رحلة مربية الحلقة الواحدة والثلاثون “تغيير سلوك طفلي من خلال نموذجEAST” (فيديو)

وفاء غيبة ـ فريق الموقع

السلام عليكم وأهلا وسهلا فيكم بحلقة جديدة من رحلة مربية، يوميا بتوصلني استشارات من الأمهات

كيف عدل سلوك طفلي؟، مهما عملت ابني مابيسمع كلامي!، شو أعمل لما ابني بيسيء السلوك؟

كيف تساعدي طفلك يغير سلوكه عبر نموذج EAST

رحلة مربية / كيف أعدل سلوك طفلي

بسم الله نبدأ

إذا عندك رغبة بتشجيع سلوك طفلك للأفضل لازم يكون السلوك المتوقع سهل وجذاب وبيعمله أغلب المجتمع

ولما تطلبيه يكون بالوقت المناسب، هاد هو نموذج EAST  خليني اشرحلكم ياه حرف حرف مع الأمثلة.

أولا:

E  واللي بيرمز لكملة Easy يعني سهل، نحن البشر منفضل المهام السهلة لحتى نتحفز على أدائها بحياتنا اليومية وبالأخص بالبداية،

ولحتى يسهل تغيير سلوك طفلك بدك تقللي الجهد المطلوب لبدء السلوك الجديد، بسطي الأمور لحتى التغيير يبدأ صح،

مثال: ترتيب غرفته، ابدأي بشي بسيط وواضح واللي هو يرجع الألعاب على صندوق محدد.. أو بالدراسة، لا تقوليله خلص دراستك وتعال،

عطيه مهمة واضحة خلص واجب الرياضيات.. إذا حابة تطوري مهار ة الخطابة عنده قوليله أول فترة أحكي بجمعة العائلة

بس معلومتين عنك أو عن عائلتنا، بعدها بيصير ٣ معلومات عن أي موضوع وإذا تحمس بيصير بيبحث بالنت عن موضوع ما وبيحكي عنه.

ولأشرحلكم أكتر كيف نحن البشر منفضل السهل والواضح، رح اعطيكم مثال حملة التوعية اللي صارت عن covid19 وشو الإجراءات

اللي لازم نتخذها للوقاية منه، فكانت رسالة الدولة واضحة: تباعد، لبس كمامة، تغسيل ايدين، مع صور مبسطة لكل طلب،

هيك صار سهل على الناس تطبق هي التعليمات وتغير سلوكها اليومي اللي تعودت عليه سنين طويلة.

ثانيا:

A  واللي بيرمز ل  Attractive  واللي يعني جذاب  لحتى يتغير السلوك لازم يشعر الطفل بالحماس لهاد التغير فدورنا

كأهل أنه نخلي الأمر جذاب للطفل، استخدام الهدايا والستيكرات والمصاصات والمصاري ممكن يكون حل سريع ويفضله كتير من الأهل،

لكن أنا شوي بتحفظ بهيك أمر لأن مابدنا كل شي يكون نتيجته شيئ مادي، اللي بيحب يستخدمه هو أكيد قراره بس نصيحتي

تكون بمرات قليلة كتير حتى مايدمنها الطفل، لهيك بدنا نعود طفلنا على متعة الإنجاز والنتيجة الأخيرة، فمشان يرتب طفلك غرفته

خديله صورة قبل وبعد للغرفة وورجيه الفرق وكيف الرتابة بتخلي الانسان مبسوط ومرتاح..ومشان يخلص واجبه، احكيله أنه هاد جزء مهم

من المعرفة والالتزام، وكيف أنه حل الواجب هو بداية الطريق للنجاح بالمستقبل، انبسطي معاه وكوني فخورة بأنجازه وعلميه يكون فخور بكل إنجازاته.

برجع لمثال التوعية اللي عملته الدولة عن Covid19 وكيف خلو الأمر جذاب من ناحية التعاون مع المشاهير لتوعية الناس،

وكيف انه هي الإجراءات رح  تحمينا وتحفظ حياة أهالينا وكبار السن ضروري يتواجد أمر يجذب الناس لتغيير السلوك.

ثالثا:

S  واللي بترمز ل Social .. يعني مجتمع.

الله خلقنا بالفطرة اجتماعيين، وبنتأثر بسلوك الآخرين على أننا منحاول نكون متفردين بكتير أمور إلا أننا منشعر بالارتباط الاجتماعي،

ودائما في بحث خفي عن إشارات للبحث عن كيفية التصرف اللي عم نعمله ومدى قبوله بالمجتمع.

يعني لازم طفلك يعرف لما أنت تطلبي منه تغيير سلوك ما أنه هاد الأمر موجود ومقبول بالمجتمع، لما نحن نشعر أنه اللي عم نعمله

متل غيرنا لأنه سلوك شائع، منتحمس نعمله، مثال: لما تقولي لطفلك وهو عم يحل واجبه، هلأ أصدقاءك كلهم عم يحلو الواجب مو انت لحالك،

او لما يرتب غرفته بتورجيه فيديوهات أطفال عم ترتب، ولما تكوني بالسوق ولازم يمسك أيدك ورجيه كيف الأطفال ماسكين أيدين أمهم

أي سلوك إيجابي عادي تلفتي نظر طفلك عليه أنه موجود بالمجتمع، بس انتبهي نحن ما عم نقارن نحن عم نسلط الضوء عليه أنه موجود ومقبول ومحبذ.

رابعا:

T  واللي بيرمز ل Timing يعني الوقت.

اختيار الوقت المناسب بطلب تغيير السلوك أمر مهم لتحقيقه، بتأكد الأبحاث أننا منتفاعل بشكل مختلف

على نفس المعلومات اعتماداً على وقت استلامها.

فمثال لما تطلبي من طفلك يحل واجبه وهو عم يشاهد برنامجه المفضل أكيد مارح يلبيكي، أو لما تطلبي منه يرتب الألعاب

وهو لسة عم يلعب كمان أكيد مارح يتجاوب معك، اختيار الوقت المناسب رح يعكس احترامك لطفلك وللشي اللي عم يعمله، وبيدل

أنك فاهمة شو صاير ومانك بعيدة عن الجو، ولو كنت مكانك رح استخدم تقنية التجهيز المسبق، واللي هي، حبيبي بعد ١٠ دقايق

رح تخلص الحلقة فوراً رح تحل واجبك ماشي؟ أو حبيبي بعد نصف ساعة نحن بدنا نروح مشوار ممكن تخلص لعبك وترتب

الألعاب بالصندوق مشان مانتأخر، وترجعي تذكري بعد فترة، اختيار الوقت الذكي رح يختصر عليكي تعب وجهد مالهم داعي.

هاد كان نموذج EAST  لتغيير السلوك بالتأكيد كتير في نماذج وأساليب انحكت بتغيير السلوك،

بس حبيت شارككم هاد النموذج لأني جربته بشكل شخصي ونجح معي أكتر من مرة.

هي نهاية حقلتنا لليوم بتمنى تكون عجبتكم.

ولتحجزي معي استشارة خاصة بعتيلي على الواتس على هاد الرقم

+966 55 257 9023

لأبعتلك كل التفاصيل.

بلاقيكم بحلقة جديدة الأسبوع الجاية

بحبكم

وفاء غيبة