رحلة مربية الحلقة الثامنة والعشرون ” هذا الوقت سوف يمضي” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

من زمان كان في ملك طلب من حكيم عنده بالقصر أنه يبحثله على جملة ينقشها على خاتمه ومو أي جملة أكيد كان بده جملة إذا قرأها و هو حزين يفرح،

وإذا قرأها وهو سعيد يحزن، بعد تفكير طويل لقى الحكيم الجملة ونقشها على خاتم الملك واللي هي:

“هذا الوقت سوف يمضي”

سيمضي. هي الجملة اللي ضروري كل واحد فينا يعيشها لكل أم بتعاني مع أطفالها مع زوجها مع وضعها المادي .. هذا الوقت سيمضي.

فترة حملك الطويلة وعدم ارتياحك بالنوم والجلوس والمشي والقعدة ستمضي

فترة بعد ولادتك لطفلك اللي فيها جسمك تعبان ناقصه راحة ونوم، مسؤوليات جديدة وتشتت بالأفكار ستمضي

وقت كبر طفلك وبدأ يوسخ ويكسر وينكت البيت ويستكشف وتخافيه عليه  ستمضي

فترة دخول طفلك على المدرسة لأول مرة وبكاءه لأنه انفصل عنك، وشعورك بالخوف عليه ستمضي

مشاكل الاخوة بين بعض وشعورك بقلة الحيلة بضبطهم ستمضي

دوام الحال من المحال

مشان هيك خلينا نعيش أيامنا صح ولا نتوقع انه الصعوبات او الرخاء ممكن يستمر سنة او سنتين صعبين مابتعني انه حياتك صعبة والعكس صحيح

لما نحط هي الفكرة ببالنا ونعيشها كل يوم، رح تعطينا قوة وطاقة لحتى نتعامل مع ظروفنا الحالية بطريقة إيجابية.

صحيح انا عم قول (هذا الوقت سيمضي) لكن للجملة بقية وهي كيف اتعامل مع الموقف بالوقت الحالي؟ مجرد شعورك انه الصعوبات لن تستمر رح تكون افكارك متوازنة اكتر.

يعني قلة نومك لأن عندك رضيع ستمضي معناها كوني قوية واصبري على هي المرحلة اللي مر فيها ملايين الأمهات متلك.

طفلك كبر وبدأت معه مخاطر الاستكشاف والكركبة تبع البيت ستمضي ومعناها كوني جاهزة ليصرف طفلك وقته بشكل موجه عمليله روتين وانشطة تخليه عم يكتشف بأمان.

فترة تنظيف طفلك وتعليمه على الحمام.. صعبة وفيها مواقف محرجة ومقرفة.. ستمضي.. حكيت بحلقة  26 عن كيفية تعليم طفلك هي المهارة..

فأرجوكي لو علمتيه صح وصار في حادثة انه وسخ نفسه لا تعاقبيه او تصرخي عليه اضبطي نفسك وتعاملي مع الموقف بطريقة تربوية وحطي ببالك فترة الحوادث رح تمضي

طفلك جاهز للمدرسة وخايفة انه يبكي لأنه انفصل عنك، هي الفترة رح تمضي اسرع واحلى اذا جهزتيه بالتدريج لهي المرحلة المهمة واذا كنت انت قوية وما تراجعتي بقرارك.

ابنك مراهق ، وشعرتي في فجوة بينك وبينه ستمضي، لكن افهميه اكتر بهي الفترة وحاولي تعطيه شوية مساحة لكن بضوابط

الأيام اللي بتحسي انك تعبتي من كتر الصبر واكتفاء من كل التعليمات اللي لازم تقوليها لطفلك قولي لنفسك ستمضي رتبي امورك اكتر وحطي وقت خاص فيك.

تذكري!

وتذكري انهم رح يكبروا بس أهم شي انك لا تفقدي الأمل وتكوني قوية كل يوم,, قوية على افكارك السلبية وسلوكياتك الغاضبة نحوهم.

الخيار بين ايديكي بما انه ستمضي ستمضي انت رح تختاري هل رح تخلي هي الأيام سهلة وجميلة ورايقة وتعاملك مع اطفالك تربوي

ولا رح تكون أيام تمضي تحت سقف غمامة سوداء ، غضب وتكشير وعصبية وضرب لأطفالك، لانك تعبانة ومضغوطة وماحدا مقدر! الجواب عندك!

وتذكري انه صحيح هي الأيام ستمضي لكن ذكرى نوعية تعاملك مع اطفالك فيها سيبقى محفور في ذكرياتهم وسلوكياتهم وممكن يأثر على أحفادك لذا احسني الاختيار لكل فترة.

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912

https://dailysyria.net/2021/6-%d8%b7%d8%b1%d9%82-%d8%aa%d8%ac%d8%b9%d9%84-%d8%b1%d9%88%d8%aa%d9%8a%d9%86-%d9%86%d9%88%d9%85-%d8%a7%d9%84%d8%a3%d8%b7%d9%81%d8%a7%d9%84-%d8%a3%d8%b3%d9%87%d9%84-%d9%88%d8%a3%d9%83%d8%ab%d8%b1/