رحلة مربية الحلقة الثانية “من البداية” (فيديو)
وفاء غيبة ـ فريق الموقع
السلام عليكم وأهلا وسهلا فيكم بحلقة جديدة وموسم جديد من برنامج رحلة مربية
صحيح انا بدئت الموسم الجديد بحلقة (أيامي في الحجر الصحي) لكنها كانت مستعجلة وكان ضروري اطلقها فورا، لكن بالنسبة للموسم هاد ان شاء الله رح كمل بمواضيعي المتنوعة عن التربية كلي حماس وطاقة لكون معكم.
وغيرت شوية شغلات متل ماشفتو البداية والديكور، حتى الكاميرا غيرتها وبإذن الله حتى موعد إطلاق الحلقة تغير بدل الخميس صار كل سبت الساعة ٩ بتوقيت مكة المكرمة فانتظروني.
رحلة مربية / من البداية
بسم الله نبدأ
بداية ولادتي!
اخر حلقة من الموسم الماضي كنت لسة بانتظار مولودي الجديد سامي
مر على ولادتي اكتر من ١٠ شهور حابة احكيلكم عن أول كم يوم من ولادتي وكيف مرقت علي
بدي ابدا بيوم ولادتي ، كانت توقعاتي غير الحقيقة توقعت لانه ثالث مولود رح تكون اسهل ولادة
لكن سبحان الله كانت اصعبها وضليت بغرفة الولادة ٢٤ ساعة، بعدين ولدت وشفته لأول مرة شفت سامي
سامي اللي قدر بأقل من جزء من الثانية يسيطر على مشاعري ويفجر ينابيع جديدة من الحب بقلبي،
انا دائما بشبه حب اولادي بناطحة السحاب اول ما بيولد بتنبنى مباشرة بقلبي ناطحة باسمه،
وفعلا هاد اللي صار مع ليان و عمر وسامي
كنت خاف تكون ليان اخدت كل الحب اللي عندي بس لما ولد عمر وبعدين سامي اكتشفت انه الأم
عندها كمية حب بتتوزع على كوكب الأرض كله.
سبحان الله مع كل الألم الجسدي إلا أنه صوت أنفاسه بتكفي أنها تدخل السعادة لحياتي.
فترة ولادتي!
بعد ولادتي بيوم واجهت أول تحدي مع ابني سامي، كان عنده مشكلة الصفار اللي بتواجه الكتير من المواليد، لكن علي كانت تجربة جديدة وصعبة،
خبرنا الطبيب انه وضعه حرج ولازم فورا يدخل على العناية المركزة لاتباع كل الإجراءات اللازمة،
كانت صدمة كبيرة إلي، من اول ماطلعت شمس اليوم
التاني رحت على العناية وضليت جنبه طول الوقت، بكيت كتير لانه كان موصول بكتير أجهزة
وعيونه مسكرة كان مافيني احمله لانه محطوط بالحاضنة
كانت لحظات صعبة بس طول الوقت كنت قول الحمد لله ، بعد مرور ساعة قدرت ابدأ استوعب المكان
اللي انا قاعدة فيه انا (بالعناية المركزة لحديثي الولادة)
اتطلعت حولي كان في عشرات الاسرة للمواليد بالعناية، كانت حالات مختلفة، إما مولود مبكر جدا او عامل عملية او عنده مشاكل بالقلب
او بأحد الأعضاء الداخلية او مشكلة الصفار اللي طلعت ابسط شي ممكن يصيب المولود،
المكان صعب تقعدي فيه وما تتأثري، كنت شوف الأهالي
اللي عم يدخلو ويشوفو مولدهم من وراء زجاج الحاضنة وهنن مبتسمين لكن عيونهم مليئة بالدموع،
كانت لحظات صعبة لكن الحمد لله انه في مستشفيات تقدر تساعد الأطفال المحتاجة عناية.
بعد فترة تحسن سامي وقدرت احمله وضمه وقله نحن رايحين عالبيت سوا..
كانت سعادتي لا توصف بالسيارة وانا راجعة معه عالبيت، وصلت ولقيت اهلي كلهم مجتمعين ومحتفلين
بدخول سامي عليهم، كانت لحظة من اجمل لحظات عمري
بحلقة اليوم بدي وصل رسالة بسيطة جدا
قولوا الحمد لله، اليوم وبكرة وكل دقيقة الحمد لله، النعم اللي حولكم لا تعد ولا تحصى، دخولي للعناية المركزة مع سامي فيقني وخلاني
قول يارب الف حمد والف شكر الك على نعمك الكتيرة، وربي يصبر ويؤجر أهالي الأطفال المريضة واللي حياتها بخطر.
يا أم ويا أب
طفلكم اللي متعبكم لانه ماعم يسمع الكلام هو حلم لكل أم وأب طفلهم مريض، وطفلكم اللي صرختوا عليه
وضربتوه لانه عم يتحرك وينط ويكسر هو حلم كل ام واب طفلهم مو قادر يقوم من عالسرير
طفلكم اللي ما انجز مهامه بسرعة وبالنسبة الكم هو بارد وفاشل هو حلم كل ام واب طفلهم ما عم يفيق من الادوية
احمدوا الله على النعم والحمد مو بس بالقول بل بالفعل، لا تتأففوا من اطفالكم ولا تحسسوهم انكم اتعس اهل بالدنيا
كونوا سعيدين ومتقبلين لحياتكم وازواجكم واطفالكم،
الحياة ممكن تتغير بلحظة مشان هيك كونوا عاملين اللي عليكم وضميركم مرتاح.
الحلقة اليوم مو لتخوفكم بل لتفيقكم وتخليكم تشوفوا كل شي حلو عندكم، تنتبهو للنعم اللي فيكم و حولكم..
وبالنهاية بدي اطلب منكم طلب
اول ماتخلص الحلقة بوسوا اطفالكم وقولولهم هي بوسة لاني بحبكم ولأنكم نعمة من عند الله
وارسلوا رسالة لازواجكم و لامهاتكم وآباءكم اخواتكم وعبرولهم عن حبكم وكم انتو سعيدين بوجودهم بحياتكم..
وارسلولي رسالة إلي تحت الفيديو لانها رح تسعدني كتير
ولاستشارة خاصة بطفلك فيكي تستشيرني بشكل خاص ابعتيلي على الواتس على هاد الرقم
+966 55 257 9023
لأبعتلك كل التفاصيل.
بلاقيكم بحلقة جديدة الأسبوع الجاية
بحبكم
وفاء غيبة