رحلة مربية الحلقة الثانية والثلاثون “جسمي بعد الولادة” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية

أنا وأنت ومئات الأمهات اللي تغير جسمها بعد الولادة، منهم اللي تقبل ومنهم اللي ما تقبل

شو لازم أعمل لعيش بسلام مع جسمي؟

بسم الله نبدأ

في البداية:

كل البشر بتتغير طبيعة أجسامهن مع مرور الوقت إن كانوا رجال أو نساء والمتزجين والغير متزوجين واللي أنجبوا واللي ما أنجبوا

لكن في صورة عالمية للمرأة المتزوجة اللي أنجبت طفل أو أكتر، أنه جسمها مر بعوامل كتيرة وتسبب

بترك وزن زايد أو علامات تمدد على الجسم أو ندبة عملية الولادة.

لكل شخص بينظر لآثار مابعد الولادة على أنها بتعيب جسم الأم، ولكل أم بتنظر لجسمها أنه هو صار مشوه بعد ما أنجبت أطفال،

بقلهن أنتو غلطانين كتير، هي الأم اللي عانت لمدة  270 يوم للحمل الواحد وهي مو عارفة تتهنى بالأكل أو بالنوم أو بالقعدة أو بالطلعة،

لأنها عم تعاني من آلام وحموضة وتعب ولخبطة بالهرمونات، وتقل على ظهرها.. ولسة عم تستنى يوم الولادة

والمخاض أو العملية القيصرية، وبعدها مسؤولية المولود الجديد بكل تفاصيلها الضخمة.

الأم عم تحط حياتها على المحك لحتى تنجب مولود جديد لهي الدنيا، هاد العمل العظيم مابصير بدون تضحيات،

لهيك لكل شخص حول الأم لازم يرفعلها القبعة ويحترمها على كل هي التضحيات اللي عم تعملها.

وإلك أنت يا أم ياللي مو شايفة الشي اللي عم تعمليه أنه شي عظيم، أرجوكي فكري شوي وعدي التضحيات اللي عملتيها ليجي طفلك للدنيا.

نظرتك السلبية لنفسك عم تهدم فيكي أمور كتير ومع مرور الوقت رح تكتشفي نتايج هي الأفكار بأنها أخدتك بعيد عن الواقع وعن أطفالك وحياتك الحلوة.

لهيك اليوم بدي أحكيلك كم نقطة رح تخليكي تتقبلي جسمك والتغييرات اللي صارت وتعيشي حياتك مستمتعة.

أولا:

تقدير الذات وتقبل النفس، انظري لنفسك بأنه إنجابك لطفلك هو أمر عظيم جداً، وأنه الأجر عند رب العالمين كبير كتير، وحتى في آيات

وأحاديث بتأكد أهمية أجر الأم الحامل وأجرها في الولادة وفي إرضاعها لطفلها ورعايته.. لهيك افخري بنفسك واحتسبي الأجر،

وابدأي تقبلي حياتك وجسمك الجديد لكن تقبلك لا يعني استسالم ولا مبالاة، مهم أنك تنتبهي على نوعية أكلك

وتعملي تمارين لجسمك تستردي طاقتك شوي شوي، لحتى تكوني راضية عن نفسك بشكل عملي..

ثانيا:

التعاطف لا المقارنة،  بدل ماتقارني جسمك مع أجسام نساء تانية نحيفة وقوامها مشدود!، خبري جسمك أنه معلش تتغير لأنه

في سبب عظيم وراء تغيرك، ياجسمي أنا رح اهتم فيك واعمل كل الأمور اللي بتحتاجها لرعايتك من نوم وشرب ماء واسترخاء وأكل متوازن

وتمارين يومية جسمك مو آلة إلكترونية لحتى ما يتغير ويتأثر بالحمل والولادة، أنت انسان ومن حقك تعيشي مراحل حياتك مع جسمك بالطريقة الصحيحة.

