رحلة مربية الحلقة السادسة والعشرون “الأم النرجسية” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية، هل أنت أم نرجسية، هل فيكي بعض الصفات النرجسية؟

هل رح تعترفي أنه فيكي نرجسية ولا هاد سر لازم ماحدا يكتشفوا؟

شو أثر النرجسية على حياة زوجك وأطفالك؟

رحلة مربية / الأم النرجسية

بسم الله نبدأ

من هي الأم النرجسية؟

الأم النرجسية اللي عايشة بينا ومعنا، وماحدا بيعرف حقيقتها إلا اللي معها بالبيت وعنده الوعي ليعرف أنه سلوكياتها غير مقبولة

متل الزوج أو الجدة والجد، غالباً الأطفال بتنطلي عليهم سلوكيات الأم النرجسية لأن الأطفال مابيعرفوا الشعور اللي ماعاشوه،

فابيتوقعوا أنه اللي عم تعمله أمهم هو الصح..لكن بس يكبروا ويشوفوا الحياة الخارجية رح يكتشفوا الحقيقة لكن رح يكونوا حملوا كل الآثار السلبية من تربية أم نرجسية.

طيب خليني فوت بالتفاصيل أكتر وأشرحلكم شوي عن الأم النرجسية

أرجوكي لحتى نبدأ أول خطوة ضروري أنك ماتحكمي على نفسك الآن وتقولي لأ أنا مو نرجسية، الحكم السريع بيخلينا نخاف بحقيقة

وجود نرجسية عندك وبسببها مافيكي حتى تسمعي عن نفسك أي كلام ما يعجبك، لهيك كوني واقعية واسمعي الحلقة للآخر

ولو في شي من الصفات بيشبهك أو أكد عليها حدا من اللي حولك أرجو أنك تبدأي تتفهمي وتتقبلي لتتغيري، الرفض هو أول دليل للنرجسية.

إضاءة سريعة قبل ما أبدا واللي هي: بتختلف النرجسية من أم لأم ثانية على حسب حدة الصفات الي بتمتلكها،وحتى الصفة نفسها

ممكن تكون عند أم خفيفة وعند أم قوية، مثال: الأم النرجسية ممكن تفضل طفل عن الآخر وعلى حسب حدة النرجسية عندها

ممكن تظهر هاد الأمر، لذا وجود مجرد هي الصفة لو خفيفة عندك لازم تنتبهي لأنك ماشية بطريق صعب ونتايجه كارثية.

طيب شو هي أهم الصفات الي بتتصف فيها الأم النرجسية:

أولاً:

هي أهم شخص بالبيت وما بتقبل أنه يتسلط الضوء على غيرها، فلما تتعب لازم الجميع يستنفر مشانها، ولما تزعل لازم الكل يراضيها، وإذا غضبت فهي دائماً على حق.

ثانياً:

من الصعب جداً تقبل الغير، وبترفض أي فكرة ما بتتوافق مع معتقداتها حتى من أقرب الناس الها ابنتها او زوجها

ثالثاً:

عندها حساسية عالية لأي انتقاد، لأنها بتشوف نفسها كاملة وما عندها عيوب وما بتخطأ.

رابعاً:

عندها غيرة سرية من أي حدا جميل أو ناجح ومابتظهره بسهولة لكن ممكن تبين من بعض سلوكياتها، واستخفافها لنجاح الآخرين.

خامساً:

عندها حب للظهور والاستعراض ولفت الأنظار.

سادساً:

تتصف بقسوة القلب وعدم التعاطف وإذا بدها تاخد حقها بتاخده لو بدها تحرق كلشي حولها.

سابعاً:

بترمي مسؤوليات البيت على زوجها وأولادها، وإذا طالب الزوج بطلب ممكن تعمله لكن رح تمننه ألف مرة بأنها بتتعب وبتعمل من أجل العائلة وما حدا شايف.

ثامناً:

تطالب الجميع بتقدير أي أمر تقوم به وصعب تقديرها لأفعال الآخرين لأنها بتشوف أنه واجب عليهم يعملوه مثل توصيل زوجها للأولاد للمدرسة أو إحضار أغراض للمنزل.

تاسعاً:

الغاية تبرر الوسيلة يعني ممكن تلجأ للكذب أو المبالغة أو الابتزاز أو استغلال الأطفال للحصول على اللي بدها ياه.

عاشراً:

تنتقد أطفالها وزوجها وممكن تكون قاسية بالكلام وبسهولة ممكن تستهزأ وتسخر من آرائهم وإنجازاتهم.

حبيت سلط الضوء بس على النقاط السريعة والواضحة لكن للأسف هي بس شوية صفات سريعة عن الأم النرجسية لكن الحقيقة ممكن ينكتب كتاب كامل عن صفات وتصرفات الأم النرجسية.

طيب شو هي الآثار اللي ممكن تلحق الأطفال بالعيش مع أم نرجسية؟

طبعا برجع بذكر حدة النرجسية بتحدد قوة الآثار السلبية وبالتأكيد شخصية الطفل وكمية التأثر والتعايش عنده رح يلعب دور. لكن غالباً ممكن يواجه الأطفال الآتي:

أولاً:

تدني تقدير الذات وضعف الثقة بالنفس.

ثانياً:

الشعور بعدم الاستحقاق والحاجة لإرضاء والدتهم طوال الوقت وفيما بعد إرضاء الآخرين.

ثالثاً:

لديهم لوم نفس وجلد للذات دائم وببساطة يعتذر لأنه مقتنع أنه دائما على خطأ.

رابعاً:

ممكن يواجه صعوبة في تحديد مايحب ومايرغب لأنه تشوهت صورته عن نفسه بكثرة الاستهزاء والاستخفاف باختياراته.

خامساً:

عندهم مشاكل بالاستقلال وعندهم لوم داخلي اذا تركوا والدتهم اوابتعدوا عنها.

سادساً:

لديهم شعور بالقلق والخوف وعدم الأمان.

ثامناً:

محرومين الشعور بالرضى والسكينة والسعادة.

تاسعاً:

يعانون من تشوش الأفكار وازدواجية الأراء

عاشراً:

لديهم مشاكل في بناء علاقات سليمة وصداقات وفيما بعد مع شريك الحياة.

ممكن توصل الآثار إلى  تعاطي المخدرات والإدمان على الكحول وغيرها من التصرفات المأساوية بهدف تدمير الذات للهروب من الواقع.

العيش مع أم نرجسية أمر صعب لكثرة آثاره السلبية المخيفة، والحل الوحيد هو مراجعة طبيب نفسي

أو أخصائي نفسي ليصير تدخل من شخص مختص يرجع الأمور قدر الأمكان للطريق الصحيح

كتير أمهات رح تقول أنا مو لهالدرجة نرجسية، صح انت مو لهالدرجة بس أرجوكي راجعي نفسك ولو عندك شي لو كان خفيف استشيري حدا مختص

او ناس على علم وانت بتوثقي فيهم لأن لو كان في ريحة نرجسية بشخصيتك رح يكون إله تأثير سلبي، عليكي وعلى الناس اللي بتحبيها،

ونحن كبشر دائماً نسعى نكون أفضل ونطور شخصياتنا وعلاقتنا مع أنفسنا ومع اللي حولنا.

وكلمة أخيرة لكل أم نرجسية وعنيدة ومتمسكة برأيها رح يجي يوم عنادك رح يدمر حياتك وحياة اللي حولك فانتبهي.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم +966 55 257 9023 لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة