رحلة مربية الحلقة السابعة والعشرون “لنعلم طفلنا حب القراءة” (فيديو)

وفاء غيبة ـ فريق التحرير

أهلا وسهلا فيكم بحلقة جديدة من رحلة مربية

الأسبوع الماضي طلبت مني وحدة من المتابعات أني اعمل حلقة عن كيف خلي طفلي يحب القراءة، الموضوع اجى بوقته فقلت لازم اعمل هي الحلقة،

ومشان هيك دائماً فيكم تقترحوا علي مواضيع لرحلة مربية من خلال التعليق على آخر صورة لحسابي بالانستجرام.. اللي هاد هو wafagheibeh

رحلة مربية / لنعلم طفلنا حب القراءة

اذا كيف خلي طفلي يحب القراءة؟

بسم الله نبدأ

 أولاً:

قبل مانزرع قيمة بأطفالنا ضروري يشوفوها عنا نحن وبحياتنا، مشان هيك دخلي نفسك عالم الكتب ولا تقولي مابحب القراءة

انت لسة مالقيتي الموضوع اللي يجذبك ويسحرك لحتى تقرأي فيك مشان هيك بحثي منيح وخلي الكتاب صديقك.

 ثانياً:

من أول ما تولـ.ـدي طفلك وفري الكتب والقصص حوليه، خلي بسريره الكتب المصنوعة خصيصاً للأطفال الرضع، لما تطلعي مشوار

خدي معك كتاب ولعبة وعوديه يشوف الكتاب ويستخدمه من صغره، وأنشئيه على حب الكتاب بطريقة غير مباشرة.

ثالثاً:

اقرأيله اقرأيله اقرأيله قد مافيكي ركزي على قراءة القصص لطفلك، وخليها نشاط يومي ، ممكن وقت العصر وقبل النوم ولا تقولي صغير مو فاهم شي، لا هو فاهم وشوي شوي رح يصير يتفاعل معك بالقصة.

رابعاً:

جهزي مكان جميل وبسيط للكتب، خليه مكان هادي ورايق، وبالتأكيد لازم يكون قريب من أيد طفلك لحتى يقدر يوصل للكتب بأي وقت.

خامساً:

نوعي بطريقة سماع القصة، ممكن تقرأيله ممكن هو يقرئلك او يشرحلك الاحداث، ممكن تستخدمي اليوتيوب لسماع القصة، أو مكتبة فيها شخص يروي القصة لمجموعة من الأطفال.

سادساً:

لما طفلك يكبر خليه يساعدك باختيار عناوين ومواضيع الكتب والقصص، واذا كان بيحب موضوع معين لا تقولي بيكفي عنا كتاب عن هاد الموضوع.. اذا كان طفلك رح يقرأه ضروري توفريله الكتاب اللي بيحبه وبيختاره.

سابعاً:

خلي عيون طفلك تألف وجود الكتاب بالبيت، يعني مثلا وفريه جنب سريرك القرآن الكريم أو كتاب او رواية تقرأيها قبل النوم، وبغرفة الجلوس كتب سهلة الجميع يتصفحها، وبمطبخك كتاب الطبخ.

ثامناً:

حددي يوم بالشهر تاخدي فيه طفلك على المكتبة وممكن تثبتي هاد اليوم ليجيب كتاب جديد يقرأه شهرياً، ترددك على المكتبة اللي فيها ناس عم يقرأوا بيزرع بنفس طفلك شعور جميل وعميق.

تاسعاً:

علمي طفلك انه الكتاب هو مصدر موثوق للمعلومات، وانه بيقدر يبحث عن معلومات كتيرة من خلال الكتب، عطيه مثال

وعلميه كيف يقدر يوصل للمعلومة الي بده ياها من خلال عنوان الكتاب ثم الفهرس ثم استخلاص المعلومة من الفصل المحدد.

عاشراً:

طوري مهاراتك بسرد القصة، افتحي على اليوتيوب وتعلمي كيف فيكي تجذبي طفلك بتغير نبرة صوتك والتقليد لبعض الحركات والشخصيات

 النقطة11:

مثلي احداث القصة انت وطفلك واذا كان عندك لعبة وبرية او بابيت حطيها بأيدك ، او البسي لبس مضحك وخلي تمثيل القصة نشاط اسبوعي مع طفلك تستمعوا فيه وتتقربي منه.

النقطة12:

تميزي انت وطفك بالمناسبات الخاصة خلي هدية طفلك لأصدقاءه كتب أو روايات أو قصص جميلة يختارها معاك بدل الألعاب.

النقطة13:

اياكي بتهديد طفلك بحرمانه من وقت القصة اذا اساء السلوك، وقت القصة أساس في بيتك لاتهددي فيه مشان ماينفر منه مع الوقت.

النقطة14:

لما طفلك يكبر عرفيه على الكتب المشهورة والرويات واهم الكتاب وليش انشهروا.

النقطة15:

لحتى يقرأ طفلك اكتر خففي أجهزة الكترونية.. الحصول على المتعة السريعة والمستمرة بالاجهزة الاكترونية بتبعد أطفالنا عن مهارة الالتزام والصبر والهدوء للحصول على المتعة من خلال القراءة.

القراءة مصدر للسعادة والرقي، وكل واحد فينا بيكون بمكان عام وبيشوف حدا عم يقرأ فورا بيجيك شعور إيجابي نحوه،

مشان هيك خلينا كلنا نحمل رسالة نشر القراءة لأن نحن أمة “اقرأ”.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912