من الناس اللي ساعدوني أنظر لجمسي بهي الطريقة المسالمة والراقية هي المبدعة سالي الشوا ابنة البطلة الرياضية كوتش أيمان،

بنصحكم تتابعهون لأن حساباتهم مليانة طاقة إيجابية، وبالنسبة لسالي شوفوا كيف بتحب جسمها وتعلموا منها لأني تعلمت منها كتير

https://instagram.com/sally.alshawwa?igshid=1byr8jo8oj85d

https://instagram.com/coach_eman?igshid=1l9uzhjb5nhgm

ثالثا:

مشاعر مشتركة، رح يجيكي شعور بالراحة لما تعرفي أنك لست الوحيد اللي بتشعر بهي الطريقة السلبية عن جسمك، لو بحثت بالنت

رح تلاقي مئات من الأمهات عندهم مشاعر سلبية نحو جسمهم، أكيد هنن مو صح يشعروا هيك، لكن وجود هاد الشعور للكثير من النساء

دليل أنه طبيعي، لهيك أعملي شي يواجه هي المشاعر وانشريه للي حولك لحتى تحمسيهم يتخلصوا من الشعور السلبي،

متل عمل رياضة أو اتباع حمية معينة وصوريلهم حماسك وشجعيهم يعملوا معك لتكونوا أيد وحدة بمواجهة هاد الشعور.

رابعا:

التركيز على الوظيفة وليس الشكل لما تفكري في حقيقة أن بداخل جسمك نمى طفلين أو أكثر، وبعدها رضعتي لكم سنة، معناها

ربي سخر جسمك ليعيشوا أطفالك، فبدل ما تضيعي بدوامات من الأفكار السلبية، الأسهل عليكي أنك تتقبلي هي التغييرات اللي صارت

بجسمك على أنها واجب أديتيه ليعيش أغلى الناس عندك واللي هنن أطفالك ولو ماعملت هيك ما كان ليكون ولو ماعملت أمك هيك ماكنت أنت هون اليوم.

خامسا:

خطة عملية، بعد الولاد والتغييرات اللي صارت ممكن نشعر بحماس للرجيم والرياضة لنقوي جسمنا ونرجع ليقاته، لكن أخد هيك قرار

لوحدك مو صحيح لأن لازم تتابعي مع حدا مختص يدلك على الطريق المناسب للعودة فلازم تستشيري أخصائية تغذية و مدربة رياضة،

أو إذا ماعندك القدرة حاولي تقرأي وتبحثي كتير لحتى تلاقي المعلومة الصحيحة المناسبة لجسمك،

ولاتنسي جسمك حساس بعد الولادة فانتبهي عليه.

من الجمل الحلوة اللي سمعتها مؤخراً أنه النشاط البدني مهم جداً، ولكن لازم يكون نشاط بدني مابيركز على إنقاص وزنك،

بل لازم يكون نشاط بدني بتعمليه لأنه بيشعرك بالرضا ولأنه رح يساعد صحتك العقلية.

سادسا:

أنا الجديدة، كوني صرت أم معناها في عشرات بل مئات الأمور اللي تغيرت، أنا مريت بتجربة حمل وولادة وصار عندي مولود جديد مسؤول

مني فالبتأكيد حلم أني أرجع متل لما كنت قبل الولادة هو حلم متعب وصعب المنال، لازم نستوعب أنه جسمنا ماعاد متل أول بالزبط،

أنت صرت شخص جديد صرت أُم.. لهيك حبي هاد الشخص الجديد واسمعيله، لاتضغطي على نفسك بل اهتمي وراعي نفسك.

جسم ممتلئ علامات تمدد بالجلد، بطن غير مشدود، أهلا بهم لأن معهم أجى أغلى الناس

مارح استسلم ومارح أتهاون رح أهتم بجسمي وبأكلي وبنشاطي اليومي بدون ضغط، لأعيش بقوة وسلام جسدي وعقلي.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة