رحلة مربية الحلقة التاسعة والثلاثون “طفلي لا يشارك الأطفال باللعب” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية، طفلك مابيلعب مع الأطفال ، بتعرفي من جواه أنه هو بده

يلعب لكن في شي عم يمنعه؟ طفلك بالبيت مرح وسعيد لكن بس يجتمع مع الأطفال بيوقف لعب وبيضل جنبك؟

ليش وكيف نحل هالموضوع بحلقة اليوم.

بسم الله نبدأ

في البداية:

الأسبوع الماضي وصلتني استشارتين عن نفس الموضوع، واللي هو معاناة الأم مع طفلها اللي بتشوفه بالبيت سعيد ومبسوط وبيلعب

مع أمه وأبوه ، لكن بس يجتمع مع الناس بيبطل يتفاعل وبيمتنع عن اللعب وبيصير بيعطي تعبيرات تقيلة للأطفال أو الكبار لما يوجهوله اهتمام!

طيب شو لازم أعمل لحتى ساعد طفلي يتفاعل مع الأطفال الآخرين؟

أولاً:

راقبي، لحتى تقدري تساعدي طفلك بدك تراقبيه بالمواقف الاجتماعية لحتى تعرفي بالزبط شو هو التحدي اللي عم يواجهه بالزبط

بالتالي رح تقدري تساعدي صح، فمن الممكن طفلك يكون مزعوج من صوت الأطفال العالي، أو في طفل بيلعب بطريقة خشنة،

أو في طفل عم يقرب عليه ويشاركه بألعبه الخاصة وهو مابيحب حدا يتدخل بحدود خصوصيته، أو هو بيستمتع يراقب

من بعيد وبينبسط بالمراقبة بدون اللعب أو هو بس مابيعرف كيف ينضم للمجموعة!!

تسليط الضوء على السبب رح يساعدك توصلي لطفلك أسرع وممكن تنزلي لمستوى نظره وتعطيه أنسب سيناريو يريحه لحتى يبدا ينضم للجماعة.

ثانياً:

دربيه، طفلك بيحتاج تدريب على الدخول مع المجموعة، كل ما دعمتي طفلك ليتعلم مهارات تساعده وقت الاجتماع مع الناس

الكبار والأطفال كل ما تمكن من التفاعل معهم، فيكي تعلمي طفلك لما يشوف حدا كبير شو يقول وكيف يرد على اسئلته ولو عم تلقنيه

بصوت منخفض، عطيه هي المهارة بشكل صريح وواضح، قوليله قول وعليكم السلام أنا الحمدلله شكراً، مرات كتير

منتوقع أنه الطفل بيعرف لكنه فعلا بيجهل هي الأمور..

ثالثا:

جهزيه مسبقا، التجهيز المسبق له سحر لا يعرفه إلا من استخدمه، كتبت عنه بكتابي لأهميته، واللي هو قبل ذهابك لأي مكان تخبري

طفلك عن المكان والزمان اللي رح تصرفوه هنيك والناس اللي رح تشوفوهن، ويتجهز بالألعاب والأغراض اللي محتاجها لهداك المكان،

وبعدها بتجهزيه للمتوقع منه، شو لازم يقول وكيف يسلم ويقول اسمه لو انسأل وكم عمره ومع مين رح يلعب..

كوني ايجابيه متل: إذا سألتك خالة نور كيفك شو رح تقلها؟

لما يجي سيف يلعب معك شو اللعبة اللي بتحب تشاركه ياها؟

ابتعدي عن السلبية متل: مو إذا سلمت عليك رفيقتي تقلب وجهك وما ترد، أو هديك المرة كتير انزعجت منك لما

ما لعبت مع الأولاد اليوم بدك تلعب معهم مفهوم.

هاد الأسلوب رح يزيد الأمور سوء فانتبهي منه.

طريقة تانية للتجهيز المسبق هي القصص اللي بتعلم الطفل هي المهارات، أو أنك تجيبي دمى وتعطيهم أسماء

وتدخلي الدمية على بيت وتصير تقول السلام عليكم أنا أسمي مها، ويجي لعندها دمية تانية، وتسلم عليها وتقلها تعالي لعبي معنا،

اخترعي قصة تمثل الموقف اللي محتاجتيه من طفلك وخليه يشاركك اللعب ورواية القصة.

رابعا:

صديق مقرب، وحدة من الطرق اللي بتساعدك تحلي مشكلة الاندماج بالمجتمع أنك تهتمي بتوطيد علاقة طفلك بطفل واحد بيحبه وبيتشارك

معه بعض الصفات ، حرصي على وجوده بشكل دوري يعني كل أسبوع مرة أقلها، صداقة هاد الطفل رح تعطي طفلك دورة مكثفة من المهارات

للتعامل مع الآخرين وتقبلهم، ومع الوقت ممكن تجمعيه مع طفلين آخرين وهكذا لحتى تشعري أنه طفلك تخطى هي المشكلة.

خامسا:

لا تضغطي، الأمهات دائما بيتمنوا أطفالهم يكونوا مبسوطين وعم يلعبوا ومستمتعين، لكن بالحقيقة مرات الطفل إذا ضغطناه للمشاركة

رح يكون مزعوج ومو مبسوط، خدي نفس وعطي طفلك وقت، والجمعة اللي مالعب فيها بتتعوض وإذا ماسلم على الناس

الآن مو هم أو مصيبة مع الوقت رح تتغير الأمور إذا اضفنا المهارة بالطريقة الصحيحة والسلسة.

 سادسا:

الثقة بالنفس، الطفل محتاج يكوّن ثقة بنفسه قبل مايواجه المجتمع، ضروري يشعر أنه مقبول ومرغوب ومحبوب من أمه وأبوه وأخواته،

لحتى يعدي أول خطوة بالثقة بالنفس، بعدها الأم بتشتغل على ثقته بنفسه من خلال المهام اللي بيقدر ينجزها والمهارات اللي بيمتلكها،

وخلوها حلقة بأذانكم، كل مازادت مهارات طفلك كل مازادت ثقته بنفسه، معرفته لكتير أمور وقدرته على إنجازها

رح تكون عنده درع يحميه من العالم الخارجي وتحدياته.

أطفالنا مختلفين، لا تقارني طفلك بأي أحد بالعالم حتى لو بأخواته، هو ولد بنفسيه وطريقة تفكير مختلفة،

لهيك تقبليه متل ماهو وادعميه على الأمر اللي بيحتاجه بدون ضغط وشدة.

هي نهاية حقلتنا لليوم بتمنى تكون عجبتكم.

ولتفاصيل حجز استشارة معي بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة