رحلة مربية الحلقة التاسعة “عيد سعيد” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

كل عام وأنتو وأحبابكم بألف خير العيد باقيلو أسبوع بس حبيت اطلق الحلقة بكير لان في تجهيزات كتيرة لازم تعملوها قبل بوقت جاهزين؟

بسم الله نبدأ

هاد العيد من الأعياد اللي فيه غصة بالقلب بسبب الأوضاع العامة وقوة تأثيرها علينا كأفراد وعلى المجتمع والدول بشكل عام.

في البداية:

إظهار الفرح واجب علينا كمسلمين ودورنا كأمهات وآباء هو الأساس لإدخال الفرحة بقلوب أولادنا خلي يكون هاد العيد تحدي جديد

نحاول نعمله غير عن كل الأعياد بابتكار أفكار جديدة مع أولادنا خلي هدفكم لهاد اليوم بأنه رح نصنع الفرح بقلوبنا وسواعدنا ونعيشه مع عائلتنا.

اليوم رح احكيلكم عن ١١ فكرة تخلي عيدكم غير حتى لو من البيت، في عدة أفكار اذا طبقتوها رح تخلو هاد اليوم مميز وذكراه جميلة.

أولاً:

الزينة من الأمور الجميلة لما يكون البيت فيه زينة جديدة ورسائل مليانة على الحيطان اذا فيكم تجيبوا بوالين رح تخلي الأجواء حلوة ومميزة

وممكن تكتبوا على ورق A3  او A4 رسائل حب وتعلقوها على الحيطان متل (كل عام وانتو بخير، بحبكم ، عيد سعيد، انتم عيدي).

ثانياً:

فيقوهم الصبح على أناشيد العيد الموجودة باليوتيوب، خلوا البيت مليان بهجة وضحكة وسعادة من اكتر الأناشيد الي بحبها تبع شركة زين للاتصالات

مجرد ما افتحها بحس الدنيا صارت سعيدة كتير بحب غني و ارقص معهم عليها وهنن بيكونوا بأحلى اللحظات معي ومع ابوهم.

ثالثاً:

هدية العيد، هل لازم اعطيه عيدية ولا هدية، هاد الخلاف كان بيني وبين زوجي من عدة سنوات لحتى استقرينا انه علي الهدية لو كانت بسيطة وعليه العيدية،

لما بيفيق الطفل فوراً ويلاقي في هدية مغلفة عم تسستناه هاد الشعور مستحيل ينساه ، وحيخليه يستنى العيد من السنة للسنة،

فابالنسبة الي انا بحرص جهزلهم هدايا وبغلفها لحتى يبدا يومهم بطريقة  حلوة وغير كل الأيام.. فحاولوا تجهزوا هدية وغلفوها مهما كانت بسيطة.

رابعاً:

لحتى يكون العيد حلو اطفالكم محتاجين الكم، محتاجينكم رايقين ومركزين معهم لمدة طويلة من الوقت، بعيدا عن الجوال وبعيدا عن الأجهزة الاكترونية،

خدوا القرار الصعب بهاد اليوم انكم تبعدوا الأجهزة الاكترونية لمدة ساعتين اقل شي حتى تكونوا مع بعض كعائلة بدون أي تشتت او منبهات خارجية حطوا الجوال على وضع الطيران وبعدوه عنكم.

خامساً:

البسوا لبس حلو ومرتب ، واذا اشتريتوا لأطفالكم لبس عيد خلوهم يلبسوه ويعيشوا الفرحة بكل تفاصيلها. ولا تقولوا ماحدا رح يشوفنا، انتو مع بعض نعمة فحسوا هي النعمة وعلموا اطفالكم يستشعروها.

سادساً:

تصوروا صور حلوة ، صور بضحكات من القلب وصور كوميدية بأشكال بتضحك، خلو الأمور بسيطة ومرحة.

سابعاً:

عطوهم العيدية لو كانت مبلغ بسيط من المال.. الطفل سعادته بالعيدية لو كانت ١٠ ريال المهم انه فيها اهتمام وحب ولو كان الاب ببلد واطفاله ببلد

ارجو الترتيب مع زوجته انه يحول الها مبلغ العيدية وتجهزة للأطفال مسبقاً ولما يحاكوا ابوهم هو يقلهم وين عيديتهم موجودة.

ثامناً:

تواصلوا مع العائلة الممتدة رتبوا قبل بفترة مع عوائلكم لحتى يكون الكل مستعد وجاهز.. فيكم تشبكوا جهاز اللابتوب على التلفزيون

وتتواصلوا مع العائلة الممتدة بطريقة مختلفة عن المعتاد، خلي أولادكم يشوفوا جداتهم وأجدادهم و اعمامهم وعماتهم وخالاتهم واخوالهم واولادهم

لاتستقلوا بأهمية هاد الاجتماع .. لو كان عن بعد اله اثر إيجابي وحلو.

تاسعاً:

غيروا بديكور الصالون واعملوا أجواء سينما وجهزوا فلم عائلي مع بشار وعصيرات وشبسات،، واحضروا الفلم سوا .

عاشراً:

ممكن تطلبوا اكل من برا او تطبخوا طبخة سريعة مع بعض متل برجر او بيتزا اهم شي يكون النشاط جماعي والكل مبسوط فيه.

النقطة 11:

العبوا معهم كل الألعاب الممكنة وجهزولهم مسابقات ومفاجأت وجوائز.

بالنسبة الي جهزتلهم عدة العاب:

لعبة الهدية داخل كرة من الورق: الي بتكون في هدية جوا مجموعة كبيرة من الورق منقعد كلنا على الأرض بشكل حلقة ومنصير

مندور هي الكرة وكل مرة منفتح ورقة وممكن تطلعلنا جائزة صغيرة تحت شي ورقة هيك لحتى توصل لاخر واحد وتطلعله الهدية اللي جوا.

لعبة إيجاد الكنز: حطيت هديه لليان ولعمر بزاوية وحدة من الغرف وبعدين بصير بحطلهم أدلة يتبعوها ليوصلوا للكنز، مثال الدليل الأول

بعطيهم ياه بأيدهم مكتوب او مرسوم عليه براد، فابيروحوا عالبراد بيلاقوا الدليل اللي بعده مثلا مرسوم سرير

فبيروحوا علسرير بيلاقوا الدليل الثاني وهيك ليوصلوا للكنز الأخير اللي فيه هيدتهم.

مسابقة وجوائز، بسبب فـ.ـرق العمر بين ليان وعمر جهزت مجموعة أسئلة لليان ومجموعة أسئلة لعمر

وكل مرة رح يجاوبوا الهم نقاط وبشوف مجموع النقاط وعليه يااما مبلغ مالي بسيط او حلاوة او هدية .

العيد هو هدية من رب العالمين النا بعد الصيام والقيام، لهيك عيشوا الأجواء وابتكروا عيد غير كل الأعياد خلوا

ذكراه جميلة لو كان بهي الظـ.ـروف الصـ.ـعبة لكن انا متأكدة انه فينا نصنع أحداث حلوة اذا قررنا وجهزنا.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم

+966 55 257 9023

لأبعتلك كل التفاصيل..

بحبكم

وفاء غيبة