رحلة مربية الحلقة السابعة عشر “وصفة السعادة PERMA” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

السعادة مين فينا ما بيحب يكون سعيد ومبسوط بشغله وبين عائلته وبكل أيامه، كتير ناس بتبحث عن المشاعر الإيجابية بحياتها،

لهيك اليوم رح احكيلكم عن وصفة واقعية وبنفس الوقت سحرية لحتى نلاقي السعادة بكل أيامنا.

بسم الله نبدأ

في البداية:

لحتى نعيش حياة أمتع مع أطفالنا لازم نكون نحنا مشحونين بطاقة حلوة ننقلها لأولادنا، نحاول قد ما منقدر نصرف مشاعرنا بطريقة واعية ومتوازنة.

لهيك اليوم حابة شارككم وحدة من أهم نظريات علم النفس الإيجابي اللي أسسها مارتن سيلجمان الأب الروحي لعلم النفس الإيجابي

واللي حكى عن خمسة أمور لازم نشتغل عليها لنقدر نكون سعيدين من الداخل واختصرها بكلمة PERMA

رح اشرحلكم ياها وحدة وحدة:

أول حرف من كلمة PERMA  هو P واللي هو اختصار ل  Positive Emotions

يعني مشاعر إيجابية، من مسؤوليتنا اتجاه نفسنا أنه نبحث عن مصادر السعادة اللي بحياتنا مثل مين لما بتواصل معه بيجبلي مشاعر جميلة،

شو البرنامج اللي اذا شفته رح يترك سعادة بقلبي، شو المكان اللي لما روحه برتاح وبكون سعيدة، كل مابحثنا عن مصادر السعادة

وفعلناها بيومنا كل ما انعكس هاد على مشاعرنا وبالتالي على حياتنا مع أطفالنا.. لذا خلينا نحرص على كل مصدر بيسعدنا

ثاني حرف هو E  اللي هو اختصار ل Engagment

واللي معناه الاندماج ونسيان النفس والغرقان بشي منحبه، متل الطفل اللي بيغرق بلعبته أو بالصلصال اللي بيشكله، ابحثوا عن الشي

اللي بيغرقكم وممكن تصرفوا فيه ساعات بدون ما تحسوا على الوقت، شو هو الشي اللي بتبدعوا وانتو عم تعملوه،

بكل سلاسة بتنجزوه، هو الشغف ومواطن القوة عندكم..

أكيد مو سهل نتعرف عليه بس لما منكون مجهزين حالنا لنكتشف ونشغل الرادارات رح نلقط المؤشرات لما تظهر ونشتغل عليها،

مثال: أنا وفاء لما بقعد بشتغل بشغفي اللي هو التربية، لما بكتب ولا لما بساوي حلقة ولا لما بساوي دورة تدريبية، بكل هدول

انا ممكن اصرف ساعات وانا مستمتعة وغرقانة ولو ماعندي مسؤوليات تانية مابقوم من على مكتبي الا للأكل والنوم،

هاد شغفي وهاد مصدر سعادتي وأنتو شو هو شغفكم.

الحرف الثالث R  واللي هو اختصار ل Relationships

العلاقات الاجتماعية، نحن مهما كنا ناس introvert  إلا انه مامنقدر نتخلى عن فكرة أنه نحن جزء من منظومة اجتماعية كبيرة،

ضروري ندرس علاقاتنا، مين منفتقد مين هو الداعم بحياتنا صديق .. فرد من العائلة.. الزوج، اهتمامنا بالعلاقات الاجتماعية متل شحن

الطاقة لبطارية جوالنا، بدونها بينتهي الجوال وبيطفي، ونحن هيك، لامكن نعيش بدون دعم من المجتمع اللي منحبه وبيحبنا،

لهيك اختاروا علاقاتكم صح وتقربوا منهم وتمسكوا فيهم لأنكم بحاجتهم وهنن بحاجتكم.

الحرف الرابع M واللي هو اختصار ل Meaning  

المعنى لحياتي، ليش أنا عايشة شو المعنى من حياتي، هل انا عايش اكل واشرب واتزوج واكبر وموت، لا حياتنا رب العالمين اكرمنا فيها

وعطانا كتير اهداف سامية فينا نحققها، لما بيختفي المعنى من حياتي اختفى الشعاع اللي بيضوي طريقي، وكل ماكان لحياتي

معنى وبصمة علي وعلى غيري كل ماكانت أيامي سعيدة ومليئة بالمشاعر الإيجابية، في كتير أمهات

مابيعرفوا انه تربيتهم لأطفالهم بما يرضي الله ورسوله هو كافي ليخلي حياتها إلها معنى

خلينا نبحث عن معنى لحياتنا معنى ممكن يبدا بسيط بس ينعكس على مشاعري، حفظك للقرآن أو اهتمامك

بصحتك أو قرائتك لكتب بتطورك، هي أمور رائعة والها معنى عميق، شوفي وين بتلاقي نفسك وابدأي.

الحرف الخامس هو A  واللي هو اختصار ل Accomplishments

يعني إنجازات، نحن كبشر محتاجين نشعر بالتقدم، لازم نشوف بشكل عملي خطوات للأمام أي انجاز بيوقف بمكانه ما منقدر نعتبره كافي ليرضينا،

لهيك لما نبحث عن شغفنا وعن معنى لحياتنا ضروري نتبعهم بالإنجازات، لحتى تكتمل الدائرة وندخل بمشاعرنا الإيجابية بقوة،

مثال: اللي بنتهي من حفظ القرآن بيبدأ بإنجاز جديد متل تعلم القراءات ال7 للقرآن وهكذا، أيضا تربية أطفالنا كتير فيها

إنجازات مختلفة على حسب العمر والمهارة اللي عم يكتسبها الطفل بس المهم انه ننتبه عليها ونعرف انها انجاز مهم.

هاد هو معنى PERMA اللي بيخبرنا أهمية نعيش حياتنا بسعادة وإنجاز مع الناس الي منحبها، بالتأكيد بتمر أيام صعبة

وقاسية لكن ضروري نتخطى هي الصعوبات بوعي ونهيئ حياة كريمة نستحقها نحن وأطفالنا وعوائلنا.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة