رحلة مربية الحلقة الرابعة والثلاثون “ما اللغة التي أتحدث بها مع طفلي؟” (فيديو)

وفاء غيبة ـ فريق الموقع

أهلا وسهلا فيكم بحلقة جديدة من رحلة مربية

“ماما what is that صوت” هي الجملة اللي شدت انتباهي يوم السبت الماضي لما كنت عم اتغدا انا وعائلتي بواحد من المطاعم،

هاد الطفل العربي اللي عم يسأل أمه العربية عن صوت السيارة العالي اللي مرت من الشارع استخدم لغتين لحتى يقدر يعبر عن سؤاله.

رحلة مربية / تعلم اللغات

طرح عندي كتير من الأفكار والتساؤولات، هل ضروري نعلم أطفالنا لغة تانية؟ وهل عم علم طفلي لغة تانية بطريقة صحيحة؟

كل هاد واكتر بحلقة اليوم من رحلة مربية

بسم الله نبدأً

من هو الطفل المبدع؟

الطفل المبدع اللي عنده اكتر من مهارة وعدة لغات هو هدف يسعى اليه كتير من الأهالي،

لكن دائما لازم نسأل انفسنا هل عم نعلم طفلنا بالطريقة الصحيحة بعيداً عن الأعراض الجانبية؟

هل هدفي انه ابني يحكي لغة تانية ضيع عليه لغته الأم؟

موضوع اللغة موضوع كبير كتيير وبيشغل بال كتير من العرب، السيناريوهات بتختلف من نايحة شو علم ابني لغة أول؟،

في الأب العربي والأم الغير عربية أو العكس، في الأم والأب العرب في بلاد غير عربية، في الأب والأم العرب في بلاد عربية

بالتأكيد كل عائلة حرة باختيار أولوياتها ونوعية القيم اللي بدها تربي طفلها عليها، بس ضروري نكون حاطين بالحسبان النتائج الطبيعية لاختياراتنا.

الحلقة اليوم رسالة لكل أم أو أب عربي لسة ابنه صغير وحرمه يحكي لغة الضاد لغة القرآن لغة القوة والحجة والتعبير السليم اللغة اللي منفخر فيها.

أنا مو بدور الحكم على الآخرين لكن في موازين في الحياة فطرية وواضحة ومابتحتاج نتجادل فيها،

فمثلا بوجود ام او اب عرب بوقت ما لازم الطفل يعرف عربي والا رح تضيع اللغة منه وبعد هيك من أولاده.

رح احكيلكم عن صديقتي البرازيلية لوشيانا أو عائشة اللي متزوجة لرجل عربي،

صديقتي عندها 4 أطفال الأربعة بيعرفوا يحكوا عربي وبرتغالي وانجليزي بإتقان.

ليش لأن على صعوبة الأمر الا انه طريقته بسيطة، من أول يوم انجبت فيها بنتها الأولى قررت لما تحكي معها

بتحكي برتغالي ولما الاب بيحكي معها بيحكي عربي، ولما بيجتمعوا الام والأب بيحكوا انجليزي

وطبقت هي الطريقة على كل أولادها وبعد اكتر من 20 سنة زواج ولما بزورها وبلتقي مع أولادها

أذهل من البراعة في استخدامهم للعربي معي واذا حكوا مع امهم بيقلبوا برتغالي دون حتى تفكير.

تعليم طفلك لغة تانية قرار ضروري لأنه ميزة بتفتحله كتير من الآفاق،

لكن حطوا ببالكم امتى وكيف ورح وضحلكم ياها بعدة شروط:

اذا الام والأب عرب وببلد عربي ضروري ماتدخلوا لغة جديدة لطفكم قبل 3 سنوات الأبحاث الجديدة عم تأكد على أهمية وضوح اللغة الأم للطفل.

اذا انت عربي او زوجتك عربية، ابتعدوا عن الحديث مع الطفل بلغة تانية، لان من شروط تعليمك لطفلك لغة تانية

هو اتقانك الكامل الها دون الحاجة للخلط بين اكتر من لغة،

و الاستمرارية الدائمة باستخدام اللغة، أما تحكي معاه انجليزي وفجأة يطلع العربي انت هيك عم تلخبط دماغ طفلك

اذا انت حابب تعلم طفلك لغة تانية بنفسك اختار وقت محدد يعني بعد العصر أو قبل النوم، وخبر طفلك نحن هلأ عم نحكي غير لغة،

خلي دماغ طفلك يرتب المعلومات اللي عم يتلقاها فتحديد الوقت رح يخليه أكتر تقبل وجاهزية.

استخدم مصادر أخرى للتعليم، متل المدرسة، المدرس الخصوصي، الكتب أو الفيديوهات أو الكرتون،

وسيلة واضحة لتعليم طفلك اللغة الثانية، ولما توفرها حتتفرغ للحديث مع طفلك بلغتك الأم

اذا كان احد الابوين غير عربي احكوا مع اطفالكم بلغتكم من اليوم الأول، لا تحرموا اطفالكم لغتكم لان شريككم ما رح يفهم عليكم،

فيكم توجهوا الحديث لطفلكم بلغتكم وللشريك باللغة المناسبة اللي بتفهموها سوا، ولما طفلك بيسمع انه فيك

تحكي اكتر من لغة، ببساطة قول انا بعرف اكتر من لغة لكن معك فقط بحكي بلغتي.

اذا كنتوا عرب وعايشين في بلاد غير عربية المهمة أصعب عليكم لكن لايوجد مستحيل مع الإصرار، استمروا بمحادثة اطفالكم بلغتكم،

ابحثوا عن مدارس تعلمهم العربي، استخدموا واسائل تساعدكم، متل الكرتون او القصص، ابحثوا عن أصدقاء عرب،

لا تقبلوا ابدا تتواصلوا معهم اذا حاكوكم بغير لغة وان شاء الله رح تشوفوا التغيير

خلاصة الكلام لاتحرموا اطفالكم العربي لان المدرسة او الحياة او البريستيج بيتطلب انه يحكي انجليزي او أي لغة تانية.

حددوا وقت أو مصدر واضح لتعليم اللغة لحتى طفلك يتعلم صح.

واللي عايشين ببلاد غير عربية اثبتوا واستمروا ولا تيأسـ.ـوا وانا متأكدة انه لو اشتغلتوا صح رح تلاقوا نتيجة

ملـ.ـموسة بأولادكم ولو بعد حين تسعدكم وتخليهم فخورين بلغتهم.

هي ختام حلقتنا لليوم

ولو انت لسة تايـ.ـهة بسلوك طفلك فيكي تحجزي موعد للاستشارة معي عن طريق التواصل مع مركز هدوء للاستشارات الاسرية على هاد الرقم:

+966551188912

https://dailysyria.net/archives/3456