رحلة مربية الحلقة الرابعة عشرة “التوأم الجزء الثاني” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية.

حلقة اليوم تتمة للحلقة الماضية اللي حكيت فيها عن حياة أم التوأم من بداية الحمل حتى الولادة، ضروري تشوفيها،

بس اليوم رح سلط الضوء على تقنيات بتحتاجها الأم بعد الولادة وبعد مايكبروا شوي وبتتغير نوعية التحديات اللي بتواجهها.

بسم الله نبدأ.

أولا:ً

من اليوم الأول لا تخلي توأمك بغرفتك وضروري تعوديهم انه يناموا بأسرتهم مباشرة، فيكي تجيبي سرير أو فرشة

لغرفتهم وتكوني انت جنبهم ولا انهم يكونوا عندك، لان بعدين رح تكون مهمة فصلهم اصعب من ما بتتخيلي

ثانيا:ً

عودي حالك على انك تشتغلي فيهم بنفس الوقت ولا تقولي بخلص واحد وببدا التاني، يعني جيبي مخدة الرضاعة تبع التوأم ورضعيهم سوا بنفس الوقت،

دشيهم سوا، فيكي تحطي واحد على كتفك واحد على بطنه بحضنك، مشان تخلصي المهمة أسرع وتكسبي وقت اكتر.

نيميهم سوا ولما حدا يفيق بالليل فيقي التاني ورضعيه، لما يكبروا يصيروا 6 شهور قعديهم بالبانيو وحميمهم سوا،

وفورا لبسيهم سوا، كل ماقدرتي تعملي هيك كل مازاد انجازك ولقيتي وقت لحالك.

ثالثاً:

بعد فترة رح يفيق واحد بالليل مع انه شبعان ونظيف وهيك راح يفيق توأمه مشان هيك افصليهم وحطي سرير كل واحد بغرفة،

ولاتخلي الأمور تطلع عن السيطرة لأن واحد بكي قام فيق التاني وانت سهرتي طول الليل عم ترضعي وتنيمي

وحطي ببالك انه بعد الست شهور اذا أطفالك شبعانين ومابيحتاجوا لغيار، لازم يبدوا يعرفوا

How to sooth them selves

يعني كيف يهدوا حالهم لحالهم ” وبعدين يرجعوا يناموا..وهاد بيجي لما انت تقوي قلبك وما تلبي بكائهم اذا انت عارفة ومتأكدة انهم مو محتاجين شي.

رابعاً:

ادخلي الروتين لحياتك وحياتهم، حطي مواعيد ثابتة لكل نشاط وتأكدي انه الروتين هو مفتاح لحياة سلسة مع توأمك

وبقدر قلك اني عشت مع مثال ناجح في تطبيق الروتين وبقدر شبهه بالتوأم واللي هو طلاب الفصل الواحد اللي من نفس العمر،

كان بالمدرسة اللي اشتغلت فيها فصل ل6 طلاب بعمر السنة وفصل ل6 طلاب بعمر السنتين،

كانوا تحت السيطرة لمدة سبع ساعات يومياً بسبب الروتين ونوعية الأنشطة المناسبة اللي عم تتقدملهم.

خامساً:

كبروا أطفالك وبدئت نوعية التحديات تتغير، العدل، الغيرة، توزيع الحب، هل لازم اشتري لكل واحد من نفس اللعبة هل وهل أسئلة كتيرة ممكن تتعبك

مشان هيك وقفي شوي وخدي نفس، وتأكدي تماما أنهم صحيح توأم لكن هذا لايعني انهم شخصية وحدة باهتمامات وحدة

فا مافي حاجة تجيبي من اللعبة أكتر من وحدة وحتى لو حسيتي انهم حبوا نفس اللعبة لاتجيبي 2

لأن طفلك لو كان معه نفس اللعبة رح يشتهي اللعبة اللي بأيد أخته أو أخوه، فا عوديهم انه لازم يستنى دوره متل مارح يستنى دوره لوكان بالمدرسة

بالنسبة للغيرة فهي امر طبيعي بين الاخوات اللي بينهم فرق بالعمر فما بالك بالتوأم اللي عم يتقارن بينهم من أول يوم خلقوا،

هاد مشي قبل هاد، هاد حكى قبل هاد، وانتو أدرى بكتر المقارانات اللي منعيشها ففي حس منافسة عالي بينهم

مشان هيك دور الأهل يعلموا أطفالهم كيفية التعامل مع مشاعرهم هي من خلال المواقف اليومية وطريقة كلامنا فيها،

القصص اللي بتوضح المشاعر، تحويل الغيرة لدافع للإنجاز الجماعي او الفردي، ممكن يرسموا رسمة كبيرة او يلعبوا بالصلصال سوا

وفي شي ضروري تعلميهم ياه انه كل واحد اله وقته معك، صحيح هنن معلقين ببعض، لكن لازم تفصليهم بوقت رواق لكل واحد لو عشر دقايق،

تعملي معه نشاط خاص فيه ورددي عليهم كلمة “هاد دور يوسف بس يخلص بيجي دورك” وبالتأكيد لا تتأخري عليه واياكي تنسي دور التاني.

سادساً:

المدرسة، كبروا وصاروا جاهزين للمدرسة، هل تخليهم بنفس الفصل، بالتأكيد اذا اول مرة بيدخلوا هنن محتاجين للشعور بالأمان ثم بتقدري تفصليهم،

مشان هيك ممكن تخليهم مع بعض ترم واحد مع توضيح فكرة فصلهم للإدارة مسبقاً واذا كانوا 3 توائم خليهم مع بعض الترم الأول

وبعدين كل واحد لحال واذا 4 توائم خلي 2 بفصل و2 بفصل تاني وبعدين الأربعة يكونوا لحالهم بالترم الثاني

المدرسة بتفتح آفاق واسعة للطفل ومن أهمها العلاقات الاجتماعية واطفالك اذا ضلوا مع بعض رح يكتفوا ببعض وينعزلوا عن بقية الشلة

سابعاً:

تذكري انهم فريق ممكن ينقلبوا عليكي ويتعبوكي وممكن يحمسوا بعض، مشان هيك عوديهم على العادات الإيجابية

مشان يذكروا بعض ويقلدوا بعض على شي بيخليكي ترتاحي بتربايتهم مثلا عوديهم يشلحوا حذائهم بالمكان المخصص،

الله يكرمكم، مكان النوم ووقته، الجلوس بكرسي السيارة وبالعرباية عند الخروج، أكليهم دائما بدون وضع أجهزة امامهم،

ولا تتوقعي انه رح تقدري تغيري بسهولة، مشان هيك ابدي صح وريحي حالك لو كانت متعبة اول فترة

ثامناً:

وقت تعديل سلوك احد فيهم تخيلي نفسك متل المعلمة الي عندها اكتر من طفل بنفس الفصل من نفس العمر،

لما بتعدلي سلوك الطفل المشاكس البقية رح يركرزا ويتشربوا شو هو الشي المرفوض اللي ساواه الطفل الاخر فبطريقة مباشرة

رح يدخل الهم بالعقل الباطن انه سلوك متل هاد رح يكون غير مستحسن ويكون مصيره نفس مصير الأخ المشاكس, بالتأكيد لا للصراخ او الإهانة وبالتأكيد ممنوع الضرب

الموضوع كتير كبير وقدرت غطي جوانب كتيرة، ختاما بقلك افخري بإنجازك بكونك أم لتوأم وتذكري وين مارحتي

رح يكون عندك عشرات القصص الي بتخلي كل اللي بالمجلس يستمتع بسماعهم.

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912