رحلة مربية الحلقة الأولى ” ثلاث أمور لا يمكن تربية مراهق بدونها” (فيديو)

وفاء غيبة – فريق الموقع

السلام عليكم وأهلا وسهلا فيكم من جديد بالموسم الثالث من رحلة مربية، هاد البرنامج اللي صار جزء من حياتي وكياني.

تعلقت فيه وما عاد اقدر عيش بدون حلقاته بشكل أسبوعي لهيك رجعتلكم بسرعة وبحلقات جديدة ومواضيع شيقة فا يارب تعجبكم ..

بسم الله نبدأ..

الموسم الثالث هاد الموسم اللي متحمستله كتير وتجهزتله نفسياً وفكرياً وعلمياَ، بدأت شرارة هاد الموسم لما كترت الاستشارات اللي عم تجيني عن المراهقين.

وبديت شوف المعاناة اللي عم تصير ببيوت الأهالي وبعدها ماطولت كتير ووصلت إلي وذقت معنى تربية مراهقة عندي بالبيت.

ومع أني مأسسة صح ومن لما كنت حامل ببنتي جبت مجموعة كتب وقرأت وعلمت نفسي كيف بقدر ربي بنتي.

ولما ولدتها كنت اقرأ عن كل شهر بشهره وشو لازم أعمل، ومع هيك مرقت بأيام مو سهلة.. لأن هي هية طبيعة المراهقة.

بهاد الموسم رح أشرحلكم ليش هيك المراهقة وكيف بيفكر المراهق وبشو بيمرق المراهق وشو سبب التغيير اللي بيطرأ عليه،

ليش فجأة الطفل اللي كان مطواع تغير وصار عصبي ومابيتحاكى أو البنت الرايقة واللي كانت تسمع كلامك وتحكيلك كل شي انعزلت وبعدت عن الكل.

ليش ابنك اللي كنت فاهمة كل تفاصيلة ماعاد فهمتي شي منه.

لي بنتك ماعاد تعرفي شو بدها وليش عم ترفض رأيك أو أغلب الأمور اللي بتحكيلها عليها.

بهاد الموسم رح أحكليكم عن مهارات بتحتاجوا تتدربوا عليها أنتو اكتر من أبناءكم المراهقين، كيف بتحتاجوا تتقربوا منهم لو هنن بعدوكم.

شو الكلمات المفتاحية لشخصياتهم وشو هي الطريقة الأنسب لتجذب انتباههم .. وبالتأكيد رح تحتاجوا جرعات من الصبر والدعاء والتوكل على رب العالمين..

خلوني اليوم احكيلكم عن المراهق بشكل عام ..

ورح ابدا من المسمى اللي انجبرنا عليه وهو المراهق هي كلمة لاتينية ترجمت للعربية معناها التدرج نحو النضج (البدني والعقلي والجسمي والانفعالي).

لكنها مشتقة من الرهق والسفه والخفة لكن لو علينا كمسلمين مفروض نسميهم المكلفين بسبب أنهم بدأوا مرحلة التكليف من الله عز وجل..

هي المرحلة الانتقالية المتسارعة اللي بيمر فيها الطفل من مرحلة الطفولة ورفع القلم لمرحلة البلوغ والمسؤولية والتكليف..

أكيد رح يكون فيها محطات من الفوضى والضياع والتشتت.. لهيك بدنا ننتبه نحن الكبار ونقدر حساسية هي المرحلة عندهم..

هي المرحلة اللي بدنا نشغل ميزانا منيح وننتبه على كل كفه لحتى ما يطغى شي على شي، ونوقع بفخ تقصيرنا متل الإفراط أو التفريط.

أو التهاون أو التهويل، أو التسلط أو الحماية الزايدة، أو القسوة أو التدليل الزايد أو الإهمال ..

لهيك محتاجين منهج متزن منضبط أساسه الدين والقيم الي بتنشأ شاب صالح متزن مستقل وناجح.. وكيف كل هالشي رح اشرحه بحلقاتي بإذن الله بهاد الموسم

طيب هلأ لازم نعرف الفرق بين البلوغ والمراهقة..

البلوغ اللي هو نضوج الغدد الجنسية اللي بتنقل الطفل لمرحلة الرشد وبتصاحبه تغيرات خارجية وداخلية بجسم المراهق وبيقتصر على ناحية وحدة من النمو الجسدي واللي هو النمو الجنسي..

أما المراهقة: هي المرحلة الي بين سن الطفولة وسن الرشد واللي هي المرحلة الانتقالية اللي بيتغير فيها الطفل غير ناضج جسميا وعقليا وانفعاليا واجتماعيا لإنسان عم يتدرج نحو النضج الكامل ومحاولة الاستقلال والاعتماد على نفسه وإثبات ذاته..

طبعا لازم نخلي ببالنا.. أنه مافينا نربط بلوغ مرحلة النضج الجسدي ببلوغ النضج العقلي والنفسي والانفعالي.. يعني رح نلاقي شب بشوارب وطول وعرض وعقله لسة عم يقرر قررات طفولية..

طيب هل في مراحل للمراهقة؟

نعم تقسمت المراهقة ل3 مستوايات حسب المرحلة العمرية

فعنا المستوى الأول اسمه المراهقة المبكرة من عمر 12 – 15 سنة وبتتميز بتغيرات بيولوجية سريعة وهي اصعب مرحلة.

وأكترها تحديات لكثرة التغيرات ومحاولة المراهق فهم نفسه ومحاولة الأهل التأقلم مع الشخصية الجديدة لابنهم أو بنتهم..

