضوع خاص فيني وبتمنى أنكم تدعولي الله يتمم لي على خير وأولد بالسلامة.

الحمدلله انا بانتظار مولودي الثالث، وصرت بنصف شهري الثامن، حابة احكي للأمهات عن مرحلة الحمل الطويلة والشاقة.

بسم الله نبدأ

الحمل!

هاد الخبر الجميل المخلوط بمشاعر الأمل والشوق الخوف والتعب، كيف رح فيكي تقضي هي الشهور الطويلة وتتعايشي مع وضعك الجديد من خلال النقاط التالية:

أولاً:

لازم تعرفي انه الحمل بيختلف من سيدة لسيدة، ومو شرط ابدا انه التغييرات والاحداث اللي صارت مع اختك او رفيقتك

تصير معك، مشان هيك انتبهي من كلام الناس السلبي وتوكلي على الله وعيشي تجربتك بطريقتك.

ثانياً:

الحمل مقسوم ل3 أقسام، كل 3 شهور بتجسد مرحلة معينة، وكل مرحلة الها ميزتها، فمثلا المرحلة الأولى ممكن أنك رح تعاني من الغثيان والدوخة والإقياء

ولكن الميزة فيها أنك لحتى تتأكدي بوجود الحمل وثباته بتكوني قطعتي أكتر من شهر، وطبعا بهي المرحلة

بتكوني خفيفة والتغييرات اللي بجسمك بسيطة جداً ولا تذكر.

المرحلة التانية هي ربيع الحمل ان شاء الله موضوع الغثيان والدوخة بيكونوا خفوا ممكن تبدي تشوفي بعض التغييرات على جسمك

لكن صحتك عم تسعفك وتقدري تطلعي وتفوتي مع مراعاة عدم الضغط على نفسك، من ميزات هي المرحلة

انك رح تجهزي فيها طريقة اخبار الناس اللي حولك ورح تصرفي فيها كمية مشاعر جميلة تميز هي الفترة

المرحلة الثالثة، يكمن تكوني تقلتي وكل حركة صرتي تحسبي حسابها، أولويتك راحتك وضروري انك تراعي صحتك والا فعلا رح تاكليها بجسمك،

بس من ميزات هي المرحلة انك بديتي تختمي على كل أمور المولود الجديد من ملابس عرباية كرسي سيارة  سرير

وباقي المستلزمات اللي بتعطيكي أجمل المشاعر وانت عم تشتريها، وبالتأكيد أهم ميزة أنه قرب وقت لقائك بملاكك الجديد.

مراجعة الطبيبة، ضروري جداً انك تراجعي طبيبتك لحتى تتأكدي أنه الأولى.

ثالثاً:

الأدوية والفيتامينات، من أهم الأدوية اللي لازم تبدي فيها قبل ماتكوني خططتي للحمل هو الفوليك أسيد،

ضروري جدا تبدي فيه بوقت مبكر واذا مالحقتي قبل الحمل ضروري تبدي مباشرة وتحرصي عليه بالأخص الشهور ال3 الأولى، بالنسبة للفيتامينات والحديد،

تابعي مع طبيبتك واتبعي تعليماتها، لأن هي الفيتامينات مو للمولود بس لالك قبل، بالتأكيد كوني كتير حذرة بالنسبة لاخذ أي دوا أو مسكن،

ضروري انك تراجعي مع طبيبك او الصيدلي مقدرتك على اخذ هاد الدوا، لأن في ادوية خطيرة جدا على جنينك فكوني منتبهة ولا تستهتري بالموضوع.

رابعاً:

تغير المزاج، العصبية أو الزعل، أمر طبيعي خلال فترة الحمل، لأن كمية الهرمونات اللي عم تتغير بجسمك الها أثر بمزاجك،

أهم شي انك تنتبهي على صحتك وما تخلي ضغوط الحياة تسيطر عليكي.

