رحلة مربية الحلقة الواحدة والثلاثون “كيفية صرف وقتك مع طفلك” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

الأسبوع الماضي كنت مالي عارفة شو خلي موضوع حلقة اليوم  استعنت بزوجي وسألته، شو هو أكتر موضوع انت محتاج تعرف عنه بالتربية،

قلي بدون حتى ماياخد وقت ويفكر، أنا محتاج لعدة أفكار لكيفية صرف وقت ممتع مع أولادي، قلتله الموضوع كتير كبير قلي،

قدمي قد مابتقدري وانا متأكد من اثره وأهميته للمجتمع، وبالفعل جهزتلكم هي الحلقة، إن شاء الله تعجبكم

بسم الله نبدأ

في البداية:

قضاء وقت ممتع مع أطفالي هو أمر جوهري وأساسي في تربيتي لطفلي فمن خلال هاد الوقت طفلي بيقدر يلمس الحب الحقيقي

من خلال اللحظات الإيجابية اللي عم نعيشها بيتطور عنده أمور عدة منها تقدير واحترام الذات، الثقة بالنفس، الحوار،

التعبير عن مشاعره بمختلفها، المشاركة، توسيع آفاق التفكير، النموذج الجيد للسلوك الحسن، تقبل الخسارة، وعلاقة جميلة مع الأب والأم.

خلال مشاركتك لطفلك باللعب عم تعطيه انتباهك وتركيزك واللي هو أعمق حالات التواصل، كتير مرات الأهل

بيفكروا انهم تقربوا من طفلهم بمجرد الحديث معهم، صحيح الحوار مهم ولكن اللعب معه أثره أعمق.

ليش لازم نحرص على صرف وقت قيم مع أطفالنا؟

في كتير أسباب بتخليني أهتم لهاد الموضوع:

أولا:

نحن نصنع ذكريات جميلة مع بعض.. ومين مابيحرص تكون ذكريات طفله حقيقية بجمالها..

ثانيا:

عم توضح حبك بطريقة عملية.. كلمة بحب للطفل كلمة جميلة وضرورية نخبره فيها بشكل يومي،، لكن لحتى يحس فيها ويلمسها لازم نلعب معهم ونضحك ونستمتع.

ثالثا:

توفير الجو الصحي، حكيت حلقة كاملة برحلة مربية عن أهمية توفير جو صحي لأطفالنا واديش مهم ننتبه لنوعية الجو اللي عم يستنشقوه أطفالي.

رابعا:

تكوين رابط متين بينك وبين طفلك، هاد الرابط اللي متل رصيد الك بالبنك، رح تقدر تسحبه لما يكبر طفلك ويصير بعمر المراهقة،

لأن كل ماكان هاد الرابط قوي مكون من حب واحترام ومونة بينك وبين طفلك، كل ماطفلك حس بأهمية الرجوع الك وقت اللي بيحتاجك، وانه يستشيرك بمشكلة صارت معه لأن عارف نوعية العلاقة اللي بينكم.

طيب شلون ممكن أصرف وقت ممتع مع طفلي؟

طبعا الخيارات كتيرة لأن كل شخص والأمور اللي بيميل يعملها، البلد اللي عايش فيها والأنشطة المجهزة جواها.

أفكار سريعة بتقدر أو بتقدري تعمليها مع أطفالك.

افتحوا البوم الصور أو الجهاز اللي عليه ملفات صوركم وانتو صغار او  وصورهم

لعب كورة قدم، او يد، بعرف حاتخافي على اثاثك اختاري انسب مكان وجيبي كورة خفيفة انحلت.

غنوا معهم وارقصوا بطريقة عفوية وورجوهم الوجه الحلو السعيد مو بس الجدي والحازم

افتحوا برنامج السناب تشات واضحكوا على الفلاتر الموجودة

اقرأولهم قصة وغيرو بنبرة صوتكم وورجهم مهاراتكم بلعب الأدوار

ارسموا ولونوا وعملو عمل فني ، حضروا الأدوات وابدعوا

اللعب بالألعاب الفكرية متل الشطرنج الأونو الشدة السلم والثعبان الاحاجي البزل، الصلصال والرمل كمية سعادة للطفل لات وصف، الليجو والمكعبات.

أما خارج المنزل:

كرة قدم، كرة سلة، جري وسباق، السياكل، السباحة، زراعة النبات، اخذ الطفل للمسجد، مرافقة طفلك للتسوق لوحدكم،

استشارة الطفل اذا كان الاب او الام بدهم يجيبوا هدية للآخر

الخيارات كتيرة بس مين فينا فاضي يحرص على تطبيقها ودائما اعرفوا انو في فرق بين كون معهم ولا بس موجود بينهم.

خلينا نوقف شوي ونفكر امتى آخر مرة طلعت مع بنتي مشوار خاص، مو بس وصلتها عالمدرسة، امتى اخر مرة قعدت معها وضحكت مو درستها وسمعتلها  واجباتها.

امتى اخر مرة لعبت مع ابني كورة موقلتله بس تلعب رح تكسر الفازا أو امتى اخر مرة اكلت بمتعة معهم مو بس طبختلهم.

حلو نوقف شوي لأن الحياة بسهولة بتسرقنا نحدد وقت يومي ليكون معي اسمه “أنا وأولادي مو بس أنا موجود بين أولادي”

هي ختام حلقتنا لليوم

ولو انت لسة تايهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912

https://dailysyria.net/2021/%d8%a8%d8%a7%d8%b9%d9%88%d9%87%d8%a7-%d8%b7%d9%81%d9%84%d8%a9-%d8%a8%d9%80%d9%80-6-%d8%af%d8%b1%d8%a7%d9%87%d9%85-%d9%82%d8%b5%d8%a9-%d8%a7%d9%84%d8%b9%d8%a7%d8%a8%d8%af%d8%a9-%d8%b1%d8%a7/