أما المستوى الثاني اسمه المراهقة المتوسطة من عمر 15 – 18 سنة وبيتميز باكتمال التغيرات البيولوجية لكن بتعتمد هي المرحلة على عدة أمور.

منها المراهق ونظرته للأمور ونفسيته ممكن كمان تستمر التحديات إذا لم يجد المراهق نفسه وممكن العكس يهدى وتستقر أموره وتكون هي المرحله أروق من اللي قبلها..

أما المستوى الثالث هو المراهقة المتأخرة من 18 – 21 سنة بيكون المراهق صار شاب راشد بالمظهر والتصرفات.

وكتير مراهقين كانوا متعبين بالمتسوى الأول والثاني وتغيروا تغير كلي بالثالث وصاروا شباب عاقلين وفي منهم لا كملوا طيشهم وكملوا مواقفهم الصعبة مع عوائلهم..

لذا نحن مافينا نعتمد نقول أنه المراهق رح يكون بهي المرحلة هيك سلوكه.. لايمكننا ضمان النتائج لكن واجبنا العمل الدائم..

بالتأكيد مو كل المراهقين متل بعض وقسم المختصين المراهقة حسب تأثير الظروف الاجتماعية والثقافية في سلوكيات المراهق لثلاث أشكال:

أولا: مراهقة سوية، وخالية نسبيا من المشكلات والصعوبات..

ثانيا: مراهقة انسحابية، هذا النوع بيفضل الانعزال بنفسه والاكتفاء بذاته..

ثالثا: مراهقة عدوانية، بيكون مشاكلة كثيرة وعدواني مع الناس والأشياء..

هدول الأنواع ولكن ما أراه بشكل شخصي هو لابد من إعطاء دور مهم لشخصية المراهق.. صحيح الظروف الاجتماعية والثقافية لها دور كبير.

لكن أيضا نظرة المراهق للأمور ونفسيته وطبيعة شخصيته لها أثر عميق لتعكس لنا تصرفاته في تلك المرحلة..

رح انتقل هلأ لنظرة الأهل للمراهق واللي هي من أكبر التحديات التي بتواجه المرشدين والاخصائيين النفسيين..

واللي كانت من أهم الأمور اللي حابة ارسل منها رسالتي خلال هاد الموسم..

كتير من الأهل بينظروا للمراهق على أنه:

عنيد، مابيصلي لحاله، مابيسمع الكلام، صراع دائم، مافي منه أمل، مزعج، مو عارف شو بده، مو فاهمين نحن شو بده، بده يبعد عنا، مابحبنا، مابيساعد، بده أصحابه، بده طلباته وبس، أناني، بس بده أجهزته..

وممكن تدهور الأمور وتوصل لصفات أسوء متل فاشل، بيدخن ومنحرف، بيتعاطى مخدرات، همه يتحدث مع الجنس الآخر.. وهكذا..

طيب بعض هي الصفات ممكن تكون موجودة عند أي مراهق، لهيك لازم نتذكر عدة أمور:

أولا:

هي الصفات لا تعني أنه هو هيك وبس، وجود هي الصفة عند عن ابنك أو بنتك لا تعني وصمة أو بصمة لسولكه كله.

فما فيكي تجرديه من كل الحسنات اللي المكمونة وتضلي تقوليله بس السيئات اللي شايفتيها لأن هو رح يحرص كل الحرص أنه يظهرها الك دائما عالأكيد..

ثانيا:

أي صفة موجودة، مارح تنحل بأنك تحكيله عنها بهي الطريقة حل المشكلة مو بذكرها رح نتطرق لحل المشاكل بالتفصيل

خلال الموسم..

ولكن بشكل سريع دائما بيحتاج منا نحكي مع المراهق ونتفهمه مو نصده ونخانقه..

ثالثا:

المراهق بهي الفترة على كثرة عناده وكثرة ظهورة بصورة القوي اللي ما بيهمة شيء إلا أنه ضعيف وسريع الإنكسار لهذا هو محتاجكم ومحتاج دعمكم وكلامكم الجميل والمحفز.

واللي من صفه وأنكم فاهمينه.. فلا تكونوا كفريقين كل واحد على جبهة قتال.. كونوا أهل حقيقين عارفين وفاهمين وضع بنتكم وابنكم وقادرين تحتوه..

بختام هي الحلقة

المراهق اللي حير وتعب كتير من الأهالي وكان سبب ببكاء كتير من الأمهات، ووصول كتير من الآباء لطرق مسدودة.

بقلكم اليوم، نحن عنا كنز المراهق اللي ببيتكم كنز انظرولوه بهي النظرة لحتى تختلفكم طريقة تعاملكم معاه ومع الوقت رح تخلتف طريقة تعامله معاكم..

وهي أول مهارة رح تشتغلوا عليها انظروا للمراهق اللي عندكم أنه كنز..

وبالأخير

هي نهاية حقلتنا لليوم بتمنى تكون عجبتكم.. ولاتنسو تعملو سبسكرايب لقناتي باليوتيوب ولايك وشير

حتى توصل الفائدة والأجر لأكبر عدد ممكن

ولتفاصيل حجز استشارة معي ابعتي على الواتس على هاد الرقم +966 55 257 9023

أو على هاد الأيميل wafagheibeh@gmail.com لتوصلك كل التفاصيل..

بلاقيكم بحلقة جديدة الأسبوع الجاية

لحياة امتع مع أطفالنا

بحبكم

وفاء غيبة