خامساً:

تغير شكل الجسم، تشققات الجلد، تنفخ القدمين، صعوبة النوم، الحموضة ووجع الظهر، وغيرها على حسب كل سيدة، هي أمور من الطبيعي انها ترافقك خلال حملك،

أكيد مو شي سهل وممكن كتير مرات تجيكي لحظات انهيار وبكاء من تعبك، لكن تذكري أنها فترة ورح تعدي، وانه اللي عم تعمليه شي عظيم كتير رب العالمين كرمك بسببه،

وصدقيني مع كل التعب اللي عم تمري فيه، مجرد ماتولدي وتشوفي طفلك لأول مرة،

رح تنسي كل تعب شهور الحمل وآلام الولادة،

وتقوليله كل اللي صار يستحق اني شوف وجهك الجميل مشان هيك اصبري وكوني قوية،

وخدي دعم من زوجك والناس اللي بتحبيها لحتى تقدري تعدي الفترة وأنت سعيدة.

سادساً:

النشاط والتحرك المستمر، اذا كانت صحتك بتسمح انك تتحركي فلا توقفي حركة، خليكي نشيطة والا التعب رح يجر التعب،

أسبوع عن أسبوع بتفرق همتك وقوتك مشان هيك خليكي نشيطة لآخر رمق، استسلامك للتعب رح يخلي ايامك صعبة ورح يبعدك عن الإنجاز

اللي بيدخل السرور لقلبك، انا ماعم قول تعزلي بيتك وتخليه عم يلمع، لا اللي قصدته هي حركتك الطبيعية اللي بتقضي فيها حاجياتك،

لا تعتمدي كتير على اللي حولك بتلبية حاجياتك، انت قومي وتحركي لحتى تضل عضلاتك قوية وتسعفك لآخر يوم بحملك.

سابعاً:

نوعية طعامك رح تأثر على صحتك، مالي اخصائية تغذية ولكن بنصحك تنتبهي على كمية السكر والملح،

مشان ماتعاني من سكر الحمل او ارتفاع الضغط،

على فكرة سكر الحمل ممكن يجي لو كنت مراعية كمية السكر، ولكن خطورة اصابتك فيه ممكن تزيد مع زيادة السكر بطعامك..فاانتبهي على حالك.

ثامناً:

تعرفي على طفلك من خلال الكتب، في عشرات الكتب اللي بتشرحلك عن طفلك من هو وجنين حتى يولد وبعدها تابعي مع الكتب

اللي بتشرح السنة الأولى من عمره وكيف تتعاملي معها، من ناحية طعامه نومه تطعيماته، واقرأي الكتب

اللي بتساعدك تتابعي تطوره الحركي العقلي الاجتماعي اللغوي وكيف فيكي تدعميه بالوقت المناسب

تاسعاً:

الزوج، وجود زوجك بجانبك ودعمه الك عامل أساسي لمرور شهور الحمل بسلاسة،

رسالتي لكل زوج لازم تعرف انه زوجتك محتاجتك اكتر من أي شخص بالدنيا،

كلمات الدعم الي بتشوفها تكرار هي بلسم لآلامها، لمسة ايدك على كتافها وتشكرك الها هو دافع كافي ليكون يومها جميل،

توفير حدا يساعدها بالبيت لو مرة بالاسبوع هو واجب لازم تحرص عليه، لما تسمعلها وهي عم تشكي وتطبطب عليها

انت خلصتها من هي المشاعر المتخبطة اللي عم تجيها، فأرجوك لا تخيب ظنها، وكون الرجل الداعم اللي هي عم تستناه،

ومن هون حابة اشكر زوجي ياسر على كل الدعم اللي عم يقدملي ياه خلال حملي، الله يخليلي ياك.

الحمل خبر رائع لكل أفراد الأسرة، صحيح هو مشوار طويل لكن خلاله منتهيء نفسيا ومعنويا لوجود فرد جديد رح يغير حياتنا وأهدافنا،

الله يقوم كل الحوامل بالسلامة وان شاء الله صغيرك بيكون بين أيديكي بصحة وسلامة.

https://dailysyria.net/archives/2177